智永

釋智永
號	法極
出世	姓王 會稽（浙江）
屋企	吳興縣永欣寺（浙江）
別名	永禪師
職業	和尚 書法家
活躍時期	南朝陳到隋朝
知名作品	《真草千字文》
宗教信仰	佛教

智永zi3 wing5（？—？）名號法極faat3 gik6，係南朝陳到隋朝年間嘅一位和尚兼書法家。「智永」係佢出家之後用嘅法名，按佛家傳統姓釋，人稱永禪師sim4 si1。佢俗名姓王，係書法家王羲之嘅後代。智永最叻寫草書同楷書，代表作有《真草千字文》，有人話佢係隋唐時期學書者嘅宗匠。

生平

智永《真草千字文》

智永俗名姓王，係東晉書法家王羲之嘅第七世孫。佢鄉下喺會稽，即係今時今日浙江省紹興嗰頭。智永喺細細個嗰陣已經出咗家做和尚，後來佢雲遊去到依家屬於浙江省湖州嘅吳興縣永欣寺嗰度，喺藏書閣潛心研讀咗三十年書法，人稱永禪師。據講智永深居簡出，每日都會晨咁早開始磨墨，然後臨摹王羲之嘅字帖練字，非常努力。

書法成就

主要作品

按照北宋《宣和書譜》卷十七嘅記載，宋徽宗時期嘅御府收藏咗智永嘅草書作品《常侍帖》、《參軍帖》、《故舊帖》、《至通法師帖》、《春雨帖》同《千文》，以及楷書作品《月儀》同《獻歲帖》等等。

評價

唐代書法家張懷瓘喺佢本《書斷》入面，將智永嘅章草同草書列做「妙品」，而楷書就評做「能品」。佢仲讚咗智永「微尚有道之風，半得右軍之肉，兼能諸體，於草最優」，呢度「有道」指緊草聖張芝，「右軍」就指智永嘅祖先書聖王羲之。