斯芬克司
斯芬克司（參見英文：Sphinx），又寫做斯芬克斯，係埃及神話同希臘神話入面嘅妖怪，人頭獅身。埃及獅身人面像就係用佢嘅形象設計。喺希臘神話入面，斯芬克司喺底比斯攔住每位路過嘅人叫佢哋猜謎，估唔中就殺死佢哋，謎題係「咩嘢動物朝早用四隻腳行路，晏晝用兩隻腳行路，晚黑用三隻腳行路？」，最後畀伊底帕斯答中，答案係「人」。
神話故事
[編輯]
希臘神話相傳，斯芬克斯係一隻有獅子身體同女人頭嘅怪獸，而且仲有對翼。根據傳說，佢守住底比斯（Thebes）嘅城門，會向過路嘅人出謎語，答唔到嘅人就會俾佢殺死。當中佢最出名嗰個謎語係[1]：
有邊種生物朝早用四隻腳行路，晏晝用兩隻腳行路，到咗夜晚就用三隻腳行路？
－喺原版個故仔入便，正確答案係人，理由係因為人仲係蘇蝦嗰陣要用手腳（一共四隻）爬行，長大咗就用兩隻腳行路，年老嗰時就要用拐杖，變成「有三隻腳」。相傳英雄伊底帕斯成功解開咗個謎語，斯芬克斯因此就跳崖自殺而死，最後伊底帕斯就解救咗底比斯嘅人。
埃及神話入便嘅斯芬克司（獅身人面獸）通常個頭似男人，而且廣泛被視為仁慈嘅象徵，代表住力量同威猛，好多時仲會象徵住法老王[未記出處或冇根據]，而且同希臘神話唔同嘅係，埃及神話嘅斯芬克司係冇翼嘅。
文化影響
[編輯]到咗廿一世紀初，唔少歐美嘅人一講起謎語就會諗起斯芬克斯嘅傳說。甚至仲有奇幻主題嘅遊戲由呢個故事中取材，好似魔法風雲會以及龍與地下城等嘅奇幻遊戲，都有用到斯芬克斯嘅形象[2]。
睇埋
[編輯]引咗
[編輯]- ↑ Grimal, Pierre (1996). The Dictionary of Classical Mythology. trans. A. R. Maxwell-Hyslop. Blackwell Publishing.
- ↑ All Sphinx riddles and solutions in Dragon’s Dogma 2. Polygon.