張遠

張遠，網名暱稱「ffaarr」，係中文維基百科嘅維基友，喺臺灣嘅批踢踢BBS就有「哆啦王」、「叮噹王」等稱號。佢嚟自中華民國臺北市，係國立臺灣大學歷史學研究所博士，喺德明財經科技大學通識中心做兼任助理教授。佢主要研究領域係清朝至近代嘅性別同通俗文化，著作有《近代平津滬嘅城市京劇女演員1900－1937》、《清中期北京梨園花譜中嘅性別特質想像》等。

由於經常喺批踢踢上回應同日本漫畫《多啦A夢》有關嘅奇特問題，張遠成為批踢踢上嘅知名人物之一。同時，佢長期參與中文維基百科嘅運作，從事管理員同行政員嘅工作；又長期參與台灣維基媒體協會，兼且喺2018年出任理事長，致力喺中文維基百科社群嘅發展。另外，佢亦係Wikia中文社群發展專員，以及係「哆啦A夢wiki」同「PTT鄉民百科」創辦人之一。佢曾經同「Lon」兩人合作推出《PTT鄉民大百科》一書，介紹批踢踢鄉民嘅流行用語。