星際啟示錄
《星際啟示錄》（Interstellar）係一部2014年嘅美國科幻電影，由基斯杜化路蘭執導，主演係馬修麥康納希、安妮夏菲維、謝茜嘉謝西婷、標艾雲、加西艾佛力、艾蓮貝絲妲、尊力高、米高堅。
基斯杜化路蘭同佢細佬尊立頓路蘭一齊編劇，2007年就定咗劇本。佢同佢個老婆Emma Thomas一齊監製，加州理工學院嘅物理理論學家基普索恩係執行製作人，同埋做電影嘅科學顧問。電影劇本最初吸引咗史提芬史匹堡嘅興趣，想做導演，但喺2009年，史匹堡間公司夢工廠由派拉蒙移咗去華特迪士尼影業集團，派拉蒙需要揾新導演執導《星際啟示錄》。尊立頓路蘭建議佢阿哥基斯杜化路蘭喺2012年參與呢個項目。