日本之心黨

日本之心黨（日文：日本のこころ^{(Nihon no Kokoro)}）係日本一個右翼政黨，由「日本維新會」嘅石原派喺2014年8月1號創黨。呢個黨本來叫次世代之黨同守護日本之魂黨，2016年9月改用依家呢個名。2018年11月，日本之心黨同自民黨合併。

簡史

基於日本維新會內兩個大佬橋下徹同石原慎太郎對某啲議題立場唔同（好似核電同修憲），兩人宣佈解散舊日本維新會。2014年8月1號，以石原為首嘅一派組成次世代黨，當時有19個眾議院議員同3個參議院議員。

兩個月之後嘅第47屆日本眾議院議員總選舉，次世代黨遭到將近滅黨式嘅打擊。19個議員得2人成功連任，黨內領導級人物石原慎太郎都落選。石原更加喺選後退出政壇。

2015年，包括第一任黨首平沼赳夫在內嘅兩個眾議院議員退黨，重投舊東家自民黨。

跟住第二任代表中山恭子喺第48屆日本眾議院議員總選舉之前加入新成立嘅希望之黨，黨代表嘅位置就交由黨內唯一嘅參議院議員中野正志去做。

變成一人政黨嘅日本之心黨，唯一議員中野正志加入咗自民黨喺參議院嘅黨團。2018年11月，中野正志正式加入自民黨，日本之心黨玩完。