執笠

執笠，又叫結業、倒閉，係指一間企業或者一個組織唔再需要或者無能力繼續運作落去，而需要採取必要行動，例如停止經營。執笠嘅原因好多：

第一，可能係因為破產，即係嗰間企業或者嗰個組織唔夠資金嚟繼續營運，例如：喺香港嘅老牌建築商馮祥記，因為資金周轉問題，喺2024年3月1號破產，同埋遣散所有員工。喺中國，2019年創店，喺高峰期有超過300間舖嘅網紅手搖飲品店「圓真真」，因為虧損太大，而全線倒閉。

第二，可能係因為經營條件轉差，令到本來好賺錢嘅生意變成好難做落去，所以老闆接咗佢，輸少當贏，例如：喺香港，2023年1月至2024年1月嘅13個月裏面有160間「財仔」執笠，原因係利率抽升、破產潮令到佢哋回收唔到資金，好多顧客有借無還。

第三，獨資企業可能因為老闆死咗而無辦法繼續做落去，呢啲情況下，好多時啲伙記好難追討返啲遣散費同假期補償金。

第四，一間企業俾另一間企業（或者競爭對手）收購而停止繼續存在。

第五，一間企業同另一間企業合併而令到部分嘅分店執笠。

第六，一個機構因為當初創建嘅條件改變咗，所以需要停止營運。

第七，另一個執笠嘅原因係老細想逃避對員工嘅責任，例如：喺香港，餐廳、酒樓因為唔想俾長期服務金，或者利用香港嘅破產欠薪保障制度，而假執笠，換招牌繼續經營，最典型嘅例子係2012年嘅「老鼠平」案。

雖然執笠通常係針對企業或者係非營利組織（NGO），但係所有人類創建嘅組織都有可能會執笠，從一個街邊賣糖果嘅檔口、一間教堂，到整個宗教，直至係整個國家都有可能執笠。

執笠嘅形式有兩種：自願執笠同埋非自願執笠。組織嘅自願執笠比非自願執笠少好多，原因係喺正常情況下，喺可能嘅情況之下，大多數組織都會想繼續做落去，除非發生咗一啲令到佢哋唔可能繼續做落去，或者無必要繼續做落去嘅情況，例如政治、經濟、社會或者技術環境轉差。