彌敦菲臘廣場

彌敦菲臘廣埸嘅主要部分，後面弧形嘅係多倫多市政廳

戶外溜冰場同巨型 ｢多倫多｣ 字樣

拆走咗石地板嘅彌敦菲臘廣場（2023年不夜天藝術節）

彌敦菲臘廣埸（英文：Nathan Phillips Square）係連住多倫多新市政廳嘅廣場，位置喺皇后西街夾卑街西北角。主要部分除咗石板地之外，仲有個戶外溜冰場（熱天嗰陣係水池）同表演用嘅大舞台。有唔少大型節目會喺度舉行，例如新年慶祝活動、多倫多戶外藝術展等等；每年嘅不夜天藝術節亦一定有至少一樣嘢喺呢度或者喺市政廳入面。

除咗主要嘅部分之外，喺西面佢仲有個和平花園（peace garden），北面亦都有個雕塑園（sculpture court），雕塑園入面有邱吉爾像；雕塑園南面邊邊就有兩個牌，紀念因為起呢個廣埸同新市政廳而清拆咗嘅多倫多舊唐人街。

廣場嘅石板地其實係一個模塊化系統，啲石地板每塊都可以獨立拆走，拆咗之後下面有空間可以擺花園、樹或者建築物喺度，原意係等個廣場可以間唔中轉下樣，不過除咗拆嚟攞水攞電之外，根本從來冇拆過，直到2023年嘅不夜天藝術節藝術家 Jenine Marsh 拆咗部分地板畀人睇。