東華三院文物館
22°18′54″N 114°10′19″E / 22.31500°N 114.17194°E
東華三院文物館（英文：Tung Wah Museum）喺香港九龍窩打老道25號廣華醫院裏面，係介紹東華三院發展歷程嘅博物館，而家係香港法定古蹟。
東華三院文物館原本係廣華醫院嘅大堂，廣華醫院係第一間喺九龍同新界區開辦嘅醫院，為公眾提供醫療服務。
廣華醫院由東華醫院總理同九龍嘅華人領袖共同創辦，喺1911年落成，成為東華醫院嘅九龍分院。1931年，東華醫院、廣華醫院同東華東院三間醫院合埋叫做「東華三院」。廣華醫院喺1958年進行全面嘅重建工程，只保留咗大堂。1970年，東華三院為咗慶祝成立一百周年，將廣華醫院保留嘅大堂改做東華三院文物館，用嚟展示東華三院嘅歷史文物同收藏珍貴文獻。1971年1月15號，文物館由關祖堯爵士主持開幕典禮。文物館由1993年起開放畀公眾參觀。
文物館結合中西方嘅建築特色。館裏面建築物正面嘅中式裝飾同祠堂布局，清楚展現中式建築特色。檐板上嘅花卉同吉祥圖案，同埋外廊嘅樑架同駝峰，都係精緻嘅木刻。金字屋頂鋪咗綠色琉璃瓦，而家嘅屋脊喺1991年起嘅，係跟番1910年嘅原本嘅屋脊模式。
西方建築元素主要用喺建築物嘅側面同背面，包括用咗小圓窗同連拱頂石嘅弓形拱窗。大堂裏面通去展覽廳嘅四道拱門設有西式楣窗。大堂嘅屋頂由傳統嘅中式桁條同樑架結構支撐，而偏廳就用咗雙柱桁架。