圍魏救趙

圍魏救趙係三十六計入面嘅第2個計策，歸類入勝戰計，內容係先退到敵人虛弱嘅後方，再襯敵方精銳部隊攻打另一敵人時，趁機會打敵方。

原文

圍魏救趙係兵法「三十六計」嘅第二計，原文係「共敵不如分敵，敵陽不如敵陰」：

• 「共敵不如分敵」嘅意思係：與其進攻敵人兵力集中嘅地方，不如先諗辦法分散敵人嘅兵力，然後再進攻佢哋。
• 「敵陽不如敵陰」嘅意思係：與其進攻敵人剛陽嘅地方，不如進攻敵人陰弱嘅地方。

故事

周顯王十五年（公元前354年），趙國進攻衛國，想迫衛國屈服，衛國原來係魏國嘅屬國，被迫依附趙國，魏惠王知道之後好嬲，決定派龐涓去討伐趙國。唔夠一年嘅時間，龐涓就攻打到趙國嘅國都邯鄲。趙國嘅國君趙成侯，一面固守邯鄲，一面派人去齊國（趙國同齊國係結咗盟嘅）求救。齊威王於是叫田忌做主將，孫臏做軍師，率兵去解救趙國。

孫臏認為大軍到咗齊魏邊境嘅時候，魏軍好可能已經攻入咗邯鄲。孫臏諗到一個計仔，佢認為魏軍依家打緊趙國，精銳部隊一定會傾巢而出，國內只會得番啲老弱殘兵，所以佢建議田忌，不如「擊其虛處」，只要派出輕裝部隊直奔魏國嘅首都大梁，占據險要嘅軍事要塞，魏國被人揸住要害，一定會班師回朝，解救自己受到嘅威脅。田忌聽咗孫臏嘅建議，叫唔識打仗嘅齊城、高唐，假裝攻打襄陵（魏國嘅軍事要地），而真正識打仗嘅軍隊，就繞道去打大梁。

果然，魏軍知道咗大梁俾齊國圍困之後，急急腳班師回朝。呢個時候，田忌將兵馬埋伏喺魏軍必經之路桂陵，魏軍途經桂陵嘅時候就同齊軍撞到正。兩軍打起嚟，齊軍先係假裝打輸咗要走佬，魏軍唔敢追。龐涓嚟到之後，發現齊軍「戰敗」，但係自己嘅前鋒無追住佢哋打，於是帶兵匆匆追趕。結果魏軍俾齊軍重重包圍，喺桂陵大敗，趙國嘅威脅解決咗。

呢個就係聲東擊西，圍魏救趙嘅策略。