孫東寶台式牛排

孫東寶台式牛排係台灣一個賣台式西餐牛扒嘅連鎖餐飲品牌，喺1976年由孫東寶創立，後嚟發展到全台灣。當時理念係用親民嘅價錢，畀一般民眾都可以食到牛扒。

有啲媒體會將孫東寶台式牛扒當做台式牛扒嘅代表，例如台灣YouTuber翁雋明（Joeman），喺自己嘅網上節目《Joe是要對決》中，就曾經到孫東寶嘅大同雙運店拍攝，同另一間賣新台幣 4980元嘅奢華牛扒餐廳「對決」。

發展史

孫東寶喺1976年創立呢個品牌，初初係喺台北八德路擺街邊檔，以一份40元嘅平民價錢闖出名號，喺熱辣辣嘅鐵盤上，除咗牛扒同埋炒麵，仲打上一隻蛋，成為如今台式牛扒嘅經典食法。孫東寶之後越做越大，曾經喺新竹以北開出卅幾間加盟店，因缺乏控管逐漸走向衰敗，2012年桃園中壢最後一間店熄燈之後，品牌宣告走入歷史。

去到2015年，另一台式牛扒連鎖品牌「貴族世家」嘅董事長林士欽，決定將呢個品牌復活。林士欽之前亦曾經係孫東寶創辦人嘅徒弟，後嚟亦成為孫東寶第一個加盟主，一度開咗十三間分店，直到1995年先自創貴族世家。

特色

店內裝修以大紅配色為主，每個餐送一個餐包，店入面濃湯、嘢飲可以任飲。