泰國少年困山窿意外

出自維基百科,自由嘅百科全書
(由探鑾洞救援跳轉過來)
Jump to navigation Jump to search
泰國少年困山窿意外
Rescue equipment in Tham Luang entrance chamber (cropped).jpg
喺洞穴入口嘅救援人員同設備
日期 2018年6月23號 (2018-06-23) – 2018年7月10號 (2018-07-10)
地點 Flag of Thailand.svg 泰國清萊府睡美人洞英文Tham Luang Nang Non
坐標 20°22′21″N 99°51′03″E / 20.37250°N 99.85083°E / 20.37250; 99.85083座標: 20°22′21″N 99°51′03″E / 20.37250°N 99.85083°E / 20.37250; 99.85083
起因 強烈季風造成嘅暴雨淹沒山洞
結果 失蹤9日後12位少年同埋教練搵返,[1],最終全部成功救出山窿
死亡人數 1名潛水員

泰國少年困山窿意外喺2018年6月23號發生,泰國清萊府一隊少年足球隊13人喺泰國第4大山窿「睡美人洞」(Tham Luang Nang Non)探險,因為落大雨、山窿水浸而失蹤。泰國政府派咗大班人去搜救,英國美國中國澳洲等國亦有派救援隊幫手。

7月2號,足球隊失蹤9日後,英國潛水員喺山窿好深嘅地方搵到所有失蹤者,個個都冇事。但係撞啱雨季,好難將佢哋全部救出[2][3]

7月8號晚,政府展開第一波救援行動,4個少年甩難。用前後包夾嘅方法,兩個泰國海豹部隊隊員帶一個少年,潛水出洞[4][5]。7月9號,第二波救援行動救多4個少年[6][7]。7月10號,事發第18日,第三波救援行動救埋剩低5個,噉就全部救返晒[8]

被困人員[編輯]

總共13人困喺山窿。其中12人係少年足球隊「野豬隊」(泰文ทีมหมูป่าอะคาเดมี)隊員,年齡介乎11至16歲,仲有1人係25歲嘅教練查塔汪(Ekapol Chanthawong)。

傷亡[編輯]

被困嘅13人最後全部成功救出[9]。但意外造成1名救援人員死亡。

泰國潛水員薩曼古南(Saman Kunan),泰國海豹部隊退役隊員。7月5號佢送氧氣樽入山窿,返轉頭嗰時,半路冇晒氧氣而犧牲。佢嘅死促使泰國軍方重新研究救援方案,避免再有人出事。[10][11]

救援[編輯]

除咗泰國自己,美國軍方、英國澳洲老撾緬甸中國都有派人到現場協助救援[12][13]

失蹤階段[編輯]

  • 6月23號,12名足球隊員同教練喺泰緬邊界清萊府美塞(Mae Sai)嘅體育場練波。練完波,去咗附近嘅森林公園玩。隊員為咗畀同伴生日驚喜,計劃去睡美人洞探險。因為計劃喺山窿逗留比較長時間,佢哋食飽飯之後先出發,帶住蛋糕同零食到睡美人洞探險。點不知當日撞正泰國雨季落大雨,班人因暴雨灌入山窿,走去高處避難,就噉困喺山窿[14]。當晚,有球員嘅家長發覺細路冇準時返屋企,報警搵人。之後,森林公園巡邏人員喺山窿入口發現球隊留低嘅11部單車、1部摩托車以及運動背囊。當晚大約10點,家長向警方報13人集體失蹤[15][16]
  • 6月24號凌晨1點左右,清萊醫院嘅救援隊展開搜救行動。深入山窿探索到4公里左右距離,發現12對涼鞋,估計足球隊全部人走咗入山窿深處,但因為洞內水位上漲而困住。泰國警方缺乏潛水搜救裝備,泰國政府喺24號晚派出海豹部隊支援,並由軍隊接手救援[15]
  • 6月28號,美國太平洋司令部嘅美軍同救生小組抵達現場。除咗搵第啲山窿入口之外,地面亦增加搜救犬同志願小組協助[15]
  • 6月29號,泰國首相巴育占奧差視察救援現場。現場有大約840名士兵、90名特種部隊成員、4架直升機、掘泥機以及第啲救災設備投入搜救行動。[17]有3名搜救人員受輕傷,因為供應照明同抽水機電力嘅電線漏電[18]

搵返失蹤人員[編輯]

  • 7月2號,失蹤9日後,英國潛水員搵返晒成隊少年足球隊,全部倖存。搜救團隊成員包括[12][19][20]
    • Richard Stanton,56歲,英國人,隸屬「南部與中部威爾斯洞穴搜救小隊」。
    • John Volanthen,47歲,英國人,隸屬「南部與中部威爾斯洞穴搜救小隊」。
    • Robert Harper,70歲,英國人,50年潛水經驗。
  • 當地人表示,少年足球隊隊員經常喺練波之後入山窿探險、抖涼,對山窿地形有一定瞭解。今次唔好彩撞到暴雨,雨勢又急又大,佢哋被迫走入更深嘅山窿。佢哋平時都會帶零食同食水入窿,山窿入邊亦有經岩石過濾嘅雨水可補充水分[21]

留守待救[編輯]

  • 7月5號,受困第13日。泰國《民族報》報導,救援行動方案分三階段[22]
    • 第一階段:海軍潛水同搜救專家攜帶食物同救生包進入,陪伴受困足球隊,並對地點進行結構調查。
    • 第二階段:醫師同其他專家進入,提供醫療同相關檢查、協助。
    • 第三階段:提供更多食物,訓練少年潛水,同時不斷抽積水,盡量降低水位。
  • 7月6號,受困第14日。部分受困者體力不佳。醫生發現教練同兩個男仔營養不良而虛脫,但又唔夠膽咁快救佢哋出來,因為佢哋太虛弱[23]。另外,山窿入邊數以百計救援人員做嘢,令氧氣含量驟降,由平時嘅21%跌到15%。救援大隊一方面喺山窿上高嘅森林鑽窿,多啲透氣地方,另一方面鋪設氣管到山窿入邊注入氧氣[23]。泰國海豹部隊退役隊員薩曼古南(Samam Kunan)犧牲。佢幫手將氧氣樽布置出洞嘅路度。薩曼同拍檔帶住氧氣樽前往足球隊受困地點,返轉頭嘅時候,氧氣唔夠,喺距離洞口1.5公里嘅地方昏迷。拍檔發覺佢暈咗喺水度。試過幫佢做心外壓急救,但唔成功,薩曼卒之不幸罹難[24]

救出山窿[編輯]

  • 7月8號,受困第16日,第一波救援行動展開,用咗11個鐘,救出4個細路。
    • 救援策略:原本泰國政府認為應該俾壯健嘅𡃁仔走先,但澳洲醫生哈里斯入洞診斷班𡃁仔嘅健康狀況後,認為孱弱嘅𡃁仔唔拖得,建議俾最孱嘅走先,如果唔係,繼續留喺山窿恐怕會喪命。最後官員採納意見,先救孱仔[25]
    • 救援方式:喺需要潛水嘅路段,兩個潛水員前後包夾,護送受困𡃁仔。行前嘅潛水員背住前進方向來行,噉就能夠望住𡃁仔,並負責揹𡃁仔用嘅氧氣樽。另一個潛水員殿後。另外,為咗𡃁仔情緒安定,事先畀鎮定劑佢哋食[26]
    • 救援時機:泰國軍方決定喺呢日發動救援,因為依據天氣預報,之後會有三四日豪雨,山窿恐怕因為雨水又浸住,錯失最佳時機。而且,當日山窿水位有下降,令部分路段好行啲[27]
    • 呢次行動總共有50名外國潛水員、40名泰國潛水員參與。[28][29]
  • 7月9號,受困第17日,第二波救援團隊,使咗9個鐘,再救出4個𡃁仔[6][30]
  • 7月10號,受困第18日,第三波救援行動,淨係用咗7個鐘就救埋剩低4個𡃁仔同個教練[8][31]

甩難之後[編輯]

頭兩日先救出嘅8個𡃁仔,冇人發燒。佢哋一出山窿即刻戴太陽眼鏡保護對眼,因為佢哋逗留喺黑鼆鼆嘅環境十幾日,對眼無法承受出面日頭嘅強光。幾個𡃁仔體溫偏低。有一個𡃁仔送醫嗰陣心跳頻率偏低。

所有人離洞後,立即送到醫院隔離7日。因為佢哋長期留喺山窿,洞中環境濕冷、昏暗、唔通風,期間亦冇乜點進食,因此必須觀察佢哋有冇感染洞穴相關嘅疾病,譬如有冇俾寄生喺蝙蝠排泄物嘅菌類感染,以及觀察皮膚擦傷同割傷嘅復原狀況。另外,有兩個𡃁仔肺部疑似出現感染症狀,醫院已同佢哋打咗抗生素[32]

家陣有部分人可以同親屬會面,但為咗確保佢哋唔會傳染疾病,佢哋只能夠隔住玻璃見人。或者,親屬必須著防護衣,距離必須相隔兩米[33]

救援困難[編輯]

水位升高同埋潛水能見度降低[編輯]

泰國正值雨季,連日暴雨令山窿水位持續升高,每個鐘可以上升15公分,有啲地方積水深達5米。洞內泥水污濁,增加潛水員救援難度。即使泰國政府調來大型水泵同水管抽水,但水管經常俾泥石樹葉之類嘅雜物堵塞,抽水速度又唔夠落雨水浸快。[18][34]

鄰近農民受抽水影響,抽出來嘅污水排落農田,導致過百位農夫嘅農田同作物謝雞,影響範圍遍及2.2平方公里嘅稻田。[35]

洞穴地形複雜[編輯]

睡美人洞全長十幾公里,係泰國第4長洞穴,全世界最難導航嘅洞穴之一。通道崎嶇狹窄,至今都未有人能夠行晒全程。[35]面對複雜嘅洞穴地形,英國潛水專家指出,「呢個窿嘅構造唔係太複雜,但係好長,通道大細不一,落雨增加救援難度。」[18]

潛水脫困難度高[編輯]

雖然足球隊受困地點距離山窿入口僅4公里,但係落大雨造成水浸,並非每一橛都行到人,其中2.5公里需要潛水或游水,有啲地方水深十幾米。要行晒成條路,專業潛水員單程都要6個鐘(往返11至12個鐘),更何況唔識水性、啱啱開始學潛水嘅𡃁仔。加上足球隊喺窿入邊困咗幾日,體力不佳,或心理承受能力有限,所以長時間潛水係好大挑戰。如果初學者喺潛水過程一時驚慌或失誤,恐怕會釀成悲劇,連累救援人員。[36][37][38] [39]

冇第條路走[編輯]

救援隊試過喺山窿上高掘地道,希望能夠製造一條直通受困地點嘅逃生路線,不過呢個計劃評估唔掂,因為掘窿速度太慢,起好新路線需要時間,仲要大型機械來鑽開岩石。挖之前又必須先調查確認方位,先能夠準確鑽窿。鑽窿過程亦會有崩塌風險。[39][40]

足球隊故事[編輯]

佤族少年[編輯]

紐約時報報導,其中一位足球隊員係14歲嘅佤族少年阿杜(Adul Sam-on),喺泰緬邊境出世。佢父母喺佢6歲嗰時將佢送到泰國,希望佢能受到較好嘅教育,脫離家族貧困唔識字嘅遭遇。阿杜同教練查塔汪一樣,係受困者當中3個無國籍少數族裔之一,冇法子攞到任何國家嘅公民身份。阿杜嘅父母8年前將佢送到泰國之後,央求美塞縣一對浸信會牧師夫婦照顧阿杜。阿杜同好多無國籍細路一樣,積極向學。佢識5種語言,泰文、緬甸文、中文、英文同佤族語,喺學校學業同運動成績俱佳,享有免學費同免午餐費嘅待遇。呢一次被困山窿,就係佢好有禮貌噉同最早搵到受困者嘅英國潛水員溝通,說明受困者最需要食物。[41][42]

教練引起爭議[編輯]

「野豬隊」受困消息傳開,興起追究相關人士嘅討論。足球隊員全部都係未成年人,而教練查塔汪(Ekapol Chanthawong)作為成年人,居然帶一大班未成年人喺雨季進入山窿探險,行為輕率,因此耗費龐大社會資源。泰國警方拒絕評論社會傳言,淨係表示會審視本案。[43]

不過,有泰國媒體同網友指出,當時係足球隊員獨自先入山窿探險失蹤,教練喺家長請託底下入洞尋人,點知一齊被困。因此教練對於少年受困並冇責任,反而多得佢,班𡃁仔先至有命。被困期間,教練有安撫少年情緒,教導少年正確嘅求生知識(譬如打坐躺臥減少能量消耗、禁飲污糟水、採集洞內滲透清水),仲分自己嘢食畀學生,噉先成班捱到救援大隊來到。[44][45]

睇埋[編輯]

[編輯]

  1. Live : เจอแล้ว! 13 ชีวิตหมูป่าติดถ้ำหลวงเชียงราย #ถ้ำหลวงล่าสุด #ทีมหมูป่า #ข่าว13ชีวิต, 2018-07-02, 原先內容歸檔睇2018-07-05, 喺2018-07-05搵到 
  2. "泰國少年足球隊洞中倖存奇蹟:家人團聚談何容易". BBC News 中文 (用英文寫). 2018-07-03. 喺2018-07-11搵到. 
  3. 網易. "奇迹!泰國13人足球隊被找到 失蹤10日後仍生還". news.163.com. 喺2018-07-06搵到. 
  4. "圖文解釋:四人獲救,泰國洞穴營救仍困難重重". BBC News 中文 (用英文寫). 2018-07-09. 喺2018-07-11搵到. 
  5. 郭春曉、付晨晨 (2018-07-08). "奇迹!泰少年足球隊員4人被救出!仍有9人等待含教練". 新京報網. 
  6. 6.0 6.1 CNN (2018-07-09). "Eight boys have been rescued from the Thai cave". 
  7. "【泰少年足球隊受困】第8名少年獲救". 東方網 | 馬來西亞東方日報 (用中文寫). 喺2018-07-11搵到. 
  8. 8.0 8.1 "Thai cave boys rescue ends in success". BBC News (用英文寫). 2018-07-10. 喺2018-07-11搵到. 
  9. "獲救奇蹟:泰國被困少年「小小年紀居然那麼酷」". BBC News 中文 (用中文寫). 2018-07-10. 喺2018-07-12搵到. 
  10. "泰國溶洞救援:前海軍潛水員喪生後的挑戰與選項". BBC News 中文 (用中文寫). 2018-07-07. 喺2018-07-12搵到. 
  11. "泰國潛水員沙曼:倒在為受困少年運送氧氣的路途中". BBC News 中文 (用中文寫). 2018-07-08. 喺2018-07-12搵到. 
  12. 12.0 12.1 BBC (2018-07-02). "Thailand cave rescue: Boys found alive after nine days". 
  13. 徐簡 (2018-07-03). "泰國少年足球隊洞穴困9天 奇蹟生還". 大紀元. 
  14. 洪翠蓮 (2018-07-09). "英媒曝光4名獲救泰國足球少年 最小的11歲". 新頭殼. 
  15. 15.0 15.1 15.2 轉角國際 (2018-06-28). "泰國失蹤的洞穴少年團:消失5日,美軍趕赴搜救". 聯合報. 
  16. 聯合報國際中心 (2018-07-03). "岩洞失蹤9天 泰足球隊13人全生還". 
  17. 中央社 (2018-06-30). "泰國12足球少年受困洞穴7天 潛水員深入搜救". 
  18. 18.0 18.1 18.2 黃凱熙 (2018-07-01). "泰國少年足球隊探險失蹤 美英軍方協助救援". 大紀元. 
  19. Oliphant, Roland; Horton, Helena (2018-07-09). "Meet the seven British divers playing leading roles in the Thai cave rescue mission". The Telegraph (用英文寫). ISSN 0307-1235. 喺2018-07-11搵到. 
  20. 韓政燕 (2018-07-04). "英專家突破山洞 救援大功臣". 蘋果日報. 
  21. 蘋果日報國際中心 (2018-07-03). "泰13師生撐9天關鍵:常進洞探險 熟悉地形". 
  22. 蘋果日報國際中心 (2018-07-05). "救援分三階段 盡快抽乾積水". 
  23. 23.0 23.1 蘋果日報國際中心 (2018-07-06). "泰救援指揮官首度承認無法等 須盡早撤離師生13人". 
  24. 蘋果日報國際中心 (2018-07-06). "【泰13師生受困】送氣瓶入洞來回12小時 泰前海豹隊員缺氧罹難". 
  25. 蘋果日報國際中心 (2018-07-10). "泰國洞穴救人英雄成就奇蹟 歷史留名". 
  26. 風傳媒國際中心 (2018-07-10). "泰國洞穴救援行動圓滿落幕!足球隊員、教練共13人全數救出". 
  27. 桂家齊 (2018-07-08). "為何選今天營救? 泰官員:再不救就錯失最佳時機". 蘋果日報. 
  28. 桂家齊 (2018-07-08). "【不斷更新】泰洞穴救援已救4人 下波行動再等10小時(動畫)". 蘋果日報. 
  29. Mattha Busby, Kate Lyons (2018-07-08). "Thailand cave rescue: navy Seals confirm four boys have been rescued – live". The Guardain. 
  30. Euan McKirdy, Steve George & Judith Vonberg (2018-07-09). "Thai cave rescue suspended for the day after four more boys freed". CNN. 
  31. BBC (2018-07-10). "BREAKING: Thai Navy Seal team: 12 boys and their coach are out". 
  32. Michelle Roberts (2018-07-10). "Cave rescue: Final push under way in Thailand---In quarantine". BBC. 
  33. BBC (2018-07-10). "Cave rescue: Eight rescued Thai boys in 'good health'". 
  34. 曹國維 (2018-07-03). "困在迷魂洞9天的泰國少年們找到了 13人都活著". 聯合報. 
  35. 35.0 35.1 蘋果日報國際中心 (2018-07-03). "【不斷更新】泰師生水困10天 首見搜救員對話曝光:今星期幾". 
  36. 蘋果日報國際中心 (2018-07-06). "【動畫詳解】地形險峻、水勢難料 泰13師生救援難度超高". 
  37. 錢玉紘 (2018-07-07). "氧氣剩15%!足球隊13人「已能走路」 估採潛水救援要花11hr". 東森新聞. 
  38. 桂家齊 (2018-07-04). "泰受困山洞少年最新影片曝光 開始學潛水". 
  39. 39.0 39.1 蘋果日報國際中心 (2018-07-04). "【奇蹟片】泰13師生困穴9天 奇蹟活命". 
  40. 吳巧曦 (2018-07-07). "鑽洞潛水各有難處 專家:可先等待". 
  41. "Stateless and Poor, Some Boys in Thai Cave Had Already Beaten Long Odds" (用英文寫). 喺2018-07-12搵到. 
  42. "令人動容的教養:一個泰國受困少年如何會說五種語言 | 泰洞穴搜救奇蹟 | 全球 | 聯合新聞網". 聯合新聞網. 喺2018-07-12搵到. 
  43. 施旖婕 (2018-07-05). "雨季帶隊探險13人受困山洞 泰教練恐遭起訴". 蘋果日報. 
  44. 張中宜 (2018-07-09). "1口食物未吃!教練用「獨門保命法」 帶少年們撐過9天". TVBS News. 
  45. 廖綉玉 (2018-07-05). "受屁孩連累、被媒體誤會的第13位受困者?少年足球隊教練並非探險帶隊者,而是受託救出隊員的最大功臣!". 風傳媒. 

出面網頁[編輯]