跳去內容

博監局

改拎
出自維基百科，自由嘅百科全書
(由博彩監察協調局跳轉過嚟)

博監局（葡文：DICJ）全稱博彩監察協調局（葡文：Direcção de Inspecção e Coordenação de Jogos；英文：Gaming Inspection and Coordination Bureau），係澳門政府之中，負責管理賭業嘅局級部門。[1]周焯華案及陳榮煉案均為跨境兼跨國之長期集團式犯罪，其營運核心皆位於澳門，不過响大陸政府開始頻繁噉正式控告及公開批評相關組織及人物之後好耐，博監局都冇出手整治……其職員喺法庭做證人作供時，甚至一律表示冇發現佢哋有唔妥，呢檔嘢嘅能力及操守因此備受質疑。[2]博監局對於自己有責任打擊嘅唔少其他大型罪案，亦頗為消極，往往會等到中共中央牽頭出招，先至跟隨行動，令普羅大眾甚為失望。[3]

缺陷

[編輯]

老虎機

[編輯]

傳媒報道過好多件賭客投訴打老虎機中獎之後賭場話唔算數之事：除咗一次宣布賭客有得收齊錢之外，博監局有公開判決結果嘅次次都係賭場贏哂，另外有次响宣布裁定賭客輸哂之後，同雙方齊齊開會，達成咗保密嘅賠償協議；喺六間博彩企業之中，只有新濠及澳博未試過成為當中嘅控訴對象。行政長官响2012年11月26號公佈（澳門特別行政區）〈第26/2012號行政法規〉（博彩機、博彩設備及博彩系統的供應制度及要件），其中嘅第二十條（瑕疵運作）之第一節為「如有理由懷疑博彩機運作有瑕疵或不符合其設計、編程或改裝的規定，承批公司應拒絕支付與該等博彩機有關的彩獎或積分。」。[4]呢句條文嘅出現引起咗大量糾紛；多間賭場自此頻繁聲稱老虎機故障，跟住唔派彩或唔派足彩，因而不斷引嚟投訴——由2012年至2014年5月22號，博監局紀錄在案嘅有133件，只介入其中3件[註 1]。[5]有當事賭客、澳門議員及澳門學者等猛烈批評呢套制度及流程；而有好多單噉嘅嘢，由於牽涉碩大金額，成為咗澳門、香港及台灣嘅大新聞。[6]

賭廳

[編輯]

賭廳幾十年嚟都有靠派利息嚟吸納存款，呢啲存款會被攞去向賭場買泥碼嚟借畀客人用，政府雖然唔將佢當係合法存款，但係甚少對此干預，亦會由用上述泥碼產生嘅賭博收益當中抽税；[7]對呢類生意手法嘅縱容，造成碩大危機，當賭廳生意好差，就會爆發——[8]响2014年及2015年，有好多檔嘅資金鏈斷裂，搞到有大把大陸、澳門及香港嘅存款户攞唔返自己啲錢，因而搏命投訴及示威。[9]出事之後，博監局所做嘅善後工作效果唔大……[10]例如响處理多金事件時：[11]袖手旁觀咗好耐先至有些少温和行動；[12]批准該廳主續牌3個月，督促佢响呢段期間改進運作方式，亦宣稱同多金及永利傾掂咗數，得到兩者好快處理佢哋確認存在嗰啲賬目嘅承諾；[13]有安排多金同苦主談判並參與其中，亦的確有部分存款者得到（非一律全額嘅）賠償而願意和解，不過仍然有好多個就連一個鏰都攞唔返[註 2]；[14]多金拒絕承認好多筆有單有據嘅入數，又嘗試用欠款額嘅3成至5成之低價賠款嚟打發部分苦主，重唔睬大把追討者；[15]面對後嚟經法庭嘅索償，多金及永利一路抗辯，直到俾終審法院判輸為止[註 3]。[16]

人

[編輯]

廉政公署响2000年9月28號捉咗個叫丁尼斯嘅博彩監察暨協調局法律顧問，並响2000年9月29號將渠交去檢察院。[17]响2001年7月9號，初級法院合議庭裁定佢受賄罪成，判囚1年，緩刑2年；案情：正擔任該局內部紀律調查之預審員嘅丁尼斯，以減輕判罰為誘因，要求犯咗錯，姓梁及姓黃嘅2個該局派駐喺海島娛樂場之稽查人員畀錢，後者向廉政公署舉報，然後同該署合作，整個有齊人證及物證嘅陷阱，將前者拘捕。[18]

响2004年12月初，有個靠做電話投注生意嚟揾食嘅大陸疊碼仔[註 4]，向廉政公署舉報，話响過去大約3年，自己喺葡京娛樂場及華都娛樂場嘅貴賓廳入面開工時，經常俾博監局嘅職員勒索茶錢。[19]响2004年12月15號，駐守華都娛樂場嘅主任博彩督察賈仕約及首席博彩督察施偉堅故技重施時，俾預先埋伏嘅廉政公署職員人贓並獲噉捉咗；檢察院响2004年12月16號接手；初級法院响2007年2月28日對此案作一審宣判：[20]兩者均被裁定濫用職權罪名成立，判處1年徒刑，緩刑2年。[21]喺上述調查之中被發現涉嫌有做類似嘢嘅，重有另外2個博彩督察；廉政公署响2005年1月叫檢察院予以處理；初級法院响2009年12月4號為此作一審宣判：[22]蒙志文及Alberto Jorge de Nogueira Botelho均被裁定濫用職權罪名成立；前者被判處9個月徒刑，緩期3年執行，條件係要响30日之內交50,000澳門幣嘅罰金；後者被判處7個月徒刑，緩期3年執行，條件係要响30日之內交30,000萬澳門幣嘅罰金。[23]

廉政公署查到個50歲左右，姓李嘅博監局男稽查員，似乎擁有超過50個不動產物業及3間營業緊嘅商業場所，覺得可疑，於是响2007年03月19號派咗幾個調查員去拉佢……該嫌犯嘗試逃走並喺期間暴力襲擊對方，不過最終被制服，調查員喺佢身上揾到幾十個銀行户口記錄及一批寫咗銀碼兼簽咗名銀行支票；到咗2007年03月21號，廉政公署以涉嫌違反抗拒及脅迫罪為理由，將佢交畀檢察院處理。[24]

响2023年2月6號，司法警察局捉咗2個男人，原因乃相信佢哋係個犯罪組織嘅成員；[25]其中1個58歲姓吳，係個博監局職員，大約做咗30年公務員，涉嫌喺個網上討論區道做副管理員[註 5]，有酬噉打理當中嘅賣淫廣告大約10年；[26]博監局响2023年2月7號宣布已經將佢防範性停職，並開立內部紀律調查程序。[27]

註解

[編輯]
  1. ↑ 該法規至今繼續生效，不過政府冇披露過之後收到幾多此類投訴。
  2. ↑ 响2016年3月30號，追討者人數超過60，金額共計7億至8億澳門幣。
  3. ↑ 截至2022年6月30號，政府已經宣布呢類官司有9單結束咗，永利指有啲未打完。
  4. ↑ 佢係種收費服務——撈家喺賭場入面嘅賭枱道，靠手機同身處其他地方嘅客人保持通訊並按其指示落注；當時此等勾當被規則理論上禁止，不過執法者實際上允許。
  5. ↑ 嗰個網站嘅招牌係「iDREAMx」。

參考

[編輯]
  1. ↑ 〈博彩監察協調局〉。www.io.gov.mo。喺2022-08-08搵到。
  2. ↑ 〈三大「新賭王」已倒其二，賭牌夢碎 – 新華澳報〉。www.waou.com.mo。喺2023-06-14搵到。
  3. ↑ 〈澳門主動配合中央打擊跨境網博專項鬥爭 – 新華澳報〉。www.waou.com.mo。喺2023-06-14搵到。
  4. ↑ 〈印務局 - 第26/2012號行政法規〉。bo.io.gov.mo。喺2022-08-08搵到。
  5. ↑ 〈博監局稱居民投資博彩廳無法律保障 | 澳廣視新聞〉。《今日時事 | CyberCTM澳門No.1人氣社區》。原著喺2022-08-10歸檔。喺2022-08-10搵到。
  6. ↑ 〈有市民不滿角子機故障事件調查結果 | 澳廣視新聞〉。《今日時事 | CyberCTM澳門No.1人氣社區》。原著喺2022-08-08歸檔。喺2022-08-08搵到。
  7. ↑ TVB News, 無綫新聞。〈澳門賭廳涉虧空 高天賜：反映業界欠監管〉。《無綫新聞 TVB News》 (繁體中文)。喺2022-08-08搵到。
  8. ↑ 〈澳門日報電子版〉。www.macaodaily.com。原著喺2015-09-25歸檔。喺2015-09-22搵到。
  9. ↑ 〈濠江衛視 GMTV〉。www.facebook.com (英文)。喺2022-08-11搵到。
  10. ↑ 〈陳達夫: 多金部分獲共同承認帳目可望短期內解決 | 澳廣視新聞〉。《今日時事 | CyberCTM澳門No.1人氣社區》。原著喺2022-08-08歸檔。喺2022-08-08搵到。
  11. ↑ 〈Business Intelligence Monthly Magazine - 讓我們開放大眾市場〉。www.bizintelligenceonline.com。原著喺2023-04-29歸檔。喺2022-08-10搵到。
  12. ↑ 〈欄目〉。wap.macaulotustv.cc。喺2022-08-14搵到。
  13. ↑ 〈博監管: 博彩中介人帳目仍待核查未知壞帳規模 | 澳廣視新聞〉。《今日時事 | CyberCTM澳門No.1人氣社區》。原著喺2022-08-10歸檔。喺2022-08-10搵到。
  14. ↑ 〈多金存款人到博監局與多金律師會面 | 澳廣視新聞〉。《今日時事 | CyberCTM澳門No.1人氣社區》。原著喺2022-08-08歸檔。喺2022-08-08搵到。
  15. ↑ 〈一百四十七期『多金事件』權責誰屬 ？苦主 如何追討？ 20151009 : Macau Cable TV〉 (繁體中文)。原著喺2022-10-07歸檔。喺2022-08-10搵到。
  16. ↑ 〈終院完成審理9宗在娛樂場幸運博彩中介人存碼的上訴案件〉。《澳門特別行政區政府入口網站》 (繁體中文)。喺2022-08-08搵到。
  17. ↑ 〈博監局職員涉嫌受賄被捕〉。www.ccac.org.mo。喺2023-04-23搵到。
  18. ↑ 〈博監局法律顧問受賄罪成〉。www.ccac.org.mo。喺2023-04-23搵到。
  19. ↑ 〈2名博監局督察涉嫌向賭客強索籌碼和現金〉。www.ccac.org.mo。喺2023-06-13搵到。
  20. ↑ 〈澳門賭場的人和事(二十九)：電話投注和微信投注〉。《微信公众平台》。喺2023-06-13搵到。
  21. ↑ 〈博監局兩職員濫用職權被判刑〉。www.ccac.org.mo。喺2023-06-13搵到。
  22. ↑ 〈濫用職權罪應得〉。www.ccac.org.mo。喺2023-06-16搵到。
  23. ↑ 〈2名博監局博彩督察濫用職權被判刑〉。www.ccac.org.mo。喺2023-06-13搵到。
  24. ↑ 〈博監局涉嫌違反抗拒及脅迫〉。www.ccac.org.mo。喺2023-06-14搵到。
  25. ↑ 〈任職公務員30年男子涉經營賣淫網站 | 澳廣視新聞〉。《今日時事 | CyberCTM澳門No.1人氣社區》。原著喺2023-06-14歸檔。喺2023-06-13搵到。
  26. ↑ 〈博監局對涉經營賣淫網站人員開紀律程序及防範性停職 | 澳廣視新聞〉。《今日時事 | CyberCTM澳門No.1人氣社區》。原著喺2023-06-14歸檔。喺2023-06-13搵到。
  27. ↑ Newsdesk (2023-02-07)。〈冚嫖妓討論區尋香閣案再拘兩管理員 其中一人為博監局資深人員〉。Allin News (臺灣中文)。喺2023-06-13搵到。

呤時

[編輯]
由「https://zh-yue.wikipedia.org/w/index.php?title=博監局&oldid=2199430」收