坦克殺手

坦克殺手（下）同另一種反坦克武器——「鐵拳」反坦克榴彈（上）

坦克殺手（德文：Panzerschreck），正式名稱54式反坦克火箭炮（德文：Raketenpanzerbüchse 54，縮寫RPzB），係二戰期間德國研發嘅一種反坦克武器，尾部裝填，肩扛發射，炮彈射出後由火箭推進。

坦克殺手有個重大缺陷：由於發射嘅時候炮筒前後都會大量出煙，因此發射之後就要馬上轉移，否則就會被敵軍發現。不過，同同一時期嘅其他反坦克武器相比，坦克殺手嘅威力實在驚人：以90度角射入嘅時候可以射穿200毫米厚嘅裝甲，以60度角射入嘅時候，都可以射穿160毫米嘅裝甲。而當時美軍最勁嘅巴祖卡火箭炮，就連100毫米嘅裝甲都好難打穿。