朴智星

朴智星
박지성
個人資料
全名	박지성
花名	星仔、朴三肺
生日	1981年3月30號（45歲）
出生地	韓國首爾特別市冠岳區新林洞
身高	1.75米（5呎9吋）
位置	中場、前鋒
球會資料
而家效力	全北汽車 (球會顧問)
波衫號碼	13(曼聯)、7(昆士柏流浪)
青年軍
年	球會
1996-1999	水原工業高等學校（韓文：수원공업고등학교）
1999-2000	明知大學
效力過嘅球會
代表隊

朴智星（韓文：박지성，1981年3月30號—，黃曆二月廿五）係南韓前足球員，踢過京都不死鳥、PSV燕豪芬、曼聯同埋昆士柏流浪。2014年掛靴。

早年生活

童年生活

朴智星爸爸朴成宗(音譯，박성종)本籍全羅南道高興郡，高中畢業後就到首爾打工，所以朴智星亦都係首爾出世。但係係佢1歲嘅時候，全家搬返返去高興郡住。朴智星喺嗰度渡過咗佢嘅同年，直到1990年1月讀完小三之後，全家搬到京畿道水原，而朴智星亦都轉校去到山南國民學校就讀。

朴智星細個最鐘意嘅運動唔係足球，而係棒球。佢本身希望加入棒球部，但係由於年紀未夠大而未能成事。佢喺小四完咗之後再轉校到細柳國民學校，亦都喺呢個時候正式接觸足球訓練。

求學時期

係細柳國民學校時期，朴智星努力訓練，係校隊表現突出，所以係小學畢業嗰陣獲頒車範根足球獎優異獎。係1993年，朴智星升入韓國足球傳奇球星車範根曾經就讀過嘅安龍中學校，並且係就讀嘅3年內將原本已經沒落嘅球隊帶到京畿道內強隊嘅地位。亦都因為咁樣嘅表現，佢獲得水原工業高等學校（韓文：수원공업고등학교）(水原工高)嘅青睞，係1996年收佢入學。

係水原工高，朴智星遇到佢人生第一位伯樂--李學鍾教練。李教練係80年代中出道成為職業球員，更曾經入選國家隊，但係1991年掛靴，並擔任水原工高嘅足球隊教練。當時朴智星身高上不及同年人，得158厘米，而且又有扁平足嘅問題，入隊之後基本上被忽視。但係李教練不但無放棄佢，更加為佢安排咗大量嘅技術訓練，提升佢嘅腳法、靈活度等基本功，為朴智星未來進入職業球壇打好基礎。而朴智星屋企人亦都不斷幫佢進補，甚至用埋一啲偏方，最後令朴智星嘅身高喺1999年高三嗰陣達到咗170厘米。而朴智星亦無辜負李教練以及家人對佢嘅信任同栽培，係高二開始就成為球隊嘅主力中場。但係由於整體實力較弱，所以無緣晉身大賽決賽，亦令朴智星高中生涯並未得到任何榮譽。

1999年高中畢業後，朴智星本來希望直接投身職業球壇。由於韓國K聯賽當時係採用選秀制度，並且設有地域優先指名，所以當時韓職班霸水原三星藍翼曾經邀請朴智星試訓。但係由於當時大部分人都係大學畢業後先進軍職業，所以水原藍翼最後並未同朴智星簽約。呢個決定令朴智星陷入無處可去嘅困境，因為當時大部分大學嘅體育保送生名單已經完成，無大學會再收人。呢個時候，李學鍾教練再次幫咗朴智星。李教練利用自己嘅人脈，聯絡到國家隊時期嘅隊友金喜泰教練。金教練當時正擔任明知大學足球隊嘅教練，李教練同佢推薦咗朴智星之後，金教練決定將佢帶到明知大學。但係因為當時球隊名額已滿，金教練不惜同網球隊借咗一個名額，將朴智星帶到明知大學。

進入明知大學之後，朴智星開始嶄露頭角，佢由原本嘅防守中場轉位，兼打翼衛，並且表現出色。雪梨奧運會之前，韓國足球代表隊同當時係蔚山集訓嘅明知大學足球隊進行咗一場友誼賽。喺比賽入面，朴智星表現突出，甚至自己一個帶波70幾米，越過五個防守球員後入波。朴智星呢場比賽嘅表現令國家隊總教練許丁茂眼前一亮，並且立即被徵召，躋身大國腳嘅行列，並且隨隊參與2000年雪梨奧運同埋同年嘅亞洲盃。

職業生涯

京都不死鳥(2000-03)

係躋身大國腳之後，金喜泰教練認為應該俾朴智星外流，提早吸收職業經驗，當時吸引咗嚟自日職嘅清水心跳以及京都不死鳥兩隊嘅關注。當時清水心跳希望用比較低薪嘅C類合約收購，而京都不死鳥直接開咗份年薪5000萬日圓嘅合約，並且向佢保證出場時間，所以最後朴智星選擇加盟京都不死鳥。朴智星呢個轉會創下咗當時韓國足球史上最年輕外流球員紀錄(19歲)，呢個紀錄要到2024年先被轉會熱刺嘅梁民革以18歲又103日打破。佢亦都成為少數唔係係韓國國內出道，而係係國外球會出道嘅韓國球員。

當朴智星加盟京都不死鳥之後，第一個球季主要都係作為後備上陣。但係2000/01球季京都不死鳥排係J1嘅包尾，需要降班到J2聯賽。係J2聯賽，領隊木村文治大膽啟用年僅20歲嘅朴智星作為正選中場，支援鋒線嘅黑部光昭同上野優作等人，取得非常好嘅成效。2001/02球季京都不死鳥一舉奪得J2聯賽冠軍，時隔一季再次重返J1舞台。係次年嘅2002/03球季，朴智星更加係作為球隊嘅固定主力，帶領球隊獲得聯賽第五名，又係天皇盃過關斬將，殺入決賽，同當季嘅J1殿軍鹿島鹿角打對台。由於天皇盃決賽係係2003年元旦，但係朴智星嘅合約已經係2002年12月31日到期，所以很多人都預測缺少主力嘅京都不死鳥會輸，但係朴智星即使無錢收仍然落場，並且帶領京都不死鳥以2-1擊敗鹿島鹿角，奪下天皇盃。係贏得天皇盃後，朴智星功成身退，轉往歐洲，挑戰更高水準嘅舞台。

PSV燕豪芬(2003-2005)

2002年12月，當時啱啱卸任韓國國家隊領隊嘅希丁克就任PSV燕豪芬領隊。佢一上任就先用3年6個月，年薪100萬美元嘅一份合約將愛徒朴智星帶到荷蘭。但係由於2002年世界盃期間過少嘅休息以及水土不服，令朴智星嘅發揮大受影響，2003/04賽季僅出場8場，係生涯裡面最低嘅一季。當時佢係主場甚至會俾主場球迷噓，當時嘅隊友馬克雲保美都曾經公開批評過朴智星。

但係係2004/05賽季，隨住中場指揮官洛賓轉投車路士，朴智星成功把握機會，填補咗洛賓離隊嘅空缺。而係呢個賽季，朴智星展現咗佢驚人嘅體能以及扎實嘅基本功，學生時期接受嘅韓式高壓訓練令到佢有住驚人嘅跑動能力，場均10公里不在話下，但係同時又不失靈活度。因為呢啲特質，朴智星好快就成為燕豪芬嘅新任中場指揮官，並且協助球隊係2004/05年歐聯十六強淘汰摩納哥以及係八強淘汰里昂。雖然球隊係四強不敵AC米蘭，但係朴智星嘅表現得到咗認可，並且得到「氧氣罐」嘅花名。

曼聯(2005-2012)

係歐聯一鳴驚人後，歐洲球壇眾多豪門都開始求購，其中車路士、利物浦、巴塞隆拿等嘅五大聯賽班霸都展現出對朴智星嘅興趣。但係最後由費格遜帶領嘅曼聯成功以730萬鎊嘅轉會費，將朴智星帶到英超。

朴智星加盟曼聯後，係2005年6月22號香港大球場對戰香港代表隊嘅友誼賽裡面首次為曼聯出場，而佢嘅英超處子戰就係2005年8月13日作客愛華頓嘅比賽裡面完成。朴智星加盟後，迅速適應費格遜嘅「4-4-2」戰術，擔任防守中場，為兩翼齊飛嘅兩位翼鋒雲尼斯達萊同傑斯提供彈藥。係2006-07球季，佢更加被調到翼鋒嘅位置，同C朗拿度以及傑斯競爭出場時間。但係呢個球季，朴智星首次遭遇嚴重嘅傷病。佢係2006年9月10號對戰熱刺嘅比賽當中膝頭哥受傷，被迫退下火線，係手術後休養咗足足三個月，到12月聖誕快車前先得以復出，但係傷勢好快又返發，被迫提前收咧，但係仍然成為第一個獲得英超冠軍獎牌嘅亞洲人(第一位獲得英超嘅亞洲人係日本嘅稻本潤一，當時佢加盟阿仙奴，但係並未係英超正式出場）。

2007-08球季，雖然開季後半年仍然因為膝傷而無上場，但係2008年3月復出後，朴智星迅速奪回主力球員嘅位置。係球季後半段，佢輔同有C朗拿度同朗尼擔大旗嘅鋒線，為曼聯打下英超同歐聯兩大比賽嘅冠軍，成為兩冠王奠定基礎。朴智星本人亦成為首位隨隊奪得歐聯嘅亞洲球員，但係係榮譽背後，膝傷一直影響佢，令佢不單只未能參與對車路士嘅歐聯決賽，2008-09球季一開始都要先唞一個月，喺9月先正式上陣。

2008-09球季早期，朴智星陷入咗為期半年嘅入球荒，直到2009年3月7號對富咸嘅足總盃打破呢個入球荒。同年，佢終於踏足歐聯決賽舞台，係對巴塞隆拿嘅歐聯決賽正選上陣66分鐘，但係未能夠幫助球隊衛冕歐聯。

2009-10球季，朴智星繼續高水準表現，係歐聯不斷展示佢極高嘅靈活性同貼身防守技巧。係歐聯十六強對AC米蘭嘅兩回合比賽裡面，朴智星被安排一對一防守意大利名將派路，而佢成功凍結咗派路，令原本一場平均交出110個傳送嘅派路跌到得返場均40個。朴智星戰術執行嘅成功，令曼聯以4-0擊敗AC米蘭，佢係賽後更被派路稱讚為「史上第一個核動力韓國人」，呢場比賽亦成為佢生涯代表作。

係2010-11以及2011-12兩個球季，朴智星都繼續擔任主力球員。佢係2011年更獲得球會延長合約兩年，並獲得隊內第三嘅年薪，僅次於朗尼同里奧費迪南。而朴智星係2012年2月6號為曼聯出場第200場，並且係2月24號首次戴起隊長臂章，都象徵咗球會對佢嘅肯定。但係係2012年朴智星亦係當年夏季轉會窗以500萬鎊轉會到昆士柏流浪，告別效力七個球季嘅曼聯。

昆士柏流浪(2012-2013)

2012年加盟後，朴智星由原來嘅13號改為7號，並且成為球會嘅隊長。但係係開季後，隊內嘅磨合問題影響戰績，導致領隊曉士俾人炒魷魚，改由哈利列納執教。但係哈利列納將朴智星雪藏，並且係季尾將佢租借俾PSV燕豪芬。

PSV燕豪芬(2013-2014)

加盟PSV燕豪芬係朴智星時隔八年重返荷甲。係前隊友菲臘高古麾下，朴智星以老將嘅身分輔助PSV燕豪芬成功取得歐霸盃嘅入場券，佢亦都係呢個球季之後功成身退，宣布掛靴。

國家隊生涯

2000年亞洲盃，朴智星被時任總教練許丁茂安排係對老撾嘅比賽首次登場。之後，朴智星成為韓國國家隊嘅常客，參與咗2002、2006以及2010三屆世界盃。2008年因為金南一累積黃牌需要停賽，朴智星接咗國家隊隊長嘅位，並且一直做到2011年。

2011年亞洲盃，朴智星事前宣布將會係賽後退出國家隊，並且係四強對日本嘅比賽達成出戰100場國際A級賽事嘅成就後，同李榮杓一齊退出國家隊，結束咗11年嘅國家隊生涯。

退役以後

退役以後，朴智星轉向足球行政方面發展。係2014年，佢獲曼聯委任為宣傳大使，成為首位亞裔宣傳大使。2017年，朴智星被韓國足總委任為青訓發展本部長，但係2018年卸任。卸任後，朴智星直到2021年先加入全北汽車，擔任顧問同技術總監，2023年開始就專注係顧問一職上面。

朴智星退役後亦曾經參與唔少綜藝節目，例如SBS嘅Running Man等，並且係2018世界盃以及2022世界盃嘅時候客串係SBS講波。

生涯紀錄

球會紀錄

球會	球季	聯賽		盃賽		聯賽盃		歐洲賽		其他^[1]		總計
球會	球季	出場	入球	出場	入球	出場	入球	出場	入球	出場	入球	出場	入球
京都不死鳥	2000	13	1	1	0	2	0	–				16	1
	2001	38	3	1	0	1	0	–				40	3
	2002	25	7	4	1	0	0	–				29	8
	總計	76	11	6	1	3	0	–				85	12
PSV燕豪芬	2002-03	9	0	0	0	–		0	0	0	0	9	0
	2003-04	28	6	1	0	–		10	0	1	0	40	6
	2004-05	28	7	3	2	–		13	2	0	0	44	11
	總計	65	13	4	2	–		23	2	1	0	93	17
曼聯	2005-06	34	1	2	0	3	1	6	0	0	0	45	2
	2006-07	14	5	5	0	0	0	1	0	0	0	20	5
	2007-08	12	1	2	0	0	0	4	0	0	0	18	1
	2008-09	25	2	3	1	1	0	9	1	2	0	40	4
	2009-10	17	3	0	0	2	0	6	1	1	0	26	4
	2010-11	15	5	1	0	2	2	9	1	1	0	28	8
	2011-12	17	2	1	1	3	0	7	0	0	0	28	3
	總計	134	19	14	2	11	3	42	3	4	0	205	27
昆士柏流浪	2012-13	20	0	3	0	2	0	-		0	0	25	0
昆士柏流浪	總計	20	0	3	0	2	0	-		0	0	25	0
PSV燕豪芬 (租借)	2013-14	23	2	0	0	–		4	0	–		27	2
PSV燕豪芬 (租借)	總計	23	2	0	0	-		4	0	-		27	2
職業生涯總計		318	45	27	5	16	3	68	5	5	0	435	58