太極拳
太極拳係太極門對其主要拳法嘅總稱呼，屬內家武學。太極拳呢個名幾時開始有已難考正，傳聞係由宋元時代太極張三丰創造[1]，但係現代太極門五大派（陳家太極門、楊家太極門、吳家太極門、武家太極門、孫家太極門）叫渠為太極拳，卻係由武家太極拳始創人武禹襄開始。武禹襄兄長武澄清於舞陽鹽店得到王宗岳所著嘅《太極拳論》。武禹襄見而讀之，潛心研究後，心有所悟，始稱其拳為太極拳[2]。嚮武禹襄叫此拳作太極拳之前，楊家太極拳始創人楊露禪嚮北平教拳嗰陣，此拳曾被稱為柔拳、綿拳、化拳、同軟拳[3]。
簡介
[編輯]太極拳係道家武學，行拳嗰陣講究鬆沉圓活，內外一體，周身動靜純以意行。基本戰術同《莊子‧說劍》中所言嘅道門劍學戰術一樣，係「示之以虛，開之以利，後之以發，先之以至 [4]」。先明察敵方嘅勁氣（聽勁），透過唔同心法令敵人勁氣落空又或將之引乜，使敵人因為身法進入敗勢而難以再有效控制自身勁氣身法，直至其虛實畢露，即刻擊其虛處 [5]。
源流
[編輯]太極拳源流嘅講法，主要有兩大流派。第一個，係「陳家溝起源說」，第二個係「蔣發傳陳長興說」。
陳家溝起源說
[編輯]武術史名家顧留馨（渠係陳家太極門重要傳人之一 [6]）同唐豪認為現代太極拳由陳家溝「炮捶陳家」（即係今日陳家太極門嘅掌門家族）嘅陳王廷所創。依據係《陳氏家乘》之中記載陳王廷一句頗為模糊嘅詩：「晚年造拳自娛」。顧留馨與唐豪憑呢句認為陳王廷所做嘅拳就係太極拳 [7]。
蔣發傳陳長興說
[編輯]楊、吳、武、孫四家太極門嘅人多持此說。呢個學說認為太極拳於明末清初由傳人山右王宗岳傳畀蔣發 [8]。而陳家溝炮捶陳家（即係今日陳家太極門嘅掌門家族）嘅陳長興畀蔣發打敗之後，拜渠為師 [9]。陳長興學成太極拳之後，嚮陳家溝教過少數弟子，但係陳家族人認為渠拜外族人為師，所以禁止渠再嚮陳家溝教拳。自此，陳家溝中只有陳長興同渠少數嘅弟子識得此拳 [10]。直至陳長興弟子楊露襌（楊家太極門宗師）以太極拳威震京城（北平）嘅消息傳到陳家溝之後，族人意識到此拳嘅利害，先至找陳長興教太極拳。但係陳長興當時年紀已老，好難再教渠地全套太極拳，所以只好將太極拳心法招式儘量容入陳家炮捶之中。呢套拳，就係今日陳家太極門嘅「頭套拳」。
蔣發創立趙堡太極門說
[編輯]呢個學說係由趙堡太極門一系所持。同《蔣發傳陳長興說》一樣，相信太極拳不知始於何人,武當道人張三丰善於此技。後來由山右王宗岳傳畀蔣發，而蔣發學此拳七年後，返去趙堡鎮，成為趙堡太極門第一代傳人。後來陳家溝陳家第十五世祖，陳家拳小架傳人，太學士陳清萍搬去趙堡鎭，並拜張彥為師，成為趙堡太極門第七代傳人。渠嚮趙堡鎭設館廣收徒，此拳先至傳出趙堡鎭。[11]
參考文獻
[編輯]- ↑ 孫祿堂著，《太極拳學》，1942 年，第 1 頁。
- ↑ 顧留馨著，《太極拳術》（ISBN 962-04-0401-7），中國圖書刊行社，1985 年，第 365 頁。
- ↑ 許禹生《太極拳勢圖解》第五章《太極拳之流派》。
- ↑ 吳圖南講授，馬有清編著，《太極拳之研究》（ISBN 962-07-5024-1），商務印書館（香港），2005 年，第 88, 89 頁。
- ↑ 楊班候，《太極拳九訣》之「五字經訣」。
- ↑ 陳照奎講授，馬虹整理，《陳氏太極拳體用全書》（ISBN 7-5434-0288-2/G‧239），河北教育出版社，1989 年，第 2 頁。
- ↑ 顧留馨著，《太極拳術》（ISBN 962-04-0401-7），中國圖書刊行社，1985 年，第 350 頁。
- ↑ 于志鈞教授著，《太極拳正宗》（ISBN 962-436-219-X），1999 年，第 35 頁。
- ↑ 李璉著，《楊少候太極拳用架真詮》（ISBN 7-5009-2344-9），北京：人民體育出版社，2002 年，第 19 頁。
- ↑ 吳圖南講授，馬有清編著，《太極拳之研究》（ISBN 962-07-5024-1），商務印書館（香港），2005 年，第 51 頁。
- ↑ 〈香港趙堡太極拳總會網站：太極拳源流〉。原著喺2008年4月29號歸檔。喺2008年4月11號搵到。