教育雙減

教育雙減，全名「減輕義務教育階段學生作業負擔和校外培訓負擔」，係中華人民共和國教育部門根據中共總書記習近平指示提出嘅口號，目的係減輕應試教育制度下學生嘅負擔。

2021年7月24號，中共中央辦公廳、國務院辦公廳出台限制校外教育機構嘅《關於進一步減輕義務教育階段學生作業負擔同校外培訓負擔嘅意見》，規定：

1. 各地唔再審批新嘅面向義務教育階段學生嘅學科類校外培訓機構，現有學科類培訓機構統一登記為非營利性機構，線上學科類機構改為審批制，學科類培訓機構一律唔畀上市融資，嚴禁資本化運作，對非學科類培訓機構分類制定標准、嚴格審批；
2. 校外培訓機構唔畀佔用國家法定節假日、休息日同寒暑假期組織學科類培訓；
3. 培訓機構融資同收費應該主要用喺培訓業務，堅決禁止唔正當競爭，嚴禁聘請喺境外嘅外籍人員開展培訓活動；
4. 線上培訓要注重保護學生視力，每節課時唔超過30分鐘，課程間隔唔少於10分鐘，培訓結束時間唔晏過夜晚9點；
5. 唔可以提供同傳播拍照搜題等軟件。

2021年7月28號，中華人民共和國教育部辦公廳印發《關於開展中小學有償補課同教師違規收受禮品禮金問題專項整治工作嘅通知》。之後廣東省將校外培訓機構納入掃黑除惡專項考核，湖北省就係掃黃打非辦參與整頓校外培訓機構。

2021年8月17號，北京市人民政府新聞辦公室舉行《北京市關於進一步減輕義務教育階段學生作業負擔同校外培訓負擔嘅措施》新聞發布會。8月24號，上海市發布《關於進一步減輕義務教育階段學生作業負擔同校外培訓負擔嘅實施意見》，表示要從嚴審批校外培訓機構，嚴禁校外培訓機構上市融資，學科類校外培訓收費納入政府指導價，學校會引入一啲非學科類培訓機構入學校參與課後服務。

受到雙減政策影響，2021年8月開始，猿輔導、作業幫、好未來等培訓機構關閉部分地方中心，幾萬人失業。

2021年8月30號，中華人民共和國教育部召開新聞發布會，提到老師「彈性上落班」、減輕學生作業負擔、降低學生考試壓力、「雙減」任務同埋學校唔可以用任何名義設立重點班、唔可以違規組織考試，考試結果唔排名、唔公布學生成績兼且以適當方式話畀家長學生成績、唔可以根據考試結果調整分班、排座位、貼標籤、小學一二年班唔進行紙筆考試、唔可以隨意增減課時、改變難度、調整進度，唔可以利用課後服務時間講新課、唔畀學校為家長布置或者變相布置作業、唔畀學校要求家長檢查、批改作業、唔畀要求學生自批自改作業。