平息風浪

平息風浪係《聖經》記載耶穌嘅神蹟之一，喺《馬太福音》、《馬可福音》同《路加福音》都有記載。

聖經譯文

「	耶穌上咗船，門徒跟住佢。海突然打起猛烈嘅風暴，令到隻船差啲俾海浪淹沒，但係耶穌瞓着咗。門徒去叫醒佢，話：「主啊，救命呀，我哋就快冇命喇！」耶穌話：「點解咁冇膽呢？你哋嘅信心太細喇」於是佢起身，斥責風同浪，風浪就平靜咗。所有人都好驚訝噉話：「呢個究竟係邊個？連風同海都聽佢話。」	」
——《馬太福音》8章23-27節

「	嗰晚，耶穌對門徒話：「我哋過去對岸。」門徒離開眾人，耶穌已經喺船上，佢哋就請佢一齊去；另外有其他船一齊去。忽然打起大風，波浪打入船度，隻船幾乎滿晒水。耶穌喺船尾度，枕住枕頭瞓咗。門徒叫醒佢，話：「老師！我哋快冇命喇，你唔理咩？」耶穌醒咗，斥責風，向海話：「止息喇！平靜喇！」風就停咗，海面就平靜落嚟。耶穌對佢哋話：「做乜咁冇膽呢？你哋重未有信心咩？」佢哋就好驚，大家都話：「呢個究竟係邊個？連風同海都聽佢話。」	」
——《馬可福音》4章35-41節

「	有一日，耶穌同門徒上船，佢對門徒話：「我哋去湖嘅對岸。」佢哋就開船。船行緊陣，耶穌瞓着咗。湖上突然有一陣狂風，船滿晒水，好危險。門徒去叫醒佢，話：「老師！老師！我哋就快冇命喇！」耶穌醒咗，斥責狂風大浪，風浪就停咗，平靜咗。耶穌對佢哋話：「你哋嘅信心喺邊呢？」佢哋又希奇又驚慌，大家都話：「呢個究竟係邊個？連風同海都聽佢話。」	」
——《路加福音》8章22-25節

概覽

耶穌吩咐門徒夜晚過海去格拉森，係要醫治嗰啲俾鬼附嘅人，可以見到耶穌愛靈魂嘅心。當時已經天黑，有幾個門徒係漁夫，熟悉船隊運作情形，所以話係門徒將耶穌一齊帶去。耶穌身體好攰瞓咗，因為佢係完全嘅人，佢所施行嘅神蹟證明佢亦係完全嘅神。

加利利海係一個四面環山嘅大湖，清涼嘅山風從群山嘅峽口撲向湖面，激起巨浪；耶穌同門徒都知道係好危險，依然過去。對門徒嚟講係佢哋嘅本行，有咩風浪未見過，所以，當善於航海嘅門徒見到隻船就快沉，只有向耶穌求救：「你唔理咩？」。耶穌用斥責嘅口吻叫海平靜落來，海就立即風平浪靜；善於航海嘅門徒知道呢個情況並唔係出於自然。