日本年號，亦叫日本元號，係日本參考中國嘅年號而創立嘅紀年制度，喺公元645年由孝德天皇開始用，一路用到而家，係當今世上唯一仍然用緊由君主定立年號（元號）嘅紀年制度。
1867年明治天皇繼位之後，改革日本年號，規定改行「一世一元」，即係一個天皇得一個年號。而天皇死後唔會再另立諡號，而係用佢嘅年號稱呼佢。另外，由明治五年十二月初二（1872年12月31號）之後，日本年號參照嘅曆法由農曆改做西曆，1873年1月1號就係明治六年1月1號。
由2019年5月1號開始，日本年號就係令和，前一個就叫平成。
