宮澤喜一

出自維基百科,自由嘅百科全書
跳去導覽 跳去搵嘢
宮澤喜一

宮澤喜一(日文:みやざわ きいち,1919年10月8號2007年6月28號),日本政治人,曾經做過內閣總理大臣、經濟企畫廳長官、通商產業大臣、外務大臣、內閣官房長官、內閣副總理、大蔵大臣、郵政大臣、農林水產大臣、財務大臣、自由民主黨總務會長同總裁。因為響做完首相後再次出任大蔵大臣,所以又畀人叫做「平成高橋是清」。

經歷[編輯]

佢1919年響東京府出世,籍貫廣島縣。老豆係前眾議院議員宮澤裕,阿公係前司法大臣小川平吉。而喜一嘅細佬宮澤弘都係政治人,曾經做過法務大臣。

宮澤喜一先後畢業於舊制武蔵高等學校(武蔵大學同武蔵高等學校中學校)同埋東京帝國大學(依家嘅東京大學)法學部政治科,1942年做咗大蔵省宮僚,之後曾經做過大平正芳津島壽一同埋池田勇人秘書。1953年當選參議院議員,正式做政治人,加入自民黨池田派。

1991年11月5號,海部俊樹宣佈唔撈,由宮澤喜一接任做首相,係日本最後一位官僚出身嘅首相。但係佢響壞賬處理問題上受到好大爭議,導致1993年社會黨提出內閣不信任案,點知同屬自民黨嘅小澤一郎,聯同羽田孜食碗底反碗面,竟然投下關鍵性嘅支持票,最後獲得通過,將宮澤喜一趕落台,由新黨代表細川護熙接任。因為宮澤係日本史上最後一位同時兼任自民黨總裁嘅首相,所以畀人改花名叫「自民黨嘅德川慶喜」。

1996年,宮澤東山再起,當選眾議院議員。1998年,時任首相小淵惠三唔識搞經濟問題,就搵咗之前做過大藏省、因而處理金融問題好叻嘅宮澤做大蔵大臣,所以又畀人叫做「平成嘅高橋是清」。2001年,宮澤調任財務大臣。

2003年宣佈退出政界,由侄仔宮澤洋平繼承佢嘅飯碗。退出後身體開始差,2005年響屋企跌低,入院。2007年6月28號因為老衰而死,終年87歲。

屋企[編輯]

佢同老婆有一對仔女,大女啟子嫁畀前美國駐日大使羅思德,生咗兩個女宮澤艾瑪、宮澤沙羅;而大仔宮澤裕夫係一位建築家。