大亞灣核電廠
大亞灣核電廠喺中國廣東省深圳市大鵬新區大鵬半島[1]，係中華人民共和國建成嘅第二座核電站，距離香港市區大概50公里。間廠由香港嘅中華電力同廣東核電投資有限公司持有[1]，1994年開始營運[2]，亦係中國首座用國外技術同埋資金建設嘅核電站。另外，喺大亞灣核電站側邊，亦有嶺澳核電站，兩者共同組成一個大型核電基地。
供電情況
[編輯]呢個核電廠每年發電量超過150億千瓦時，同時向香港同廣東供電[2]。香港嘅中華電力購買當中嘅七成電量。喺2014年底至2023年間，佢哋輸港核電量嘅比例，會提升到佔佢總輸出量嘅八成[1]。
持股資料
[編輯]爭議
[編輯]核電安全問題
[編輯]大亞灣核電廠自設立以來，就因為核電安全問題備受批評。其中創辦《明報》嘅香港文人金庸，就曾經喺《明報》發表多篇社評積極反對，又話萬一發生事故，香港就會變成「死港」[3]。一向反核嘅時事評論員黃世澤亦批評，香港政府一直喺大亞灣核電廠嘅問題上，無足夠措施保障香港人[4]。
氚排放超標問題
[編輯]2021年4月，日本公佈處理福島第一發電廠淨化後核廢水嘅處理方法，決定將廢水稀釋後排入大海，稀釋後每年最多排放22兆貝克嘅液態氚，濃度亦會稀釋到每升1500貝克，即係世衛飲用水標準嘅七分一。香港核學會主席陸炳林指，日本公佈嘅做法其實對人體影響唔大，但消息公佈後就引嚟中國外交部嘅攻擊。不過，《眾新聞》翻查資料，發現中國現存49座核電機組，同樣有將核廢水倒落大海。其中大亞灣核電站放射性物質「氚」的排放上限，甚至比日本福島嘅排放標準高出十倍，亦即係超出世衛飲用水標準[5][4]。
參考
[編輯]- ↑ 1.0 1.1 1.2 1.3 1.4 Group, C. L. P.。〈廣東大亞灣核電站〉。www.clp.com.hk。原著喺2021-04-15歸檔。喺2021-04-15搵到。
- ↑ 2.0 2.1 〈大亞灣應變計劃-輻射與核安全-核電廠〉。www.dbcp.gov.hk。喺2021-04-15搵到。
- ↑ 李偉欣 (2018-10-31)。〈【金庸逝世】反核先驅：若因人為錯誤致香港垮台 中方要考慮政治風險〉。《香港01》 (香港中文)。喺2021-04-15搵到。
- ↑ 4.0 4.1 《大亞灣排出嚟嘅氚仲多過福島 黃世澤幾分鐘評論 20210414》 (英文)，喺2021-04-15搵到
- ↑ 〈眾新聞 | 【核廢水爭議】趙立堅：海洋不是日本的垃圾桶 翻查大亞灣規定 放射物質排放上限遠超福島十倍〉。《眾新聞》 (中文)。原著喺2021-04-15歸檔。喺2021-04-15搵到。