娜塔莎里察遜

出自維基百科,自由嘅百科全書
跳去導覽 跳去搵嘢
娜塔莎里察遜

娜塔莎里察遜Natasha Richardson1963年5月11號2009年3月18號),係英國女演員,1986年出道,代表作有《魂斷仲夏夜》嘅瑪麗雪梨、舞台劇《歌廳》同埋《天生一對》,1998年攞過東尼獎嘅最佳音樂劇女主角,2009年因為滑雪意外而死。

生平[編輯]

家族[編輯]

娜塔莎里察遜出身於電影世家,老豆東尼里察遜係一位幾出名嘅電影導演,代表作係1963年嘅《風流劍客走天涯》,而呢套片仲令佢攞到奧斯卡金像獎最佳影片;阿媽雲尼莎烈姬芙係資深女演員,代表作為《春光乍現》、《茱莉婭》等等,攞過奧斯卡最佳女配角、艾美獎最佳女主角同埋女配角、金球獎最佳女配角同埋東尼獎最佳舞台劇女主角;細妹朱莉里察遜都係演員,代表作為《凹/凸容醫》;而阿公米高烈姬芙都係演員[1]

經歷[編輯]

後生嘅娜塔莎里察遜

娜塔莎里察遜1963年響倫敦出世,有兩個細妹朱莉同埋嘉芙蓮,原名娜塔莎珍里察遜

響1986年,娜塔莎里察遜正式出道,同年憑住《魂斷仲夏夜》嘅瑪麗雪梨一炮而紅,兩年之後又出咗另一個代表作《紅色鐵金剛勇破爆炸黨》嘅派翠西亞赫茲。1990年,佢同製片人羅拔霍士結婚,但係響1992年就離婚。而響1991年,老豆東尼里察遜因為愛滋病而過身,所以娜塔莎里察遜之後籌款籌咗成幾百萬,而所有籌返嚟嘅錢就全部捐畀美國愛滋病研究基金,一齊對抗愛滋病。

1993年,佢憑住舞台劇《安妮克莉絲蒂娜》攞到劇院世界獎。第二年,佢同愛爾蘭男演員里安納遜結婚。1998年,佢以舞台劇《歌廳》攞到東尼獎嘅最佳音樂劇女主角。但係進入千禧年代之後,娜塔莎里察遜嘅代表作少咗[1]

響2009年3月16號,娜塔莎里察遜響加拿大蒙特利爾一個滑雪場上面唔小心跌親,初時仲行得走得,但係返翻去酒店之後頭痛得好犀利,畀人緊急送去響曼克頓Lenox Hill醫院[2]。雖然全部屋企人都過嚟醫院陪佢,但娜塔莎里察遜響3月18號死咗,終年四十五歲[2]

屋企[編輯]

第一任:羅拔霍士

第二任:里安納遜

  • 大仔:米高納遜
  • 細仔:丹尼爾納遜

[編輯]

  1. 1.0 1.1 "里安納遜強顏別亡妻 娜塔莎李察遜落葬 - Yahoo! Music". web.archive.org. 2009-03-27. 喺2020-09-13搵到.
  2. 2.0 2.1 kekemomomo (kingleop). "英國女星娜塔莎李察遜滑雪傷重逝世 得年45歲". 隨意窩 Xuite日誌. 喺2020-09-13搵到.