石重貴
(由後晉出帝跳轉過嚟)
石重貴（914年—974年），係後晉第二位皇帝，亦係後晉最後一個皇帝，942年到946年在位，佢無廟號，史稱晉出帝。
石重貴係後晉高祖石敬瑭個姪。942年，石敬瑭過身，石重貴繼位。944年改用開運年號。
石重貴聽咗大臣景延廣嘅話，放棄高祖嗰陣對契丹恭順嘅政策，對耶律德光稱孫而唔稱臣，之後兩國關係惡化。天福九年（944年）正月契丹軍開始入侵，三年間雙方各有勝負。開運三年十二月，後晉將領杜重威、李守貞、張彥澤帶埋軍隊向契丹軍投降，契丹派張彥澤帶領先頭部隊進攻開封，947年1月石重貴投降，後晉滅亡。耶律德光貶石重貴做負義侯。[1]947年農曆二月，耶律德光將契丹改名做大遼。[2]
後晉滅亡之後，劉知遠響太原稱帝，建立後漢，佢喺遼軍撤退之後佔據咗中原地方。石重貴畀遼軍帶返遼國，留響遼國度，直至病死。《舊五代史》引用范質《晉朝陷蕃記》話，石重貴「凡十八年而卒」，即係喺北宋乾德二年（964年）去世；石重貴墓誌銘（而家收埋喺遼寧省博物館）就話，石重貴響遼保寧六年（974年）農曆六月十八日過身。