桃山虔一
桃山虔一（日文：ももやま けんいちMomoyama Ken'ichi，1909年10月28號—1990年12月21號）係日本公族，之前係大韓帝國皇室成員，李堈個大仔，同時係日本軍人，最高職位係陸軍中佐。佢最初叫李勇吉，之後改名叫李鍵（韓文：이건），後嚟一度改名叫李虔一，最後改叫桃山虔一。
經歷
[編輯]早年
[編輯]桃山一生人多數響日本度過[1]。
1909年，桃山響漢城府出世，嗰時佢叫李勇吉。同年日本佔領韓國，之後勇吉跟住老豆李堈去日本生活，1918年入讀學習院初等科，之後升讀中等科，四年之後又去日本陸軍幼年學校到讀。1924年，佢正式改名叫李鍵，唔使俾人笑，話佢地位低下（因為細佬李鍝做咗李俊鎔個契仔，所以鍵嘅地位低過鍝，如果佢改咗名就係「金」字輩，地位睇落高啲）。1930年，老豆李堈隱居，佢正式繼承李堈公家同埋寺洞宮宗主一位。一年之後，佢正式娶咗高松松平家當主松平賴聰個孫女誠子（之後改名叫松平佳子）[1]。
之後分別升讀陸軍士官學校同埋陸軍大學校騎兵科，1938年以全級最差嘅成績畢業於陸軍大學校。之後佢就一直響陸軍大學校做教書，期間升為陸軍中佐[2]。
日軍投降之後
[編輯]1945年，日本戰敗投降，佢冇咗官位。兩年之後，昭和天皇簽署日本國憲法，李鍵冇咗公族銜頭，降為平民。同時間兩韓戰爭導致分裂，北面係朝鮮，南面為大韓民國，李鍵見到咁，就決定唔返韓國，留響日本。因為尊敬明治天皇，所以佢根據明治天皇個葬地伏見桃山陵改名叫桃山虔一，而老婆就改名叫佳子，而仔女都改叫日本名。後嚟桃山成功攞到新日本戶籍[3]。
因為老豆李堈係個花花公子，本身留畀桃山嘅錢唔多，加上1945年之後又物資少，結果佢響降為平民嗰陣屋企得個五萬日圓。宮內省（後嚟改叫宮內廳）見佢咁窮，想畀一筆錢佢，但就畀駐日盟軍總司令阻止。為咗養家，桃山曾經開過一間叫「桃屋」嘅糖鋪，但係響十個月之後就執咗。後嚟佢先後做過翻譯、農場管理同埋栗田書店嘅印書工，最後做咗銀座俱樂部會長[2]。
婚姻
[編輯]桃山同老婆佳子過得唔係好開心，因為佳子擅長外交，係個交際花；但桃山平時唔鍾意講嘢，導致兩公婆感情冷淡[1]。
降為平民之後，佳子搵到一份好好嘅工，重一路升職；而桃山唔單止生意失敗，重成日轉工；加上又驗出大仔忠久並唔係桃山嘅親生仔。當佢知道自己帶咗綠帽之後，好嬲，呢個時候佢識咗一個女仔前田美子，就成日同美子見面。美子個老豆藤吉要求桃山娶美子為妾，但係桃山覺得同佳子過得唔開心，所以揀咗同佳子離婚而去娶美子，而大仔同大女就歸佳子，二仔歸桃山[1]。
晚年同死後
[編輯]桃山老咗之後，就帶埋一家大細搬去埼玉縣與野市。出於對車嘅喜好，佢受邀擔任日本古典車俱樂部會長，同時一直響度寫有關車嘅書。1990年12月21號，桃山響中央區一間醫院死咗，終年八十一歲。響葬禮上面，同佢曾經一齊當過兵嘅三笠宮崇仁親王都有出席。而寺洞宮宗主一位由細佬李錕接任[4]。
2005年，堂細佬李玖過身，細仔孝哉表示響老豆死之後都唔知自己係大韓帝國後人，係阿媽臨死前先至講畀佢知。佢覺得自己已經完全係日本人，並唔認自己係李王家成員。最後桃山咁多個仔女都冇出席李玖嘅葬禮[1]。
屋企
[編輯]
- 第一任：松平佳子
- 第二任：前田美子
攷
[編輯]- ↑ 1.0 1.1 1.2 1.3 1.4 Shinjō, Michihiko, 1978-; 新城道彦, 1978-. Chōsen Ō-Kōzoku : Teikoku Nihon no junkōzoku (第Saihan版). Tōkyō. ISBN 978-4-12-102309-4. OCLC 905837081.
{{cite book}}: CS1 maint: multiple names: 作者名單 (link) - ↑ 2.0 2.1 〈『李鍵公 ー旧公族・李家ー』〉。《近代名士家系大観》 (日文)。喺2020-10-05搵到。
- ↑ 《皇室令及附屬法令廢止ノ件》。宮內省。1947年。
- ↑ 河原敏明 (2004年)。《『昭和の皇室をゆるがせた女性たち』》。講談社。
| 上一任 李堈 |
李堈公家 1930年至1947年 |
下一任 (1947年畀人廢除) |
| 上一任 李堈 |
寺洞宮宗主 1930年至1990年 |
下一任 李錕 |