彭氏宗祠 (粉嶺圍)

彭氏宗祠

彭氏宗祠喺香港新界北區粉嶺粉嶺圍北便村，係新界五大家族彭氏嘅家族祠堂，每年嘅二月初二，彭氏族人都會喺宗祠裏面舉行春祭盛典，拜祭歷代祖先。由1979年開始，彭氏宗祠裏面嘅部分地方改咗做粉嶺幼稚園，畀村裏面嘅年幼子弟提供學前教育，到近年粉嶺幼稚園先至關閉。

史

彭氏宗祠初喺明朝萬曆初年（1573年）喺北圍裏面起。到咗清朝道光年間，國學士彭步進見宗祠日久失修，喺道光廿六年（1846年）委託風水先生擇咗吉日，將宗祠搬去北便村而家嘅地址。彭氏宗祠曾經喺光緒十年（1884年）重修，後來又喺1979年重新粉飾。

結構

彭氏宗祠係兩進式建築物，規模雖然細過其他新界五大族圍村嘅家祠，但係建築相當精美，大門左右掛咗楹聯：「商賢世澤 宋史家聲」，正廳就有一座壁龕，分上下一共七層，供奉粉嶺村始祖彭桂以下16世88個祖先嘅神位，正廳右邊供奉「烈子靈牌」，村民叫做「英雄陣」，用嚟紀念為村做事而犧牲同有貢獻嘅族人。中間係天階，兩邊係廂房同走廊，有斗拱木刻、屋脊上面有「鯉躍龍門」雕飾、花崗石樑柱、陶塑人物、精緻嘅壁畫。彭氏宗祠已被評為一級歷史建築受到法例嘅保護。

• 
  正門
• 
  鋪首
• 
  斗拱
• 
  木刻

出面網頁

• 彭氏宗祠（粉嶺圍）