大佛口

  想搵香港區議會選區，請睇大佛口 (選區)。

大佛口 Tai Fat Hau
市區
大佛口。皇后大道東街頭

笪地以舊時大佛洋行命名。直去皇后大道東，轉左軍器廠街。有電車路。

大佛口（Tai Fat Hau）係香港一地，喺灣仔西面一帶，舊時歸下環，名出自大佛洋行，至初喺皇后大道東同舊軍器廠街交界路口。就響今日皇后大道東、軒尼詩道、金鐘道三角地，皇后大道東／軒尼詩道休憩處嗰度。今日周圍有香港警察總部、正義道軍營、忠利集團大廈。後尾變成呢一帶叫法。一九九四年，香港區議會開咗大佛口選區，東面去到大王東街同盧押道。

後尾皇后大道東一段，大佛口以西，改名叫金鐘道。而正義道軍營嗰座山，亦叫大佛山。下面皇后大道東、金鐘道有封咗嘅防空洞。

史

當初皇后大道東，北面原本有段軍器廠街，而軍器廠街唔遠就到海旁，海旁條馬路叫海旁東，或者下環海旁，香港電車由皇后大道東，轉入軍器廠街，再轉行海旁。未再塡海之前，有軍器廠，有海軍船塢。

第一次世界大戰後，皇后大道東、軍器廠街轉角位，有間大佛洋行，古物行來嘅，日本人開。之後1940年代，有間二天堂藥材舖，有說外牆上掛大佛做商標，街坊叫呢處做大佛口。但係，二天堂藥廠家族發言人韋基舜，出來澄清，話大佛口個名，出自戰前東洋佛，唔係戰後二天堂佛嘜。所以大佛口個名，都係出自大佛洋行。

而軍器廠街轉入海旁東，海陸軍人之家，或者水手館，係英國循道公會為軍人而設，有住宿、文娛康樂、膳食、教會。側邊有海軍飯堂。

去到1920年代，下環海旁大興土木，呢帶重新起過，加埋填海。本來來就想剷走啲樓，延長軒尼詩道，東行直出新填海。軍器廠街東北移，北行直出新填地，唔再駁皇后大道，改駁軒尼詩道。計劃要到二戰之後先實行。

大佛洋行笪地，拆咗。水手館拆咗搬去軒尼詩道同晏頓街交界，紅磚屋，今日衛蘭軒。中華循道公會香港堂，紅磚教堂，一九三六年落成，當地人叫大佛口教堂。當時教堂同水手館，都用紅磚，襯埋一色。一九九二年拆。一九九四年重建，一九九八年落成。

第二次世界大戰前夕，三角地設咗機槍堡。

戰後，一九五〇年，軒尼詩道軍器廠街交界，有麗的呼聲大廈。六十年代，變成先施保險大廈。二〇一五年，變成今日忠利集團大廈。

九十年代，大佛口向皇后大道東行，永樂里樂滿大廈曾經有間大佛口食坊。賣告白口號，大佛口食坊、營業到天光、海鮮價錢平、專係益街坊。出名辣酒煮花螺。由於宣傳甚廣，外地人以為大佛口喺嗰度。