妲己

妲己
出生日	約前1076年
本名	姓：己　字：妲
死亡日	約前1046年
國籍	商朝
配偶	商紂王
亞爸	有蘇氏諸侯
[改維基數據]

日本 江戶時代 浮世繪師葛飾北齋喺佢嘅繪本畫集 北齋漫畫 入面嘅妲己

 妲己（粵拼：taan2 gei2） （—前1044年）係商朝最後一位君主帝辛（紂王）嘅寵妃。相傳佢好靚，後嚟畀紂王捉咗，之後係咁討好佢，最後搞到亡國，妲己亦都畀周武王殺咗。

生平

喺已出土嘅甲骨文卜辭入面，都搵唔到對妲己嘅任何記載。

根據商代甲骨文同金文嘅常用詞彙語法，「妲己」可能係「婦己」嘅誤解，商末金文隰尊入面提到「婦宜在大室」，呢到嘅「婦」或者就係指妲己。商朝女性地位比起周朝同秦漢時期高，商代本身就存在咗大量嘅女性官吏同諸侯，而后妃作為商代統治階層一員參政係唔會受到非議，所以話妲己「干政」、「牝雞司晨」依啲言詞，其實係周代之後反對女性參政嘅價值觀。而且周代係文化倫理層面上，亦都比起商朝保守許多、開始受到禮教下禁欲主義嘅束縛，所以之後喺後世逐漸衍生出「商紂王和蘇妲己淫亂失國」嘅故事。由《史記》和《列女傳》開始，妲己嘅形象先至逐漸豐富，大大增加咗古史層累嘅成分。

根據《國語》、《史記》等史書嘅記載，妲己係有蘇氏諸侯個女，係帝辛征伐有蘇氏之後，有蘇氏將佢嫁咗比帝辛做妃子，並深得帝辛喜愛，之後立為王后。帝辛沉迷妲己嘅美色，荒理朝政，對佢言聽計從，甚至去到「妲己之所譽貴之，妲己之所憎誅之」嘅地步。《國語·晉語一》：「殷辛伐有蘇，有蘇氏以妲己女焉，妲己有寵，於係乎與膠鬲比而亡殷」，呢一段內容甚至容易令人理解成妲己係間諜，但係考慮到《國語·晉語一》後文中都提到「周幽王伐有褒，褒人以褒姒女焉，褒姒有寵，生伯服，於係乎與虢石甫比，逐太子宜臼而立伯服。太子出奔申。申人、鄫人召西戎以伐周。周於係乎亡」，呢到嘅褒姒並唔係間諜，因此唔能夠直接話妲己係間諜嘅結論；不過中國後世傳統嘅「紅顏禍水」史觀入面，認為妲己以美色獲得帝辛嘅專寵，並將佢視為令到商朝滅亡嘅元兇。

喺後世嘅寓言故事入面，認為帝辛總之妲己話咩佢都會話好，作「新淫之聲、北鄙之舞、靡靡之樂」，仲搜搜刮民脂民膏，起鹿臺，入面放滿奇珍異寶；同時「積糟爲邱，流酒爲池，懸肉爲林，使人裸形相逐其閑」，徹夜長飲，歡嬉達旦。酒池肉林就係帝辛為博佢開心而起嘅，每次搞飲宴可以多達三千人，命令男女裸體追逐。大臣比干係帝辛面前進諫：「不脩先生之典法，而用婦言，禍至無日。」妲己慫恿帝辛，殘酷地要比干剖心而死。不過呢啲故事都係古史層累而成，並唔能夠考證，唔好盡信。

周武王趁帝辛將主力派去討伐蠻族嘅時候發動諸侯偷襲朝歌，一舉滅商，帝辛走佬到鹿台自焚。《列女傳》記載妲己被俘虜，然後押去刑場斬首示眾，呢個說法都係屬於後世古史層累而成嘅故事，《逸周書·克殷》就記載帝辛嘅兩個妃子或女性統帥係自縊而死。

有學者指出，妲己嫁比帝辛時，距離帝辛亡國少則21年，多則43年，妲己唔可能魅惑帝辛咁耐，可能係後人抹黑帝辛同妲己。

出面網頁

• 妲己喺Freebase嘅資料