康樂棋 (撞擊)
呢篇文講撞擊康樂棋。想搵用棋盤捉嘅康樂棋嘅話，請睇康樂棋 (棋盤) 。
康樂棋係一種技巧性嘅撞擊遊戲，用支杆篤隻攻擊棋將對方嘅棋打入四個角嘅竉度，玩法有啲似桌球。
康樂棋枱
[編輯]
康樂棋枱係正方形嘅，四邊有一寸高嘅木框圍住，枱嘅四個角分別有四個圓竉。喺每個竉旁邊各有一個白圈作為發球區，發球區之間亦有四條直線連住，形成正方形。康樂棋枱嘅設計上係可以調校高度嘅。
遊戲比賽規則
[編輯]- 康樂棋包括有紅色棋同黑色棋各16隻，雙方並分別有1隻棋用嚟攻擊。
- 開始嗰陣，雙方嘅16隻棋都要貼住各自嘅圍欄平放，14隻喺中間，兩隻喺角度。
- 參加者先將自己隻攻擊棋打向中心嘅白圈度，最近白圈嗰個開始打先。
- 參加者要用自己隻攻擊棋放喺兩邊其中一個發球區內，並將對方嘅棋打落竉度為目標。
- 兩個參加者輪流攻擊對方，最先將對手嘅棋打曬入去竉度嗰個就為之贏。
- 將對方顏色嘅棋射咗入竉度，可以獲得額外多一次射棋機會，無論一次入咗幾多隻棋，都只有一次獎勵機會。
- 如果自己隻攻擊棋跌咗入竉度或飛咗出枱之外，需要罰停一次。不過如果先將對方嘅棋射咗入竉度，就唔需要罰停，亦冇得獎勵打多一次。
小回
[編輯]「小回」係指打嗰陣將對方嘅棋飛咗出康樂棋枱之外。呢個時候，嗰隻棋要放喺枱中間嘅白圈度，對方只可以用反彈嘅方式間接噉打，唔可以直接用攻擊棋打擊。如果白圈裏面有其他並唔係「小回」嘅棋，就將「小回」嘅棋疊喺圈嘅中心。「小回」嘅棋要打咗出圈之外先會變返一般嘅棋。
大回
[編輯]「大回」係指對方嘅棋落咗喺自己棋嘅界裏面或界上面。「大回」嘅棋係需要對方用反彈嘅方式間接噉打走，唔可以直接打擊。
廢子
[編輯]「廢子」係指自己隻攻擊棋未先掂到木框或者對方嘅棋而先直接掂到自己啲棋，嗰隻棋就會係廢子送畀對方，要放入竉度，但係如果攻擊棋先撞向木框再擊中嘅話，就唔需要做「廢子」。