提阿非羅

提阿非羅（Theophilus）係《聖經》《路加福音》同《使徒行傳》開頭提到嘅收信人。路加寫呢兩封信畀佢，目的係向佢詳細敍述耶穌嘅一生，同一班使徒傳揚耶穌嘅事蹟。路加稱呼提阿非羅做「大人」，係對佢嘅尊稱。有人認為真係有「提阿非羅」呢個人，亦可能係一種寫作手法，係指所有「愛上帝嘅人」，因為呢個名正係希臘文嘅原意。

簡介

提阿非羅係出現喺《路加福音》同《使徒行傳》開頭提到嘅神秘人物，呢個人身世不詳，不過可能係贊助呢兩卷書嘅發行人員之一。關於佢嘅身份有唔同講法：一啲學者認為佢係凱撒嘅親屬；另一種講法：佢係一個羅馬官員，因為喺《路加福音》度，路加稱呼佢嘅時候加咗羅馬官員嘅銜頭。全名：Titus Flavius Sabinus，係當時羅馬前任地方行政長官又係後嚟羅馬帝國國王維斯帕先嘅哥哥；亦有學者認為提阿非羅呢個名嘅意思係「愛上帝嘅人」或「上帝所愛嘅人」所以呢卷書嘅對象係指一切相信上帝嘅人。書裏面作者往往避免採用外邦人難以理解嘅猶太術語，例如「拉比」、「和散那」等，可以睇得出呢卷書主要嘅寫作對象係外邦人。

提阿非羅呢個名嘅意思係「上帝所愛嘅人」，喺使徒時代嘅一啲作家都會將佢嘅作品獻畀社會上有名望嘅人，令到使作品容易流傳，所以呢兩卷書可能亦係路加專誠獻畀提阿非羅大人嘅，路加第一次稱呼佢做大人，表示佢係一個高級卓越嘅羅馬軍官，好可能係路加喺腓立比或安提阿引導歸主嘅一個人，藉住所寫嘅福音書，令佢知道更多關於耶穌嘅事，到佢信主之後，路加寫使徒行傳嘅時候，就冇再稱呼佢做大人，覺得佢已經成為咗一位愛主嘅信徒，喺佢嘅地位已經係主內嘅弟兄，呢兩卷書嘅抄版所有費用，可能係佢出錢贊助嘅，幫助當時每間教會都可以各有一本。