昇降級制度

喺職業體育裡邊，昇降級制度指賽季結束之後，俱樂部基於賽季表現而昇入高級聯賽或降入低級聯賽嘅制度。通常情況下，喺實行昇降級制度嘅聯賽系統裡邊，喺低級聯賽裡邊表現最好嘅俱樂部，下個賽季會昇入高一級嘅聯賽；而喺高級聯賽裡邊表現最差嘅俱樂部，下個賽季就會降入低一級嘅聯賽。喺兩個俱樂部排名一樣嘅情況下，有啲聯賽會通過附加賽來決定焉個俱樂部唔使降級。但係有時俱樂部都有可能其他問題而被體育協會強制降級，例如：

• 祖雲達斯同AC米蘭喺2006年意大利足球電話門事件而罰降級到意乙聯賽；
• 廣州醫藥（今日嘅廣州恆大淘寶）同成都謝菲聯（2013年解散）因為喺2009賽季被人剢爆喺2006賽季參與打假球，而俾中國足協由中超聯賽降入中甲聯賽。

昇降級制度喺全球各地嘅好多職業體育聯賽系統都存在，甚至有啲國際競賽（例如世界冰球錦標賽同世界青年冰球錦標賽）都有昇降級制度。此外，歐洲歌唱大賽同世界電子競技大賽都有唔同形式嘅昇降級制度。北美洲（美國同加拿大）係目前昇降級制度最唔流行嘅地區。