杜詩 (東漢)

出自維基百科,自由嘅百科全書
(由杜詩 (東漢官員)跳轉過嚟)

杜詩(—38年),字君公河內汲縣人,東漢同發明家。後生時有才能,做官升到為功曹,做事出名公平。

更始政權時,杜詩征辟為大司馬府官員。建武元年(公元25年),一年內三次升職到侍御史。當時將軍蕭廣任由兵士騷擾百姓。杜詩勸蕭廣,蕭廣冇收斂,於是殺蕭廣,回京之後奏報光武帝。光武帝派佢巡視河東,招降同誅反賊楊異等人;杜詩去到大陽,焚楊異嘅船,派騎兵突襲,殺楊異等人。朝廷升佢做皋縣令,任內三年,政績優異。又升為沛郡都尉,再升至汝南都尉。

建武七年(31年),升任南陽太守。佢生活節儉,施政「清正平和」,以除強暴來建威信,擅長謀略,既節省又愛惜民役。佢又設計制作水排,鑄造農具,做福百姓。此外,又修建池塘,開墾土地。當時嘅人將佢比作召信臣,所以南陽人讚佢:「先有召父,後有杜母。」杜詩自認冇乜功勞,唔應該長期任大郡肥缺,所以請求調職讓個位畀其他功臣,於是上疏請辭。光武帝覺得佢係一個人才,唔畀佢走。

杜詩愛推舉賢才,幾次舉薦知名士人清河劉統魯陽董崇

東漢初期,法令制度重係好簡陋,皇帝係用璽書來調動兵馬,並冇兵虎符來做憑信,杜詩於是上疏建議設置虎符,朝廷接納。

杜詩雖在外地做官,但仍留意朝廷大事,經常上奏。佢做咗七年官,政務做得好。建武十四年(38年),佢因為派咗個食客為細佬報仇,俾召去調查,期間病死。杜詩屋企窮,財產唔多,死後冇錢買地落葬。詔令在郡中嘅官邸治喪,並賜咗一千匹絹同佢辦喪事。

科學發明[編輯]

水排(水力鼓風機),利用水力來傳動機械,令皮制嘅鼓風囊連續開閂,將空氣送入冶鐵爐,鑄造農具,既慳力又有效。

參考文獻[編輯]

  • 《後漢書》卷三十一