完顏亮

完顏亮（1122年 2月24號—1161年 12月15號），係大金第四個皇帝，金太祖完顏旻嘅孫仔（金德宗完顏宗幹個仔），1150年到1161年在位，佢無廟號，但謚號叫做煬，史稱金海陵煬王。

1150年，完顏亮殺死堂阿哥完顏亶，自立為帝，1153年，完顏亮遷都燕京，令金朝逐步漢化。喺佢在位期間，不但擴大皇帝嘅權威，甚至於濫用權力，誅殺大臣；而且佢嘅宮廷生活相當荒淫，喺《金史》呢本史書記載：「營南京（燕京）宮殿，運一木之費至二千萬，率一車之力至五百人。宮殿之飾，遍傅黃金而後間以五彩，金屑飛空如落雪。一殿之費以億萬計，成而復毀，務極華麗。」

1161年，完顏亮因為征伐南宋嘅宋金采石之戰失利（南宋方面就有虞允文書生退敵），被部下耶律元宜所殺，死後被堂細佬完顏雍追降為海陵煬王、庶人。