朱踐耳

朱踐耳（1922年10月18號—2017年8月15號），原名朱榮實，係來自中國天津嘅作曲家。

生平

朱踐耳喺1922年10月18號喺天津出世，原名朱榮實。佢細個嗰陣同屋企人遷居上海。佢祖居現今喺存涇縣榔橋鎮嘅黃田村，名為「敬修堂」。朱踐耳讀中學嗰陣對音樂產生咗興趣，並自學鋼琴。朱踐耳視聶耳為佢嘅終身偶像，佢「踐耳」呢個名都係為咗偶像而改嘅。「『踐耳』就是踐行聶耳走過的道路」。朱踐耳喺30年代後期跟隨錢仁康學習和聲學，並隨同石人望學鍵鈕式手風琴。

1945年，朱踐耳去咗蘇北解放區，先後喺蘇中軍區前線劇團同華東軍區嘅文工團從事音樂事業。喺呢段時期，佢寫咗《打得好》呢首歌曲，並俾當時嘅解放軍廣泛傳唱。1949年，朱踐耳去咗上海電影製片廠、北京電影製片廠同埋中央新聞紀錄電影製片廠打工，為電影配樂。

1955年，朱踐耳去咗前蘇聯，喺莫斯科音樂學院學習作曲，喺呢段時間創作咗多部鋼琴小品，例如序曲《告訴你》、《流水》、《敘事詩》等等。1960年，佢畢業返返中國，撞正中蘇交惡。佢喺上海實驗歌劇院作曲。喺呢段時間，朱踐耳嘅作品《唱支山歌給黨聽》成為咗當時流傳得相當廣泛嘅作品。從1975年起，朱踐耳任職於上海交響樂團。

文革結束之後，朱踐耳開始創作交響樂，亦有一啲反思文革嘅作品。

2017年8月15號，朱踐耳喺上海病逝，終年95歲。

代表作

• 《節日序曲》
• 《英雄的詩篇》
• 《血染的紅花》
• 《第二交響曲》
• 《納西一奇》
• 《天樂》
• 《第四交響曲》
• 《百年滄桑》