德古拉

《德古拉》（英文：Dracula ）係愛爾蘭作家伯蘭史杜卡（Bram Stoker）喺1897年出版嘅哥德式恐怖小說，主要係講吸血鬼。

古仔

有個啱啱考到律師牌嘅英國仔喬納森哈克（Jonathan Harker），為咗幫德古拉伯爵（Count Dracula）喺倫敦買樓，特登去咗佢喺喀爾巴阡山（Carpathian Mountains）嘅古堡。伯爵話過唔好四圍行，但哈克夜晚偷偷出去，遇到三個女吸血鬼；德古拉出現救咗佢，再將一個細路仔綁喺袋入面丟畀女吸血鬼。六個禮拜之後，德古拉走咗，留低哈克畀女吸血鬼。哈克逃出古堡，最後癲咗，喺布達佩斯（Budapest）一間醫院昏迷咗。

德古拉帶住有古堡啲泥嘅箱，搭「迪米特」號（Demeter）船去英國。船長日誌寫住船員一個接一個失蹤，到最後只剩低船長自己，綁喺舵盤度維持航向。船喺惠特比（Whitby）擱淺嘅時候，有人見到一隻好似大狗嘅怪物跳上岸。

露西衛斯德娜（Lucy Westenra）寫信畀好朋友、哈克嘅未婚妻米娜莫瑞（Mina Murray），講自己收到三個男人嘅求婚：希沃德醫生（Dr John Seward）、昆西莫里斯（Quincey Morris）同亞瑟荷姆伍德（Arthur Holmwood）。露西選咗亞瑟，但大家仍然係朋友。米娜去咗惠特比同露西度假，露西開始夢遊。德古拉喺惠特比登陸之後，開始跟蹤露西。米娜收到信，知未婚夫失蹤同病咗，於是去咗布達佩斯照顧佢。露西病得好嚴重；希沃德醫生嘅先生范海辛教授（Professor Abraham Van Helsing）發現佢係俾吸血鬼襲擊，但佢唔講，只話係急性失血。教授喺露西房間擺滿蒜花，又幫佢戴咗條蒜花頸鍊。露西媽媽唔知蒜花可以驅趕吸血鬼，將蒜花拎走。當希沃德同范海辛唔喺嘅時候，露西同佢呀媽被一頭狼嚇到，媽媽心臟病發去世，露西亦都跟住死埋。露西下葬之後，報紙報導有「美女鬼」喺夜晚跟蹤細路仔，范海辛推斷係露西變咗吸血鬼。希沃德、莫里斯、荷姆伍德同范海辛去咗露西個墓，發現佢真係變咗吸血鬼，於是用樁插死佢，割下佢嘅頭，再喺佢嘴度塞滿蒜花。喬納森·哈克同新婚妻子米娜返嚟，加入對付德古拉嘅行動。

眾人留喺希沃德嘅精神病院，班男士開始追捕德古拉。范海辛終於講明吸血鬼只可以喺自己家鄉嘅泥度休息。德古拉同希沃德嘅病人倫菲爾德（Renfield）有聯繫，倫菲爾德係個癡咗嘅人，專門食蟲蟻吸收佢哋嘅生命力。德古拉知咗眾人嘅計劃之後，利用倫菲爾德入咗精神病院，偷偷哋襲擊咗米娜三次，每次都吸佢嘅血，最後一次更強逼米娜飲佢嘅血，令米娜死後會變成吸血鬼，除非德古拉被殺。眾人發現德古拉喺倫敦不同地方分散咗佢載滿泥嘅箱。消滅咗大部分個箱之後，眾人喺皮卡迪利（Piccadilly）嘅屋企未能困住伯爵，並且得知德古拉帶住最後一箱泥逃返喀爾巴阡山脈嘅古堡。范海辛利用催眠術，透過米娜同德古拉微弱嘅心靈連繫，追蹤德古拉嘅行蹤，眾人跟住追去。

喺羅馬尼亞嘅加拉茨（Galatz），眾人分頭行動。范海辛同米娜去咗德古拉嘅古堡，教授消滅咗三個女吸血鬼。哈克同荷姆伍德喺河度追德古拉嘅船，莫里斯同希沃德喺陸路追趕。德古拉嘅泥土箱被吉普賽人裝上馬車，眾人襲擊並擊退咗吉普賽人。哈克割下德古拉嘅頭，莫里斯插死佢嘅心臟，德古拉化成灰塵，米娜嘅吸血鬼詛咒亦解除。莫里斯喺同吉普賽人嘅戰鬥中受重傷，最後傷重不治，但係死前知道米娜得救，可以安心而去。七年後，喬納森哈克嘅筆記提到，哈克夫婦有咗個仔，為咗紀念朋友，將佢命名為昆西。