夯土

夯土（夯讀坑或者亨；Rammed earth）係一隻用泥起嘢方法，主用來起牆。響唔係咁多木，又多泥嘅地方會用得到。夯土係一種好古老嘅方法，響中國黑陶文化已經識得用，用來起城牆，宮室。後尾有磚，石屎，水泥就好少用。近年呢個方法又畀拎返出來用，因為佢夠環保，因為泥周圍都有，亦都係好自然，好平嘅材料。

料

料主要係泥，再溝埋沙、石仔同埋黏土等佢實淨啲。傳統亦可以溝石灰或者動物血。而家下可以溝水泥。

個方法係先起個模，跟手倒一浸濕泥入去，大約100毫米到250毫米到。然後大大力壓實佢，等佢得返一半厚。呢個步驟可以用機器壓，可以搵幾個人或搵嘢"軋"實佢。壓實之後，又加多浸，重複做一次，又再來，直至整到想要高度為止。因為呢個方去可以整到好穩陣，所以即刻柝模都得。

柝模之後，要整花紋上去嘅話，就最好一個鐘內搞掂，唔係點會太硬做唔到。夯土要一段時間乾，不過可以一路乾一路加工。呢個時候就最好將夯土封實，等佢可以防水。

家下做法通常都會加底先做夯土。底可以係石屎都得。亦都有人再加多層發泡膠。有啲會加色加木加樽，等佢睇落唔同啲。

整好之後，夯土可以揼釘上螺絲都得。有壞亦可以加一樣嘅泥補，睇落完全唔覺。

夯土好識儲熱。日頭佢會慢慢熱，晚黑會放返熱出來。所以可以將溫差打勻，咁就唔使用冷氣或暖爐。夯土啱晒冬天保暖。

夯土夠厚夠密，所以隔聲相當好，而泥本身都防火。

無水泥加實之前，夯土最啱乾嘅地方用。濕嘅地方就麻麻地，要加啲唔會畀天氣整壞嘅嘢，好似草都可以。又或者要出加防水。