唐代建築

唐代建築泛指大唐嘅建築風格。

簡史

由李淵喺618年建立嘅大唐嘅一個特點係佛教開始興盛，同獨專儒術嘅漢朝形成對比。大唐對佛教嘅重視亦都反映喺其他方面，大唐派咗好多使者－例如係唐三藏－遠赴天竺（家下印度）學佛，呢啲使者仲將由印度嗰度學到嘅第啲知識傳返過去中土，令到大唐建築受印度建築影響，形成咗一套同打前嘅朝代嘅建築截然不同嘅一套風格。代表作有位於山西五台縣、俾建築學家梁思成稱之為「中國第一國寶」嘅佛光寺。

特性

喺風格上，唐代建築嘅特徵係氣魄宏偉、嚴整開朗、舒展樸實、色調簡潔明快。唐代建築好多時都規模宏大而且有住好嚴整嘅規劃，亦都開始成熟噉運用建築群嘅整體規劃。唐代建築善於大量噉使用木做料，而啲佛塔就主要用磚石嚟起。唐代建築影響力好勁，唔單只影響咗後世嘅中國建築，仲對隔咗個海嘅日本建築影響深遠：日本由奈良時代（8世紀大部份時間）開始引入咗大唐嘅建築風格，將唐代建築作為自身嘅建築風格嘅基礎，並且獨立於中國噉繼續將呢種風格發展上去，喺某啲方面比起後代中國建築仲更加完整噉保留咗唐代建築嘅風貌。

喺20世紀及後嘅粵港澳地區，不嬲興以「唐人」自居嘅粵人又有起咗啲參考大唐風格嘅建築物，例如香港鑽石山嘅志蓮淨院就係一個出眾嘅作品。

• 
  佛光寺大殿正面
• 
  佛光寺大殿內部
• 
  山西五台南禪寺大殿
• 
  西安大雁塔
• 
  日本奈良市東大寺；
  佢完整保留到唐代嘅遺風。
• 
  東大寺南門

• 香港志蓮淨院
• 
  志蓮淨院天王殿
• 
  志蓮淨院大雄殿
• 
  志蓮淨院東門
• 
  志蓮淨院花園一個角落頭

睇埋

• 粵式建築