士碌架

士碌架（snooker），又叫英式桌球，係一樣用白波射其他顏色波落袋嘅檯上運動，係桌球運動嘅其中一種。喺英國、英聯邦國家、香港等等同英國有聯繫嘅地方流行。

張球檯大概長3569毫米、闊1778毫米，四個角落頭同埋中間兩邊有袋口共六個。用嘅波分為1個白波，15個紅波同6個顏色波（黃、綠、啡、藍、粉紅、黑）共22個波。首先射紅波，再射顏色波。喺檯面重有紅波嗰時，落袋嘅色波要拎返上嚟按位置擺好，射到啲紅波冇晒再按顏色波分數由低至高順序射埋佢，最高分就贏。其中紅波1分，黃波2分，綠波3分，啡波4分，藍波5分，粉紅波6分，黑波7分。