林婉儀墮海案

出自維基百科,自由嘅百科全書
(由林婉儀跳轉過嚟)
林婉儀墮海嘅沙洲對開海域

林婉儀墮海案係2021年香港一單警員墮海殉職嘅事件。官方稱:37歲水警女高級督察林婉儀9月25號朝早喺沙洲對開海域執行反走私行動嗰陣,所坐嘅水警艇俾架走私艇撞到反咗,佢跌咗落海失蹤,艇上另有三個水警都跌咗落海,但好快就被救起咗而無大礙。林婉儀嘅遺體喺27號朝早喺二澳對開海域搵返[1]

死者[編輯]

死者林婉儀(Kary Lam,1984年—2021年9月25號)死嗰陣37歲,2007年加入警隊,初頭喺屯門警區做軍裝警員,之後做過屯門刑事調查隊。到2015年加入水警分區,之後做咗第一個女嘅水警分區指揮官,殉職時係水警西分區高級督察[2]。佢結咗婚,並無仔女。

案發經過[編輯]

官方説辭:2021年9月25號朝早,林婉儀同埋3個水警人員揸住一架水警艇執行反走私行動,喺沙洲對開海域發現走私艇並展開追逐,走私艇突然高速撞反水警艇,四人跌咗落海,除林婉儀外嘅其餘三人好快獲救,但林婉儀就失咗蹤,警方進行搜救行動,一路都無發現。

27號朝早,有艇家報警話喺二澳對開海域發現懷疑浮屍,警方撈起同核實身份後,證實就係死者林婉儀。

後續發展[編輯]

案件由水警總區重案組第二隊跟進調查。到10月11號,警方公佈中國大陸公安已經拘捕咗兩個大陸男人,涉嫌嗰日用快艇蓄意撞向水警艇[3]

警方為林婉儀舉行最高榮譽喪禮,喺11月2號喺紅磡世界殯儀館搞,而公務員事務局亦已批准將林婉儀安葬浩園[4]。有啲親中派人士當日都有送上花牌或出席致意,其中包括親中派藝人楊明莊思明。楊明亦藉機喺花牌上為自己嘅燉湯店宣傳[5]

相關事件[編輯]

由於反修例運動入面,警察被指濫用暴力執法或者以言入罪亂咁拉市民,所以令香港警方形象低落,網上有唔少表現出幸災樂禍嘅聲音,或者認為事件係報應,當中甚至包括有紀律部隊人員,至少有兩位消防員、一位懲教人員同埋一位警員[6]因為畀人發現發表嘲諷言論而被停職候查[7]

另外有高登網民將嗰時熱播嘅流行歌《跌嘢唔好搵》惡搞歌詞做《墮海唔好搵》去嘲諷,受壓力落架後又創作過另一首嘅歌《落架唔好搵》。

而咁啱差唔多時間香港麥當勞都用咗《跌嘢唔好搵》嘅原裝歌詞宣傳,有建制網民覺得原裝歌詞一樣都有嘲諷意味,最後麥當勞要澄清返只係純粹搞宣傳,無任何其他含意。

參考[編輯]

  1.   . 原先內容歸檔喺2021年9月28號. 喺2021年9月28號搵到.
  2. 職高級督察林婉儀被封私剋星 表現卓越多次獲獎. hk.news.yahoo.com (中文). 原先內容歸檔喺2021-10-02. 喺2021-10-02搵到.
  3.  . 原先內容歸檔喺2021年12月29號. 喺2021年10月18號搵到.
  4. 王潔恩 (2021-09-30). 警殉職|警隊11月2日為林婉儀舉行最高榮譽喪禮 將下葬浩園. 港01 (香港中文). 原先內容歸檔喺2021-10-01. 喺2021-10-02搵到.
  5. 警林婉儀殉職 警隊舉行最高榮譽喪禮 | 立場報道 | 立場新聞. 場新聞 Stand News. 原先內容歸檔喺2021-11-03. 喺2021-11-03搵到.
  6. 網上嘲殉職女警林婉儀 男警停職 (20:40) - 20210930 - 港聞. 報新聞網 - 即時新聞 instant news (繁體中文). 原先內容歸檔喺2021-10-02. 喺2021-10-02搵到.
  7. 警殉職指嘲諷林婉儀 男警遭停職 至今四紀律部隊人員遭停職 | 立場報道 | 立場新聞. 場新聞 Stand News. 原先內容歸檔喺2021-10-02. 喺2021-10-02搵到.