松葉蟹

松葉蟹

松葉蟹（Chionoecetes opilio），日文正式漢字名係「楚蟹」，係種食得嘅蟹，腳細長，肉多汁彈牙，喺北太平洋同西北大西洋都有，但以日本最出名。

楚蟹喺日本有好多唔同嘅叫法，松葉蟹係其中之一，仲有越前蟹、香箱蟹等等。各種叫法係代表唔同嘅產地同性別，包括：

• 狹義上嘅松葉蟹係指喺京都府至島根縣一帶，面向日本海嘅漁港上岸嘅雄性楚蟹，亦係產量相對比較多嘅品種。
• 越前蟹係指喺福井縣越前海岸漁港上岸嘅雄性楚蟹，產量比較少，政府限住漁民喺每年11月頭到3月頭捉。明治時代更做過日本天皇嘅貢品。
• 香箱蟹係指喺北陸地方一帶捕獲嘅雌性楚蟹。傳統上日本人食呢種蟹會拆蟹膏、蟹肉放上蟹蓋食，砌到好似寶箱噉，所以叫「香箱蟹」。
• 津居山蟹係指喺兵庫縣捕獲嘅楚蟹。
• 加能蟹係指喺石川縣捕獲嘅楚蟹。

不過多數講粵語嘅人，都統稱呢啲品種嘅蟹做松葉蟹。