投降點

投降點（Capitulation）係投資市場既一個學名，係指市場交易參與者（market participants）因為市場價格長期下跌，慢慢陰乾，陰乾到某一點，對市場完全失去信心，接受損失既現實，清倉佢哋手上既股票，認輸離場，減少進一步既損失。

投降發生既時間，受到市場參與者有無更好既投資選擇，例如，由2023年中開始，歐美既利息上升到5厘以上，喺高息之下，如果某一個股票市場表現不濟，加上投資者認為市場氣氛會轉差，部分市場參與者可能寧願全數沽出嗰個市場既股票，將啲錢放喺銀行，收豐厚既定期利息。

每個投資者對唔同市場既投降點都唔同，有啲投資者風險意識高啲，有啲低啲；而市場既投降點就係所以市場參與者既加權投降點既平均值。去到市場既投降點，因為市場既恐慌，資產價格大跌，即使一啲睇好個市既投資者，當損失大到佢哋無法承受既時候，佢哋最終被迫投降，賣出佢哋所持有既股票，因為連睇好既都要賣，令到價格進一步下跌，然後緩慢反彈。喺呢個過程裏面，個個投資者都蝕錢，越早睇淡蝕得越少；越係大好友，蝕得越多。

術語來源

投降（Capitulation）原本係軍事術語，意思係向交戰對方放棄（give up）或者屈服（surrender）；呢個術語俾金融業借用，用嚟描述某個金融市場既參與者，因為擔心價格會進一步持續下跌，所以放棄已有虧損既多頭頭寸。喺投降既最後階段，市場參與者可能會唔問價，恐慌性拋售手上持有既金融產品金融產品，令到價格進一步下跌。

市場投降

當市場價格下跌既時候，好多投資者既第一反應係死都唔放，堅持持有，等個價升返上去。但係，如果個價持續下滑，只要下滑既時間足長，令到投資者對繼續持有可能引起更大損失既擔憂超過價格回升既希望，佢哋就會投降（capitulation）；當有足夠多既投資者到達呢個投降臨界點，然後賣出既時候，就會出現市場投降（market capitulation）。

投降原因

如果係股票市場，投降通常發生喺股價持續下跌期間，好可能係因為恐懼（fear）、不確定性（uncertainty）同埋懷疑（doubt），即係所謂既「FUD」引起既。呢啲 FUD 所引起既投降，可以係對個別股票既，一般都係因為公司既負面新聞引起既，例如：1980年代既佳寧；可以係行業既，一般係行業環境既轉變，好似係放鬆管制（deregulation），例如：從140元一直投降到4.5元既「八號仔」；亦可以係地區性既，一般係政治環境既轉變引起既，例如恒指從高位三萬幾點落咗嚟；更可以係成個金融產品既，一般係宏觀環境轉變，例如：2008年既次按令到全球股票市場都出現恐慌性拋售，幾乎影響全世界既股票市場。

投降交易

理論上，投降既結束可能會帶來逢低買入既好機會，尤其係因為市場氣氛突然由恐懼（fear）變成恐慌（panic），喺呢種情況之下，無實力或者蝕到肉既市場參與者都已經沽清晒佢哋手頭上既股票，繼續持有既人都睇好或者帳面上無蝕到。

不過，唔係所以唔係過咗投降點就一定好快觸底反彈，例如日經指數，喺1989年高位，去到1992年好多市場參與者已經投降，所以1992年中見底，不過要去到近幾年，當年投降點前後買貨既投資者，坐咗接近三十年艇，近年先至見返家鄉。