志蓮淨苑

出自維基百科,自由嘅百科全書
(由志蓮淨院跳轉過來)
Jump to navigation Jump to search

志蓮淨苑粵拼:Zi3 nin4 zing6 jyun2;英文:Chi Lin Nunnery)係香港一個佛教非牟利慈善團體佛廟。佢會定期咁舉行法會。

志蓮淨苑嘅院址係喺香港九龍鑽石山嘅志蓮道五號。嗰棟院寺堂以仿原木結構建築為特色,同周圍嘅斧山公園南蓮園池結合做大型嘅仿唐建築群,係香港嘅特色建築同景點之一。志蓮淨苑亦係香港唯一嘅「女眾十方叢林」,為咗由各地而嚟嘅女性高僧提供修道場所。

歷史[編輯]

響 1934 年由葦庵法師同覺一法師,喺藍昌源等居士嘅幫手之下,成立咗一所佛教女眾十方叢林,做僧侶清修嘅場地。嗰時好多難民因為國共內戰而走難湧入香港,唔少聚居喺黃大仙鑽石山嗰頭嘅木屋區,社會福利服務嘅需求好大,所以志蓮淨苑就喺 1948 年搞義學為啲窮嘅細路仔提供教育。1957 年重開埋非牟利嘅孤兒院老人院,收容啲貧苦無依嘅人。

喺 1988 年 5 月,香港政府因為要起大老山隧道而拆咗志蓮淨苑同周邊嘅木屋區,政府嘅市區重整計劃同熱心人士嘅支持(尤其是係藝術界同演藝界),造就咗志蓮淨苑嘅重建計劃,首先就重建護理安老院、志蓮中心,跟手就係佛寺、學校、同蓮苑。志蓮淨苑嘅重建工程喺 1989 年展開,全部重建工程響 2000 年 5 月 18 日搞掂,並正式咁啟用。

殿堂[編輯]

天王殿
大雄殿
觀音殿
萬佛塔
從東門望向第一進庭園區
連接「南蓮園池」與志蓮淨苑的「山門」的「平橋」,橋柱上寫有遊園的守則,橋下是鳳德道

志蓮淨苑嘅殿堂係以大唐嘅傳統木構建築做板,採用天然嘅材料,殿堂嘅木構件,都係以榫接嘅方式組合,唔使用釘,比例和諧。殿堂供奉嘅佛菩薩像依據佛經嘅描述,參照盛唐嘅造像風格,厚重端麗,佢哋嘅造型、手印、執持法器都唔同,彰顯諸佛菩薩特有嘅願力同德行。

成個殿堂南、東、西邊設三個大門,分別係「山門」、「東門」同「西門」。整體建築佈局係「三進三重門一院」:

  • 第一進(闊66米,深36米)
    • 山門
    • 蓮池
    • 長明燈
    • 長廊
    • 天王殿
    • 鐘樓
    • 鼓樓
  • 第二進
    • 大雄殿
    • 客堂
    • 藥師殿
    • 祖堂
    • 觀音殿
    • 臥佛殿
    • 淨土經變圖
  • 第三進
    • 葦公紀念堂/五觀堂
    • 法堂
    • 藏經樓
    • 方丈室
    • 念佛堂
  • 一院
    • 萬佛塔

建築特點[編輯]

志蓮淨苑用盛唐敦煌莫高窟嘅第 172 窟北「觀無量壽經變」圖做佛寺嘅設計規劃藍本,以中軸線做主體佈局,呈現對稱、均衡嘅唐朝建築風格。小部份嘅建築手法採用日本嘅「和樣」形式[1]。全棟建築物完全以檜木打造,是現在世界上最大的手造木構建築群。[2]「西方淨土變」又會嗌做「阿彌陀經變」,估計係敦煌石窟最早出現嘅經變之一,所謂「經變」,即係將佛經嘅內容「變」做圖畫,甚至係雕塑嘅尊像,「西方淨土變」就係用圖畫嚟描述西方極樂世界

山門[編輯]

山門又嗌做「三門」,即係三解脫門咁解。為面闊三間進深兩間單檐歇山頂,柱頭用出兩跳五鋪作偷心造,令拱出耍頭上承替木,泥道拱承枋隱刻慢拱,補間用蜀柱承散斗。正面心間開板門,兩盡間施直欞窗。

天王殿[編輯]

天王殿的重檐歇山頂鎏金鴟尾

天王殿嘅設計參考咗敦煌壁畫同埋日本平等院嘅鳳凰堂。面闊五間重檐歇山頂施鎏金鴟尾,上檐三間,用雙抄雙昂四出跳七鋪作承令拱出耍頭,第三跳計心造,泥道拱承枋隱刻慢拱。心間開板門,兩盡間施直欞窗。副階用材就偏細,出檐短於上檐,心間出單材華拱一跳四鋪作,兩補間均出一跳,補間與柱頭泥道拱連為鴛鴦交首拱。盡間稍間之柱用一斗三升把頭絞項造出昂形耍頭。轉角鋪作均與心間同,角縫出批竹角昂。

蓮花池[編輯]

蓮花係佛教嘅法花,係純淨無染咁解。四個蓮花池係跟住「淨土經變圖」展現嘅阿彌陀佛淨土嘅七寶池同八功德水嚟設計[1]

鐘樓、鼓樓[編輯]

兩樓皆面闊進心一間,無平座層,上施四角攢尖頂飾寶珠。用雙補間,雙抄五鋪作上承令拱唔出頭。拱眼壁開團窠形氣窗,四壁用直欞窗。

大雄殿[編輯]

大雄殿用山西五台山佛光寺東大殿做板,縮七間做五間,並且用推山延長正脊,單檐廡殿頂上施金鴟尾。斗拱鋪作與佛光寺幾乎全同,不同在補間加添了斗子蜀柱於闌額上承第一層枋,枋間不用散斗。柱頭鋪作為雙抄雙下昂七鋪作令拱替木出耍頭,第二跳計心承泥道拱慢拱,扶壁用泥道拱慢拱合兩組。補間為蜀柱承枋,出兩跳,第一跳承駝峰,第二跳承令拱耍頭。心間石兩稍間開板門,兩盡間係直欞窗。

南蓮園池[編輯]

內文: 南蓮園池

同志蓮淨苑對應嘅南蓮園池係一座古式園林,面積達三點五萬平方米,山、水、林木同建築小品嘅建設同佈局,都係依照大唐嘅風格,南蓮園池以每年一蚊嘅象徵式收費委託志蓮淨苑管理、營運同保育。除咗咁,志蓮淨苑亦都負責公園嘅設計、監督建造同埋日常維修工作。

睇埋[編輯]

[編輯]

  1. 1.0 1.1 郭錦鴻 (2008-11). "特色以外─志蓮淨苑布局對人文精神的體現". 《香港佛教》網站. (原先內容喺2010-06-12歸檔). 喺2012-08-13搵到.  檢查日期值喺: |date= (詳情)
  2. 志蓮淨苑 日本平等院風情HK 港生活

出面網業[編輯]