政治社會化
 |
政治社教化（英文：political socialisation）指「個人學習並經常內化政治鏡頭（political lens）嘅過程，而呢個鏡頭形塑佢哋對權力分配嘅睇法以及呢個世界係（同埋應該係）點樣組成；呢個睇法繼而塑造並定義佢哋喺所屬政治同經濟制度底下嘅角色同埋行爲規範。」 [1]政治社會化重包含大衆獲取價值觀同意見嘅方式，而呢啲價值觀同埋意見有助塑造佢哋嘅政治立場同意識形態：係「關於所有年齡層同青少年獲取政治認知，態度同行為嘅發展歷程（developmental process）」。 [2] 佢亦係一種學習過程，令運行良好嘅政治體制下嘅規範同可接受嘅行為，由上一代傳到下一代。呢個功能使得個人開始接觸政治文化，並對某啲政治對象（political objects）產生傾向。 [3]學校，媒體同國家喺呢個過程都有重要嘅影響。
（政治）社教化媒介
[編輯]社會化媒介（有時稱為機構）共同影響並塑造大衆政治同經濟嘅規範同價值觀，包括但唔限於：家庭，媒體，同儕，學校，宗教，工作同法律制度。 [1]
媒介
[編輯]- 家庭：家庭有助延續有關支持政治權威嘅價值觀，並好大程度上促成兒童嘅政治思想觀同政黨傾向（party affiliations）。 [4]家庭喺「政治知識，身份，效能同參與」等方面亦有影響，而具體影響取決於「家庭人口背景，生命週期，教養方式，父母政治犬儒主義嘅程度同政治討論頻率」之類嘅變量。 [5]
- 學校：以美國爲例，學校教育並強化美國細路「崇尚資本主義，擁有權，競爭性個人主義同民主」嘅世界觀。[1] 具體而言，學生會喺小學，初中同高中學到一啲相關嘅重要原則，例如個人權利同財產權，以及個人對國家嘅責任同義務。
- 媒體：大眾媒體唔單止係政治信息嘅來源，重會影響大衆政治價值觀同信念。例如，新聞媒體會喺新聞報導同深夜節目提供各黨派喺唔同政策上嘅立場，大衆或因此參與並了解更多政治。
- 宗教：宗教信仰同習俗有助形成政治言論，推動政治參與，呢個情況喺一啲政教合一嘅地方，例如阿拉伯社會，特別明顯。由宗教機構提供嘅神學同道德解釋影響大衆對公共政策的判斷，並最終透過選舉，「影響政府決策，例如財富嘅重新分配，平等，對異類嘅容忍，對個人自由嘅限制，刑事處罰，有關家庭結構同性別角色嘅政策，以及人嘅價值等等。」 [6]
- 政黨：坎貝爾等學者指出，由於年齡，環境，權力等社會因素嘅對比所致，政黨對兒童冇乜直接嘅影響，。 [7]
- 國家：國家係傳媒嘅重要信息來源，能夠「向傳媒公佈，唔公佈甚或有意誤報信息，影響大眾思考。」呢種策略有時可以稱為政治宣傳，以此達到某種政治或經濟目標。
媒體嘅影響
[編輯]細路
[編輯]政治社會化始於童年。研究顯示，家庭同學校老師最影響兒童嘅社教化過程，但最近嘅研究認爲傳媒嘅影響似乎更深遠。平均而言，美國嘅幼童同埋青少年用嚟睇電視同數字媒體嘅時間比喺學校讀書嘅時間越嚟越多。幼兒平均每星期用咗31個鐘，而青少年用咗48個鐘。而比起朋友，家人或者老師，大眾媒體更能影響高中生對種族，戰爭，經濟同愛國主義等嘅見解同態度。研究重表明，同一般細路相比，接觸多啲大眾傳播媒介嘅細路更支持同理解美國價值（如言論自由），而原因可能係佢哋睇到嘅媒體內容有80％原本係畀成年人睇嘅。另外，細路嘅大腦處於「學習嘅黃金時期」（prime for learning），會不假思索噉接受由傳媒所描繪嘅世界（representations）同訊息，所以資訊嘅影響喺呢個年紀特別大 [8] [9]
大人
[編輯]媒體喺成人時期嘅政治社會化，通過虛構和真實媒體資訊，依舊扮演住重要嘅角色。成人接觸多咗以娛樂方式表達嘅新聞同政治資訊；而虛構娛樂（通常係電視）成爲政治信息最常見嘅來源，並由娛樂嘅高潮位所獲得嘅信息成爲大衆判斷嘅價值同標準。 [8]
雖然媒體嘅政治社會化喺成個人生都有影響力，但青春期之後，人嘅基本價值觀通常唔會點變。大多數人會根據佢哋原有嘅價值觀嚟揀適合嘅媒體，然後用嗰啲媒體嘅信息嚟重新確認已有嘅信念。研究發現，三分之二嘅報紙讀者都唔知佢讀嗰份報紙喺某啲問題嘅立場，另外大多數媒體故事通常好快就會掉淡。有研究表明，公眾會關注多啲受到媒體廣泛報導嘅議題，然後喺呢啲問題形成集體意見，證明大眾媒體嘅關注角度會影響公眾輿論。更重要嘅係，長期睇電視會導致「主流化」（mainstreaming），即係人對政治生活同社會嘅睇法會同電視嘅描繪漸趨一致。 [8] [10]
模式
[編輯]社會化會因種族（race），族裔（ethnicity），性別，年齡，收入，教育程度，地理區域和城市規模等因素而異。例如，一般嚟講，非裔美國人同西班牙裔美國人比白人更依賴從電視獲得資訊；日頭睇電視嘅女性多過男性，而男人比女人睇多啲體育節目；老人家睇報紙多過十二至十七歲的人嘅後生仔（儘管佢哋係使用媒體最頻繁嘅年齡層），但佢哋係睇最少新聞嘅人；北方人比南方人聽多啲電臺；（美國）東岸嘅傳媒往往報導多啲有關歐洲同中東嘅國際事務，而西岸嘅傳媒報導多啲亞洲事務，反映媒體喺政治社會化嘅影響會因地區而異；收入水平亦係重要嘅因素，高收入家庭傾向睇紙媒多過睇電視。相對大多數人，佢哋亦睇少啲電視。 [8]
不過，由於信息同媒體嘅詮釋都有共同嘅核心，最終導致美國各地嘅知識同基礎價值觀都係大同小異。事實上，全國大多數媒體娛樂方式同信息內容都冇乜大分別，而且所有類型嘅觀眾都會睇佢哋。雖然佢哋會喺政治理念同政黨傾向會有分歧，但大體嚟講，佢哋嘅意識形態差距又唔算好大，因為媒體有助大衆喺美國基本民主原則上達成廣泛嘅共識。 [8]
睇埋
[編輯]- 隊列效應
- 集體思考
- 輿論
- 政治文化
- 政治認知
攷
[編輯]
- ↑ 1.0 1.1 1.2 Glasberg, Davita Silfen; Shannon, Deric (2011). Political sociology: Oppression, resistance, and the state. Thousand Oaks: Pine Forge Press. pp. 56.
- ↑ Powell, L.; Cowart, J. (2013). Political Campaign Communication: Inside and Out. Boston MA: Allyn & Bacon.
- ↑ Varkey, K. (2003). Political Theory A Philosophycal Perspective. Indian Publishers Distributors.
- ↑ VENTURA, RAPHAEL (2016). "Family Political Socialization in Multiparty Systems". Comparative Political Studies. 34 (6): 666–691. doi:10.1177/0010414001034006004.
- ↑ Kononova, A.; Saleem, A. (2011). "The role of media in the process of socialization to American politics among international students". International Communication Gazette. 73 (4): 302–321. doi:10.1177/1748048511398592.
- ↑ Pearson‐Merkowitz, Shanna; Gimpel, James G. (2009-08-19). Religion and Political Socialization (英文). doi:10.1093/oxfordhb/9780195326529.003.0006.
- ↑ Campbell, C. M. (1960). The American Voter. New York: John Wiley.
- ↑ 8.0 8.1 8.2 8.3 8.4 Graber, Doris; Dunaway, Johanna (2014). Mass Media and American Politics. CQ Press. ISBN 978-1-4522-8728-7. 引用錯誤 Invalid
<ref>tag; name "Graber 2014" defined multiple times with different content - ↑ Muhammad Saud, Rachmah Ida & Musta’in Mashud (2020) Democratic practices and youth in political participation: a doctoral study, International Journal of Adolescence and Youth, 25:1, 800-808, DOI: 10.1080/02673843.2020.1746676
- ↑ Muhammad Saud (2020) Youth participation in political activities: The art of participation in Bhakkar, Punjab Pakistan, Journal of Human Behavior in the Social Environment, 30:6, 760-777, DOI: 10.1080/10911359.2020.1745112