富咸足球會

富咸
Fulham

全名	富咸足球會
外文全名	Fulham Football Club
花名	佃農（The Cottagers）
創會	1879年
主場	卡雲農舍球場（Craven Cottage） （容納人數：28,800人）
波士	舍希德·汗 （Shahid "Shad" Khan）
主席	舍希德·汗 （Shahid "Shad" Khan）
領隊	艾華路艾比路亞 （Álvaro Arbeloa）
打緊聯賽	英格蘭超級足球聯賽
2025-26	英超，第 11 位
波衫供應	Adidas
波衫廣告	SBOBET
主場波衫 作客波衫 第三作客

富咸足球會（Fulham Football Club）係一間位於英格蘭首都倫敦富林區嘅職業足球會，目前打緊英格蘭超級足球聯賽，1879年成立。從1896年開始直到家下，富咸嘅主場就係位於泰晤士河河畔嘅卡雲農舍球場（Craven Cottage），可以容納到28,800人。而佢嘅死敵係西倫敦打比 （West London Derby）入面嘅車路士、賓福特同埋昆士柏流浪。從1896年，亦即同卡雲農舍球場作為主場嘅嗰年，白衫黑褲已經作為呢支球隊嘅代表波衫。

1879年成立嘅富咸足球會係倫敦最有歷史嘅職業足球隊，1898年呢支球隊加入咗南部足球聯賽 （Southern League） ，並且喺1905-06同1906-07球季喺裡面嘅甲組贏咗兩連冠，連同一次嘅西部足球聯賽（Western League）冠軍。1907年，富咸被選咗做英格蘭足球聯賽 （English Football League）嘅成員之一，並且要從乙級聯賽（Second Division）開始打起。雖然去到1927-28球季呢支球隊就因為表現唔掂，降咗落丙級南部聯賽（Third Division South），不過僅僅喺4年之後，亦即1931-32球季，球隊成功贏返一次丙級南部聯賽冠軍，升返上乙級聯賽，甚至喺1948-49球季贏埋乙級聯賽冠軍，隊史首次升上英格蘭最高級别嘅聯賽，亦即係當時嘅甲級聯賽（First Division）。然而富咸喺甲級聯賽嗰陣球隊成績一直徘徊喺下游水平，卒之喺3季過後就降返落乙級聯賽，不過喺1958-59球季嘅乙級聯賽亞軍，足以令呢支球隊重返甲級聯賽。一如既往，即使有當家球星莊尼希施（Johnny Haynes）坐陣，球隊都無辦法擺脫喺甲級聯賽入面一直掙扎喺降班邊緣嘅窘境，最後富咸喺1967-68同1968-69球季要兩連降，一度要落到去打丙級聯賽（Third Division），好在2季之後呢支球隊就升返去乙級聯賽，甚至喺1974-75年英格蘭足總盃入面一度殺入決賽，可惜身處乙級嘅富咸以0-2輸咗畀當時喺甲級嘅韋斯咸，無緣捧盃。

1980-90年代，表現低迷嘅富咸徘徊喺當時嘅乙組同丙組聯賽之間。直到1997年，呢支球隊由一位叫穆罕默德法耶茲（Mohamed Al-Fayed）嘅埃及富豪接手先至結束咗呢波頹勢，新官上任成功喺短短嘅5年內，令富咸從本身嘅丙級聯賽（實際係第4級別）連升三級，去到2001年嘅英超，亦係球隊首次征戰英超。歐戰方面，2002年，富咸成功捧起圖圖盃，然而喺2010年，首次殺入歐霸決賽嘅富咸加時以1-2不敵馬體會，球隊自1975年嘅足總盃以嚟再度失落獎盃。現任嘅主席舍希德·汗（Shahid Khan）喺2013年夏季正式入主球會，但喺2014年，富咸喺英超僅僅排第19，需要降班落英冠，亦都斷咗球隊連續第13年嘅英超征途。因為之後球隊喺2017-2022年期間曾經5度喺英超同英冠之間不斷升降，所以畀人叫做「升降機」（Yo-yo club），自2022-23年球季升班之後，富咸喺英超終於企穩陣腳，目前成為咗英超具有競爭力嘅中遊份子。

歷史

内文：富咸足球會史同富咸足球會賽季表

1879–1907年，球會創立同南部足球聯賽

富咸聖安德烈堂

富咸足球會喺1879年創立，當時係叫「富咸聖安德烈堂主日學足球會」（Fulham St Andrew's Church Sunday School F.C.） ，當時係由倫敦西肯辛頓星道（Star Road）叫做富咸聖安德烈堂（St Andrew's, Fulham Fields）嘅一間英格蘭教會教堂，入面嗰一班鐘意打木球嘅信徒一齊組成。而聖安德烈堂嘅主教堂到今時今日嘅都仲存在緊，教堂裏面嘅銘牌亦有記到球會嘅歷史。富咸喺1887年贏咗西倫敦業餘盃（West London Amateur Cup），隨後喺1888年12月將本身嘅球會名拎走「聖安德烈」嗰部分，易名做家下嘅「富咸足球會」，去到1893年，富咸成功一take過，首次參加西倫敦足球聯賽就拎咗冠軍返嚟。至於最早有記載嘅富咸波衫，係1886-87球季嘅半紅半白色嘅衫襯白色短褲，而球襪顏色就無記到。

1896年，富咸就開始用卡雲農舍球場（Craven Cottage）嚟做主場，直到當今。而同年球場嘅首次比賽就係對陣家下早就已經執笠咗嘅米娜娃足球會，當時富咸同呢支球會係死敵嚟。1898年12月12日，富咸足球會正式轉做職業足球會，而同年球隊畀南部足球聯賽 （Southern League）接納，去咗打嗰個聯賽嘅乙組。富咸亦都係倫敦史上第三支職業化嘅球隊，緊隨喺1891年嘅阿仙奴 （嗰時叫緊皇家阿仙奴）以及1893年嘅米禾爾之後。喺1896-97球季，佢哋用咗紅白配色嘅波衫。及後喺1902-03球季，贏到乙組冠軍嘅富咸順利升班上南部足球聯賽嘅甲組。同時，1903年球隊亦都開始採用全白色嘅波衫，並且之後就定好咗用白衫黑褲作為代表波衫，至於球襪顏色雖然之後分别不斷採用過唔同嘅黑色同白色作為變化，不過家下呢隊嘅球襪一般係用純白色嘅。 喺1905-06同1906-07球季，富咸成功喺嘅南部足球聯賽甲組當中贏咗兩連冠。

1907–1949年，加入足球聯賽

候賽因希加斯（Hussein Hegazi），只係喺1911年為球隊效力過1場比賽

喺兩連冠之後，1907年，富咸正式遞紙加入英格蘭足球聯賽 （English Football League），並且喺乙級聯賽（Second Division）打起。只不過同年9月，富咸喺足球聯賽嘅首戰，居然喺主場輸咗個0–1畀侯城，好在幾日之後喺當時打比郡嘅主場棒球球場 （Baseball Ground）成功贏返個1–0返嚟，奪得聯賽首勝。而首個喺足球聯賽乙級嘅球季以22勝5和11負，埋單49分，排到第4位，奈何離升班區差3分，無緣甲級。不過富咸喺同年喺足總盃嘅表現亦相當搶眼，一路過關斬將到去到半決賽，當中一役係作客盧頓以8–3大炒對家。點知去到半決賽，富咸居然以0–6慘敗畀紐卡素，而輸6球亦都創下咗至今有紀錄以嚟足總盃4強比賽入面嘅最大輸波紀錄僅僅喺2季之後，呢支球隊就喺1909-10球季贏咗倫敦挑戰盃（London Challenge Cup），只不過喺21年嘅乙級聯賽征途入面，富咸最好嘅成績就已經係啱啱提到嘅1907-08球季首秀嘅第4位，因為喺1927-28球季嗰陣僅以1分之差排尾二，搞到要降班落去打1920年開始搞起嘅丙級南部聯賽（Third Division South）。1911年，一位叫做候賽因希加斯（Hussein Hegazi）嘅埃及前鋒，係其中一位最早喺英格蘭足球聯賽踢波嘅非英藉球員，不過希加斯淨係效力過富咸1場咁大把，兼且喺嗰次唯一一場比賽入咗1球之後，就轉咗去當時非職業嘅德威治足球會（Dulwich Hamlet）。

亨利羅禮士（Henry Norris），1903-1908年富咸足球會嘅主席

喺早期，球會主席係一位叫做亨利羅禮士（Henry Norris）嘅商人兼政治家，而間接上亦都因為呢個人，令到富咸同區死敵車路士另起爐灶，搞起咗。當其時另一位叫做吉士米爾斯（Gus Mears）嘅商人諗住向羅禮士提出建議，就想富咸借用史丹福橋球場嘅土地用嚟做新主場，但係因為經濟問題，羅禮士唔受呢個建議，令到米爾斯決定自己搞另一支球隊去用史丹福橋球場嘅土地，而呢支球隊就係日後嘅車路士足球會。1910年，羅禮士同時做埋阿仙奴嘅球會主席。1926年，富咸做咗全英國首支賣熱狗嘅足球會。而嗰時1920年代嘅富咸亦都有幾位出名嘅國家隊成員，包括連奥利華（Len Oilver）同埋歐拔巴拉特（Albert Barrett）。

富咸落去丙級南部聯賽之後，頭3季嘅表現可以話係中上，但未夠班上返去乙級，分別排22支球隊入面嘅第5、第7同第9，去到1931-32球季終於出現轉機，富咸終於贏到丙級南部聯賽嘅冠軍，升班去返乙級聯賽，喺嗰季甚至試過以10-2大炒托基聯足球會（Torquay United），全季以24勝9和9負，埋單57分，42場足足攻入咗111球。翌年，1932-33球季作為富咸而重返乙級嘅首季，差少少就可以實現兩連升，上到甲組聯賽，喺嗰季排第3位，屈居熱刺同埋史篤城之後，以5分之差失落升班席位。然而富咸之後喺聯賽嘅表現唔上唔落咁，直到二戰之前都留班喺乙級聯賽，不過1935-36球季呢支球隊喺足總盃交到貨仔，再一次打入到準決賽。1936年嗰時就快德奧合併，而球隊就同當時嘅奥地利踢咗場友誼賽，雙方以1–1握手言和。1938年10月8號，富咸主場迎戰米禾爾嘅一役入面，卡雲農舍球場迎嚟咗史上最高嘅入場人數，錄得49,335人次。

隨住1939年二戰爆發，本身全國性嘅聯賽同盃賽無辦法喺戰時環境下繼續搞落去，於是乎足球聯賽暫時分咗做幾個地區聯賽，而盃賽方面就分別搞咗個足球聯賽戰爭盃（Football League War Cup）同埋倫敦戰爭盃（London War Cup）。富咸嘅主場卡雲農舍球場，同好多其他球隊嘅主場一樣，亦都攞咗去搞青年預備役嘅軍隊訓練。二戰完之後，足球聯賽正式喺1946-47球季開返。喺賽事恢復3季之後，亦即1948-49球季，富咸終於喺乙組聯賽以全季24勝9和9負，埋單57分（值得一提，當季成績同之前提到17年前嘅1931-32球季，升班去乙組嗰季完全一樣）首奪乙級聯賽冠軍，隊史首次升班去甲級聯賽。1948年，隊內一位叫做莊福士屈臣（John Fox Watson）嘅球員轉會去皇家馬德里，係首批轉會去國外豪門球會嘅英國球員之一。

1949–1970年，甲級聯賽嘅時光

不過，富咸升到去甲級聯賽之後成績唔見得人，頭兩個球季分別只係喺22支球隊排第17同第18位。甚至喺再下一個嘅1951-52球季，呢支球隊就已經瀨哂嘢，42場比賽只係贏到8場，排名墊底，3年嘅首次甲級聯賽生涯就咁玩完。不過喺1951年5月20號，富咸首次嚟到北美踢波，當日係喺加拿大嘅蒙特利爾市入面嘅迪洛里米耶球場（Delorimier Stadium），同蘇格蘭嘅球隊些路迪打表演賽，有29,000人次入場。

1958年富咸球隊陣容，前排左邊第4位係富咸當家球星莊尼希施（Johnny Haynes）。

莊尼希施（Johnny Haynes），呢位稱號叫「富咸先生」（Mr. Fulham）同「大師」（The Maestro）嘅當家球星，好有可能係富咸足球會史上最威水嘅人物 。當時希施喺1950年以學徒身份加入富咸，過咗一啲日子之後，就喺1951年嘅節禮日（亦即係Boxing Day）喺主場對陣修咸頓嘅比賽上首次上陣。雖然嗰季之後富咸從甲級降咗班，但希施一踢就喺富咸踢足18年，上陣657次，兼且破咗唔少球會嘅其他紀錄，佢最後一次代表富咸嘅比賽係喺1970年1月17號。佢亦都被認為係隊史上最出色嘅球員 離開富咸之後嘅希施無再踢英格蘭嘅球會，而係去咗南非嘅杜班城球會（Durban City F.C.） 佢喺英格蘭國家隊上陣過56次，當中22次做埋隊長。而多數都係喺佢為富咸打緊乙級聯賽嗰陣畀英格蘭徵召入國家隊大名單。可惜去到1962年，希施喺黑池遇上交通意外而受傷，而佢覺得自己操唔返到意外前嘅水準，因而失落咗喺1966年FIFA世界盃上陣嘅機會，甚至因為嗰屆咁啱英格蘭鸁咗世界盃，就咁同捧盃嘅機會失之交臂。2005年，希施因為再次遇上交通意外而過生，球會為咗紀念佢，就將主場嘅史提芬尼治路看台（The Stevenage Road Stand）改名做莊尼希施看台（The Johnny Haynes Stand）。

富咸喺1957-58年英格蘭足總盃有靚表現，入咗準決賽，亦都係希施生涯入面最接近捧盃嘅一次，而球隊面對住上個月遭受慕尼黑空難重創嘅曼聯，亦都係富咸喺盃賽首次遇到嘅甲級球隊，雙方先以2-2和波，之後嘅重賽就以3-5不敵曼聯嘅畢士比寶貝殘軍。不過喺呢次失落嘅翌年，富咸喺1958-59賽季成功奪得乙級聯賽嘅亞軍，連同當屆冠軍錫周三，雙雙升班去甲級聯賽。同時一位叫格拉咸萊格（Graham Leggat）嘅蘇格蘭翼鋒都喺1958年加入球隊，萊格亦都好有料，喺代表富咸嘅277場比賽入面，入咗134球，喺富咸歷史射手榜入面排到去第5名。1959-60球季，作為重回甲級聯賽嘅首季，富咸最終以17勝10和15負，44分嘅成績排喺聯賽第10位，亦都係呢支球隊史上聯賽排名最高嘅賽季，而呢項紀錄要數到去2003年至2004年英格蘭超級足球聯賽先打破到，而富咸喺嗰季英超排咗喺第9位。可惜好境不常，雖然1962年球隊再一次闖入4強，但係未威夠嘅富咸喺甲組聯賽表現就回哂塘，又變返下游水準，長期處於15-20名之間，仲好幾次差啲降埋班。不過呢個時候雖然成績曳曳地，但主場卡雲農舍球場嘅入場入次已經去到30,000人以上 。

1960年代中後，富咸已經係甲級護級大戰嘅常客，兼且有幾次都差啲瀨嘢降班，不過期間球隊為咗博命上岸，而打出唯數不多嘅高光表現，亦都收到唔少嘅尊重。最出名嗰一次莫過於1965-66球季，當時去到1966年2月26號朝早嗰陣，富咸頭29場只係得嗰15分墊底，好多人以為呢隊波實死硬，無力回天，一定會降班。只不過喺剩13場比賽奇蹟咁贏咗9埸，和咗2場 （13場攞咗足足20分），最後埋單35分嘅富咸，以2分之差掹掹緊護級成功，排第20位，笑到最後。奈何上得山多終遇虎，1967-68球季嘅富咸表現衰到貼地，成季42場嘅甲級聯賽只係贏得嗰10場，降班已成大局，亦都代表住呢次9年嘅甲級時光又告一段落。點知屋漏偏逢連夜雨，喺隔年嘅乙級聯賽居然甩碌，成季贏得7場咁大把，神仙難救嘅富咸遇上兩連降，喺1969-70球季一度要落到去打丙級聯賽，亦都展開咗球隊嘅浮沉時期。

1970–1994年，甲級以外嘅浮浮沉沉

1987年嘅卡雲農舍球場，嗰時仲有企位。

1987年，好多富咸球迷衝哂落球場，以抗議當年諗住拆走卡雲農舍球場嘅計劃。

落入丙級聯賽嘅富咸，僅僅2季過後就喺1970-71球季攞到丙級聯賽亞軍，重回乙級聯賽，之後喺1972-73球季富咸被邀請去踢英意盃，而對手分別係意大利嘅科木、羅馬、拖連奴同埋博洛尼亞，結果4場全部和哂波。1970年代中，呢個時候領隊叫做艾力史托（Alec Stock），富咸喺佢帶領之下，簽咗好多勁嘅大牌球員，包括艾倫梅利（Alan Mullery）同埋波比摩爾（Bobby Moore）。而喺1975年，富咸迎嚟咗隊史目前唯一一次嘅足總盃決賽，此前呢支球會已經試過5次喺4強止步，而喺溫布萊球場搞嘅1974-75年英格蘭足總盃入面，富咸面對住當時位於甲級嘅韋斯咸，最終輸咗0–2，屈居亞軍，雖然攞到來屆英蘇盃（Anglo-Scottish Cup）嘅參賽資格，不過富咸喺決賽上再一次撻Q，而呢一次係以0-1輸咗畀米杜士堡。

1976-77球季，當時英格蘭嘅大牌球星佐治貝斯（George Best）曾經為富咸上陣過47次，而喺1960年代曾經喺母會富咸青訓升過上一線隊嘅洛迪馬殊（Rodney Marsh）亦都喺同一季以租借形式回歸球隊，但佢只係出場咗16場。雖然富咸喺呢幾個球季一直處於乙級聯賽，但呢段時期依然畀人覺得係球隊史上最成功嘅時期之一。

不過，喺1979-80球季，富咸喺42場比賽入面淨係贏11場，再一次降班落去打丙級聯賽，呢件事亦搞到喺1980年10月，當時嘅領隊波比甘保（Bobby Campbell）被炒魷，由馬琴麥當奴（Malcolm Macdonald）接手。呢位領隊喺1980年到1984年執掌嗰陣，都引入咗好多有料嘅球員，幫球隊砌咗一支實力好高嘅陣容返嚟，呢啲球員包括雷候頓（Ray Houghton）、東尼基爾（Tony Gale）、保羅柏加（Ray Houghton）保羅柏加（Paul Parker）、格里佩頓（Gerry Peyton）同埋雷利文頓（Ray Lewington）等等，並且成功喺1981-82球季升返上乙級作賽。只不過，遺憾嘅係，就喺升班前嘅幾個星期嗰陣，曾經喺1980年到1981年效力過富咸嘅後衛戴夫基文迪（Dave Clement）因為憂鬱症而自殺，令球隊嘅升班蒙上咗陰影。

1980年，富咸都有起到一支欖球隊，「富咸欖球聯賽隊」（Fulham Rugby League Football Club），亦即係家下嘅倫敦野馬隊（London Broncos），初初諗住參加欖球聯賽幫球隊撈下油水咁，而欖球隊亦都用本身嘅卡雲農舍球場嚟做主場，喺加入欖球乙級聯賽之後，4年之內欖球隊做咗升降機，經歷過兩升兩降之後，到頭嚟仍然留咗喺欖球乙級聯賽，甚至搞到球會蝕錢蝕到入肉。於是乎喺1984年，富咸足球會班高層正式放棄繼續丢錢喺欖球隊上面，而欖球隊亦都脫離球會，自成一角，繼續獨立運營。

1978年，富咸簽入戈登戴維斯（Gordon "Ivor" Davies），喺佢兩度效力呢支球隊期間，一共入咗178球，成為咗隊史最佳嘅神射手，而呢項紀錄至今都仲未被破到。1982-1983賽季，富咸喺當季嘅收官之戰作客打比郡，比賽去到88分鐘嗰陣，富咸仲係落後緊0-1，但之後因為有球迷衝咗落球場，搞到比賽焗住腰斬。只不過離奇嘅係聯賽當局之後，並無安排返重賽又或者補賽繼續打埋剩低嘅時間（因為法定時間未完，仲有幾分鐘），反而直接判富咸全場輸0–1。於是乎，富咸最後因為差呢1分，無緣升班。而且，球隊面臨債台高築嘅困境，亦令到成績開始唔掂，1986年賽季之後已經淪落到要去丙組聯賽到踢。1987年，富咸甚至諗住去同昆士柏流浪呢支球會合併，呢個唔理智嘅舉動令球隊差啲散班。好在當時嘅著名足球評述員兼前球員吉米希爾（Jimmy Hill）極力阻止呢件事發生，佢成立咗新公司令球隊得以維持運作。同年，喺英格蘭錦標（EFL Trophy）對陣艾迪索特足球會（Aldershot Town F.C.）嘅賽事入面，到互射十二碼階段，雙方足足互射28次先定到勝負，打破咗互射十二碼最多嘅紀錄，只不過呢個紀錄卒之喺2024年嘅英格蘭聯賽盃入面被打破，當時球隊係面對住英冠嘅培士頓，互射咗足足31次。

1992年英超開鑼，22支球隊自立門戶，脫離英足總原先嘅聯賽系統，令到富咸喺新制之下「升班」到乙級聯賽（從英丙變成英乙，亦即第3級）。點知喺1993-94年賽季表現瀨哂嘢，僅僅排尾四，又降返落去丙級聯賽（第4級），降級之後伊恩班霍治（Ian Branfoot）被任命做新領隊，希望拯救到處於水深火熱之中嘅球隊。

1994–1997年，歷史最低谷

可惜，即使喺班霍治帶領之下，富咸依然無力回天，墮入深淵，喺英丙嘅頭2季，分別排第8同第17，後者更加係富咸史上最低嘅聯賽排名，喺1995-96球季經歷史上最低谷之後，班霍治卒之被管理層燉冬菇，佢唔做領隊之後，短暫留咗喺球會負責其他職務。1996年2月，米奇阿當斯（Micky Adams）成為咗球員兼領隊，並且成功逆天改命，令球會避免陷入降班漩渦，兼且下個賽季甚至成功帶領球隊攞到聯賽亞軍。嗰季富咸其實同冠軍嘅韋根足球會同分（87分），甚至得失球差（+34）係好過韋根（+33）嘅，但至於點解富咸唔係冠軍，就係因為嗰時嘅聯賽唔再用之前嘅得失球差作為第二優先（第一優先自然係總分）去決定排名，而係用咗總入球數，因為富咸嗰季淨係入72球，少過韋根嘅84球，因而失落冠軍。而一切嘅「罪魁禍首」要數到富咸球會主席吉米希爾（Jimmy Hill），因為佢喺1992年提議應該用總入球數取代得失球差去計名次，而當時聯賽嘅其他球隊都支持佢呢個提議，希爾本人亦無諗到呢件事會搞到富咸無咗個冠軍，不過依然都升班成功，重返英乙。

1997–2001年，法耶茲入主

穆罕默德法耶茲（Mohamed Al-Fayed），球會前任班主

1997年夏次，埃及商人穆罕默德法耶茲（Mohamed Al-Fayed）透過比爾麥迪文（Bill Muddyman）嘅麥迪文集團（Muddyman Group），以6,750萬英鎊收購球會，入主富咸，展開咗升超之路。呢位主席決定為球隊實施雙管理制度，由雷韋健士（Ray Wilkins）接替阿當斯作為領隊；奇雲基瑾（Kevin Keegan）作為首席運營總監 ，並且希望二人嘅「夢幻組合」，可以令當時處於英乙中游（第3級）嘅富咸能夠確保喺5年之內完成升超嘅偉績。不過去到1998年5月，韋建士因為喺球員選擇問題上出現分歧而選擇離隊，於是乎就由奇雲基瑾去全權負責返成支球隊。基瑾喺之後嗰一季以110萬英鎊從西布朗簽入保羅佩茨索利多（Paul Peschisolido），呢位加拿大前鋒的確有料到，入咗13球，連同隊長基斯高文（Chris Coleman）幫助富咸喺46場英乙入面豪取101分，以極大嘅優勢奪冠，升上英甲（第2級）。值提一提嘅係，基斯高文嘅身價當時喺英格蘭頭兩級聯賽（英超、英甲）之外嘅入面係最高嘅。

1999年，基瑾因為轉去執教英格蘭國家隊而離開球會，於是領隊就由保羅布拉切韋爾（Paul Bracewell）接任，只不過隨後嘅2000年，本來季初形勢一片大好嘅富咸，因為後繼無力，最後完季埋齌只係排到第9。於是喺同年3月，布拉切韋爾被炒魷，由法國嘅讓泰簡拿（Jean Tigana）接任，佢隨後引入咗好多有潛力嘅新星，甚至包括埋一位好出名嘅法國前鋒沙夏。2000-01球季，泰簡拿成功喺46場嘅英甲入面再次豪取101分，斬獲英甲冠軍，隊史首次升上英超，亦都係自1968年之後再次征戰英格蘭最頂級嘅聯賽，而升班巡遊就喺區內嘅富咸宮路（Fulham Palace Road）到搞，揸住部開蓬巴士慶祝。可惜嘅係，基斯高文亦喺呢個賽季遇上車禍，提早收咧，要抖一年，但之後因為依然無辦法完全好返，高文喺2002年宣佈掛靴。不過隨後佢就開始擔任富咸嘅教練組成員，之後仲做埋領隊。雖然喺法耶茲入主以及隨後嘅升超之路入面，球會經歷咗好多陣容上嘅轉變，不過一位叫辛戴維斯（Sean Davis）嘅球員，係唯一一位代表富咸踢哂4個級別聯賽（英丙、英乙、英甲、英超）嘅球員。

2001–2007年，英超，初來乍到

富咸（白衫）主場對陣樸茨茅夫（藍衫）嘅比賽，相入面嘅看台係默史密夫看台（Hammersmith End）。

2007年12月15號，富咸主場對陣紐卡素賽前，做咗一分鐘嘅默哀儀式，以紀念前球員占蘭利過身。

首次踏足英超嘅富咸，喺2001/02年度處子賽季表現的確無得彈，全季以10勝14和14負，以44分排到第13。不過富咸亦都係是踏入21世紀之後，直到2022年企位恢復之前，唯一一支喺英超主場入面擁有企位區域嘅球隊，因為喺發生希斯堡慘劇（Hillsborough Disaster）之後所提出嘅泰萊報告（Taylor Report）入面講明英超唔准有任何企位，所以升超之後要喺3年嘅時限入面完成球場嘅座位改造工程，將企位改哂返做全座位。因應工程，喺2002-03同2003-04呢兩個球季，富咸要同昆士柏流浪共同同一個主場，亦即係洛夫特斯路球場（Loftus Road）。不過喺共用洛夫特斯路球場期間，法耶茲將球會本身嘅主場，卡雲農舍球場用地嘅優先發展權賣咗畀一間地產商，而呢單嘢畀人爆咗出嚟之後，令唔少球迷都驚富咸會唔會自此返唔到歸。

2002-03球季，征戰英超嘅第二年，因為富咸表現好麻麻，大部分時候喺聯賽下半版掙扎，於是乎球會主席法耶兹已經同領隊泰簡拿講明唔會續約，但去到聯賽最後5輪嗰陣，法耶兹決定直接開刀，即炒泰簡拿，改由基斯高文臨時領軍，嗰時富咸排緊第15，揸住38分喺手，領先降班區7分，理論上仲有些微降班風險。不過好在喺高文成功喺最後5場比賽攞到10分，唔駛降班之餘，仲以第14完季。喺同年夏天，高文正式做領隊之後，雖然季前分析話高文仲未夠料去教英超，好有可能會搞冧檔，降班收場，面對住呢啲壓力，高文反而成功打出身價波，喺嗰季富咸以14勝10和14負，以52分排到第9，仲創造埋當時隊史嘅聯賽最高排名。倘若富咸唔係因為財政壓力，焗住要以當時隊史最高轉會價1,300萬鎊賣走沙夏去曼聯嘅話，成績甚至有機會再上一層樓。

2002年嘅圖圖杯，係呢支球隊喺歐戰嘅地標戰。而富咸喺當中亦都順利殺入決賽，而決賽對手係意甲嘅博洛尼亞，喺兩回合嘅決賽入面，球隊喺首回合作客以2–2逼和博洛尼亞；之後返主場由稻本潤一上演帽子戲法，協助球隊以3–1撃敗對手，並以總比數5–3，連同另外兩支球隊馬拉加同埋史特加一齊贏當屆嘅圖圖杯，亦都係隊史嘅首個歐洲獎盃。

而球隊作為圖圖杯冠軍，亦都有來年嘅歐洲足協杯外圍賽第一圈嘅參賽資格，只不過喺對陣當時喺德甲嘅哈化柏林嗰陣，以總比數1–2失利，遺憾喺第三圈就被出局。

2004年，阿耶兹指控前領隊泰簡拿喺之前買球員嗰陣穿櫃桶底，仲私底下同啲轉會球員傾掂數，搞到球會洗多咗700萬鎊，不過呢場官司最後判球會敗訴，單案就咁收場。

高文喺2004-05同2005-06球季入面都交到貨，分別帶領球隊排第13同第12。當中最威水嘅時刻要數到2006年3月20號嘅一場西倫敦打比 （West London Derby）。嗰日，富咸主場對陣車路士，當時對手藍軍係英超防守最勁嘅球會，甚至喺近2年半淨係輸過2場，比賽好難打，不過富咸最後竟然成功爆冷，以1–0贏咗當季冠軍車路士，的確好勁啾。然而高文喺富咸嘅最後一個球季，亦即係2006/07球季表現唔夠好，球會再一次陷入降班漩渦。於是，喺2007年4月10號，高文直接被炒魷，而領隊職務就由當時北愛爾蘭國家隊嘅教頭羅利山齊士（Lawrie Sanchez），臨時頂上。喺山齊士帶領下嘅富咸，雖然最後5場比賽攞得嗰4分，形勢好危危乎，只不過喺倒數第2場，面對當時跌哂watt嘅利物浦，成功喺主場以1–0贏波，全袋3分，驚險上岸。

曼聯前鋒雲佩斯射自由球嗰陣，富咸球員排好哂人牆。

2007年嘅卡雲農舍球場

2007–2010年，鶴臣嘅轉型時代，歐霸決賽

當時富咸嘅領隊萊鶴臣

經歷完2006-07球季嘅驚險護級之後，排第16嘅成績令球會高層意識到球隊陣容出咗事。於是喺2007年嘅夏天，球會高層決定開大水喉，幫山齊士洗大手筆簽咗好多球員，希望可以補強返個陣容，只不過事與願違，開季後嘅表現可以話係災難級，5個月居然只係贏到2場，跌埋落降班區。2007年12月21號，球隊喺主場以0–1輸畀紐卡素之後被炒魷。而萊鶴臣（Roy Hodgson）喺12月28號被任命做新任領隊，並喺30號正式揸掌，而2日之後嘅新年，正正就係開冬季轉會窗嗰陣。

只不過鶴臣喺領軍初期，表現依然低迷，難求一勝，要去到2月初喺主場對阿士東維拉嘅比賽中，靠占美保拿特（Jimmy Bullard）嘅一球十二碼，先至為球隊打開到勝利之門。只不過富咸喺之後嘅比賽又輸到失魂，4月頭嘅英超第33輪，喺主場面對護級對手新特蘭嘅六分生死戰入面輸咗個1–3，足足距離安全區差6分。喺賽後記者會入面，鶴臣已經眼濕濕，而一班球評都覺得富咸嘅護級機會好微，好難番生。雖然傳媒一致都唔睇好，但係鶴臣依然堅信球隊可以逃出生天。富咸護級嘅轉捩點就發生喺英超最後第3輪，當時係作客曼城，上半場完嗰陣，富咸表已經輸緊0–2，如果全場完都無辦法攞到分，就會即刻玩完，提前宣告降班。不過半場替入嘅迪奧曼西卡馬拉（Diomansy Kamara）呢一次幫球隊創造奇蹟，下半場球隊嘅表現脫胎換骨，喺卡馬拉嘅梅開二度之下，富咸完場以3–2反cup曼城，全袋三分。下一場富咸喺主場面對護級份子伯明翰嘅比賽入面，亦都順利以2–0贏波，掌握到護級嘅主動權。

2007-08球季嘅最後一輪，暫時排第17嘅富咸同第18嘅雷丁同得33分，當中球隊嘅得失球差（-23）係領先緊雷丁嘅（-29），而排第19嘅伯明翰就落後緊1分。富咸如果作客贏到備戰緊足總盃決賽嘅樸茨茅夫，就一定可以上岸，至於雷丁係作客對已經篤定降班嘅打比郡，而伯明翰就係主場對布力般流浪。 喺法定時間得番15分鐘嗰陣，富咸同對手依然互交白卷，但護級對手伯明翰同埋雷丁就領先緊，亦即係話如果富咸再唔入波嘅話，就好大機會死梗。去到76分鐘，保拿特嘅自由球搵到丹尼墨菲（Danny Murphy），墨菲嘅一記頭錘，打入咗球隊嘅致勝球，直接殺死比賽。作客嘅球迷慶祝到好癲。鶴臣喺無人睇好嘅情況下，幫助富咸死裏翻生，護級成功，當中打破咗幾個球會紀錄，確立咗佢日後喺球會歷史入面嘅地位。可惜嘅係，當季球隊喺公平競技榜以0.8分，輸咗畀煞科戰入面作客被米杜士堡8–1大炒嘅曼城，無得通過呢項機制參加下屆嘅歐霸。

2008-09賽季，富咸全季以14勝11和13負嘅姿態，喺英超最終排第7，係球會有史以嚟最高嘅聯賽排名，而53分亦都係當時嘅球會最高英超積分紀錄。而來季嘅歐霸外圍賽，亦都係球會史上第二次攞到歐戰資格。

2009-10賽季，無可爭辯，呢季絕對係球會歷史入面最成功嘅賽季。富咸喺足總盃入面連續第二年晉級準決賽，而聯賽方面雖然喺最後數輪比賽已經落哂副選，備戰歐霸，最後都排到第12，完全無護級壓力。不過當季最深刻嘅，咁一定係歐霸嘅神奇之旅，呢支唔被睇好嘅球會，居然令人大跌眼鏡，一次又一次大步檻過咁殺入決賽。富咸喺小組賽階段力壓瑞士勁旅巴素利，以次名出線，32強以總比數3–2擊敗當屆衛冕冠軍薩克達。去到16強面對意甲勁旅祖雲達斯，富咸喺首回合作客先輸1–3，不過次回合返主場，球隊喺先失一球嘅情況下，居然戲劇性咁反cup返4球，以總比數5–4爆冷擊敗祖雲達斯，擠身半準決賽，而呢次嘅「奇蹟一夜」，被好多富咸球迷津津樂道。半準決賽面對德甲嘅禾夫斯堡，富咸喺兩回合入面雙殺對手，準決賽對另一支德甲嘅漢堡，首回合互交白卷，而次回合去返漢堡主場，亦同時係當屆歐霸主場嘅人民公園球場（Volksparkstadion），喺先失一球嘅情況下，再一次以2–1反勝對手，隊史首次打入歐戰決賽，亦都粉碎咗漢堡喺主場捧盃嘅希望。決賽，依然喺人民公園球場，富咸對陣嘅係從歐聯小組賽入面降級轉戰歐霸嘅西甲球隊馬德里體育會。喺法定時間90分鐘入面，雙方以1–1打和，只不過可惜嘅係，加時賽嘅下半場，科蘭嘅入球令富咸最終以1–2飲恨，同獎盃擦身而過。但決賽嘅失利絕對唔可以抹煞富咸喺當屆歐霸嘅神奇表現，而鶴臣亦都當之無愧咁成為當季嘅英超年度最佳領隊。奈何好景不常，完季之後鶴臣被利物浦挖角離開咗球隊。

• 
  2009年12月26號，英超主場對陣熱刺
• 
  2010年英超，對陣韋根
• 
  2009–10年歐霸盃16強嘅「奇蹟一夜」，主場4–1反勝祖雲達斯
• 
  2009–10年歐霸決賽對馬德里體育會

球會表現

富咸喺1907-2026年喺聯賽嘅表現

出面網頁

• 富咸足球會