曼哈頓計劃

出自維基百科,自由嘅百科全書
(由曼克頓計劃跳轉過來)
Jump to navigation Jump to search

曼哈頓計劃英文Manhattan Project)係第二次世界大戰期間研發同整原子彈嘅一項大型軍事工程,由美國同相關支援嘅英國加拿大執行,呢個計劃喺1942年至1946年間直屬於美國陸軍工程兵團萊斯利·理察·格羅夫斯將軍領導,工程原名係「代用材料項目發展」(Development of Substitute Materials),之後改成「曼哈頓工程區」(Manhattan District)。期間,美方吸收咗早已經展開嘅英國核武器研發計畫——「合金管工程」嘅成果。曼哈頓計早喺1939年已經秘密咁展開咗,請咗超過13萬人員,用咗差唔多20億美金(相當於2014年260億美金),超過90%嘅費用用咗喺起工廠同整核裂變嘅原材料,用喺整武器同發展武器嘅資金唔夠10%,呢個工程喺橫跨美國、英國同加拿大三國嘅30幾個城市入面都有進行。

戰爭期間,美軍研發出兩種類型嘅原子彈,一個係設計上比較簡單、用鈾235整成「槍式英文Gun-type fission weapon」,由於鈾235喺天然鈾中只係得0.7%,其他絕大部分都係質量相同、難以分離嘅同位素鈾238,所以美方用咗三種分離方式嚟提高鈾-235嘅濃度——電磁(「卡留管英文Calutron」)、氣體(「氣體擴散法」)同熱(「索瑞特效應」),大部分工作都喺田納西州橡樹嶺進行。

1941年12月7號,日本偷襲美國珍珠港,美國對日宣戰,自此開始,美國正式捲入二戰。同時,納粹德國已經開始咗德國核武器開發計劃「鈾計劃」(德文Uranprojekt),目的係整到核武器,用喺二戰之中。一啲美國科學家提出,要喺納粹德國之前研發出原子彈。

1942年12月2號,喺費米嘅指導下[1],世界上第一個實驗性原子反應堆喺芝加哥起好,成功實現咗可控嘅鏈式反應。1943年春天,奥本海默領導科研人員開始整原子彈嘅工作;1944年,美國橡樹嶺工廠生產出第一批濃縮鈾原材料;1945年7月12號,第一粒實驗性原子彈開始做最後嘅裝配。7月16號,美國第一粒原子彈喺新墨西哥州嘅沙漠中試爆成功,爆炸當量大約21,000噸TNT炸彈。8月6號,美國向廣島投放咗Little Boy原子彈;3日之後(8月9號),向長崎投放咗胖佬原子彈。8月15號,日本宣告無條件投降,第二次世界大戰完。[2]

参考[編輯]

  1. 曼哈頓計畫 互聯網檔案館歸檔,歸檔日期2004-11-26. - 財團法人清華網路文教基金會
  2. 所長的話 - 「科技管理」 - 國立交通大學科技管理研究所