文武二帝廟

大埔文武二帝廟係香港一座中式廟宇，喺新界東大埔太和市中心（即現今嘅大埔富善街）。文武廟標誌住大埔市集嘅形成。

歷史

大埔文武廟喺光緒十七年（1891年）起，光緒十八年（1892年）起好。文武廟係由當時嘅七約鄉民夾錢起，成為七約鄉公所嘅辦事處，用嚟做太和市（現稱大埔墟）嘅行政審裁、宗教信仰同經濟文化嘅集中地。廟嘅上面設有一塊寫住「正大光明」嘅牌匾，重設有一個公秤，因為以前嘅文武廟除咗係辦事處之外，有時重會用嚟處理村民間嘅糾紛，係太和市買賣公正嘅審裁中心。而公秤就有公平交易嘅意思。1954年新鄉公所起好之後，間廟就改為奉祀文昌帝同關武帝，成為咗一間宗教信仰嘅中心。

文武廟裏面供奉嘅神像原本係木牌，1984年5月11號香港政府將文武廟評為法定歷史建築，受到古物及古蹟條例嘅保護，係新界第一座受到保護嘅建築物。由於文武廟年代太過久遠，所以殘破不堪，七約鄉歷屆嘅委員都希望古廟可以重修，咁啱政府當局發展大埔，政府就喺1985年撥款同七約合資七十幾萬將古廟重修，工程將廟裏面嘅屋頂拆咗，更換咗腐爛嘅木樑桁，鞏固牆壁上面嘅青磚同封實咗牆上面嘅附加窗門，廟裏面手工精細嘅雕花木刻同灰膠都用傳統方式重新髹油同修補，更安放咗文武二帝聖像畀後人禮拜，修葺後嘅文武廟不單止煥然一新，重使到佢傳統中國式建築物嘅形象更加突出。

照片

文武二帝廟外圍
文武二帝廟門額
重修文武二帝古廟碑記
太和市車坪碑