十三么

出自維基百科,自由嘅百科全書
跳去: 定向搵嘢

十三么係一個麻雀術語,佢係打麻雀其中一種餬牌形式,但同一般「四搭一對」-即係四組搭牌加一對眼嘅形式唔同,十三么完全唔跟呢個格式。十三么有好多唔同嘅稱呼,例如叫「十三太保」、「十三龍門」,而喺日本麻雀入面就叫做「國士無雙」,國士即係指國家入面最優秀嘅人,而無雙即係獨一無二,形容十三么組合入面,有齊一副麻雀入面每一種牌。

十三么組合[編輯]

既然叫得做「國士無雙」,就係因為十三么有齊一副麻雀入面每一種牌。一副十三么嘅組合,係:

「東南西北」、「中發白」各一隻,么即係指頭尾,一筒九筒、一索九索、一萬九萬,呢十三隻牌再是但加一組眼,咁就算係一副可以食餬嘅十三么組合。

MJt1.pngMJt9.pngMJs1.pngMJs9.pngMJw1.pngMJw9.pngMJf1.pngMJf2.pngMJf3.pngMJf4.pngMJd1.pngMJd2.pngMJd3.png+一對眼

台灣麻雀由於打十六章(十六隻牌),所以十三么組合會有啲唔同,除咗要齊「東南西北」、「中發白」,「么九」各一隻,另外要再加多一組搭子先算。

牌王爭議[編輯]

十三么又畀人叫做「牌王」,除咗係因為佢本身包含晒一副麻雀入面每一種牌,另外喺造牌過程入面,如果畀人槓死咗其中一隻,咁成副牌要轉章會好困難。所以將十三么定為「牌王」,即係話佢唔可以截胡,兼且可以搶暗槓。

不過傳統上並無話十三么係乜嘢「牌王」,佢只係咁多番種之中嘅一種,無話唔畀截胡或者可以搶暗槓咁樣。而如果係打台灣麻雀,亦同樣無話十三么係乜嘢「牌王」,不過日本麻雀就一樣有話「國士無雙」(即十三么)係唔可以截胡兼可以搶暗槓。

無論點,十三么唔可以截胡兼可以搶暗槓,喺廣東牌或者香港麻將入面已經成為牌例,除非係打台灣牌,又或者開枱之前特別講明,否則十三么仍然都係當「牌王」處理。