反逃犯條例修訂運動

出自維基百科,自由嘅百科全書
Jump to navigation Jump to search
反逃犯條例修訂運動
逃犯條例修訂草案中港矛盾嘅一部分
6月9號著白衫遊行
6月16號著黑衫遊行
7月21號自發遊行
8月18號雨中擔遮自發遊行
日期 成場運動:
2019年3月15號 (2019-03-15)— 而家(316日)
大規模爆發:
2019年6月9號 (2019-06-09)[1]— 而家(230日)
地點 主要係香港,亦有世界各地幾十個城市
起因
目標 令香港政府接納以「徹底撤回《逃犯條例》修訂」為首嘅「五大訴求
特徵 遊行集會唔合作運動
衝突方
示威者

無統一組織,嚟自社會各界,後生仔比例高啲


主要支持組織

香港政府

主要支持組織


中華人民共和國政府

指揮人士
示威者

無統一領導

香港政府

中華人民共和國政府

反逃犯條例修訂運動英文Anti-Extradition Law Amendment Bill Movement),簡稱反修例運動英文Anti-ELAB Movement),支持者又叫反送中運動,個別傳媒叫逆權運動抗暴之戰[註 1]黑色暴亂[註 2],係香港2019年3月15號開始、6月9號大規模爆發嘅一連串反對逃犯條例修訂草案嘅社會運動,形式包括和平嘅遊行同集會,亦出現激進嘅圍堵同衝擊行動。

雖則香港政府自6月中已經停止咗修例工作,但要到9月初先至宣佈正式撤回修訂,加上未能滿足運動入面提出嘅其餘訴求,呢場運動到依家仍然持續落去。而呢次運動不但係香港自六七暴動以嚟最大規模嘅社會動盪,更加畀國際社會高度關注。

呢場運動源自2018年香港女子臺灣遇害案嘅疑兇喺現有制度下唔可以引渡返臺灣受審,香港政府就喺2019年2月提出逃犯條例修訂草案,畀香港將疑犯引渡到任何未同香港有引渡協議嘅地方,包括中國大陸。由於好多人都對中國大陸嘅司法制度無足夠信心,又擔心呢個安排會侵蝕香港「一國兩制」嘅根基,所以強烈反對修例。反對者又將「被引渡返中國大陸受審」嘅憂慮叫做「送中」,同「送終」諧音。

香港眾志喺3月15號搞嘅靜坐,係頭一個反修例嘅示威活動,之後社會各界亦以唔同方式表達反修例嘅訴求,但政府一路都企硬,聲稱修例係要「填補法律缺陷」,堅持安排喺立法會夏季休會前完成審議,結果引起更大規模嘅示威活動,6月9號民陣搞嘅反送中大遊行號稱有過百萬人參加,當局依然無動於衷,結果6月12號嘅示威演化成警民衝突,防暴警察被指使用過量武力,而政府曾一度話呢次衝突係「暴動」,引發更多民怨。行政長官林鄭月娥喺6月15號宣佈暫緩修訂草案,意圖令局勢降溫,但佢一路拒絕用「撤回」嘅字眼,大多數示威者都唔收貨,令運動規模逐漸擴大,「遍地開花」到香港各區,每個禮拜都有唔同區份搞示威活動,多數都出現激進示威者同警方對峙同嘅衝突情況。當局去到9月4號先至宣佈正式撤回修例,但仍然無回應其餘訴求,所以仍然未平息到民怨。到10月頭,政府引用《緊急情況規例條例》去訂立《禁止蒙面規例》,希望可以減少激進示威行為,但見唔到成效。

五大訴求[編輯]

呢場運動當初爭取嘅係要求當局撤回《逃犯條例》修訂,隨住時局發展,支持者加入更多訴求,逐漸發展出獲運動參與者廣泛認可嘅「五大訴求」:

訴求內容 政府官方回應 狀態
1 徹底撤回《逃犯條例》修訂 行政長官林鄭月娥喺6月15號宣佈暫緩條例草案。佢再喺9月4號宣佈正式撤回條例草案 —— 保安局局長會喺立法會10月復會後,按《議事規則》提出撤回條例草案。 Yes check.svgY 10月23號落實咗
2 收回對6月12號同其後抗議活動嘅「暴動」定性 政府話法律程序上唔存在「暴動定性」,又話每單案嘅刑事檢控決定,都係按證據、法律同《檢控守則》作出嘅。 X mark.svgN 唔接納
3 撤銷所有抗爭者嘅控罪 政府認為呢啲要求係法治社會所接受唔到嘅,又話根據《基本法》,律政司嘅刑事檢控決定必須唔受任何干涉,若果唔係就會違反咗香港嘅法治精神。 X mark.svgN 唔接納
4 成立「獨立調查委員會[註 3],追究警隊濫權 政府認為警方執法行動應該按既定機制,交由專責嘅獨立監察警方處理投訴委員會(監警會)處理,而唔應該另設獨立調查委員會。監警會亦正按照佢嘅法定職權,詳細審視由6月9號開始發生嘅一連串大型公眾活動,目標係重組事實,評估警方嘅處理,同埋提出改善建議。 X mark.svgN 唔接納
5 全面落實雙「真普選[註 4] 政府認為社會需要喺法理嘅基礎上,同埋喺平和、互信嘅氛圍下,用務實嘅態度進行討論,若果唔係只會令社會更加撕裂。 X mark.svgN 唔接納

另外,10月頭有啲示威者分別想將「解散警隊」同「停止引用緊急法同撤回禁蒙面法」加入做第六個訴求,夾埋叫「六大訴求」,不過多數示威者認為應該要專注返原先嘅「五大訴求」,所以「六大訴求」嘅叫法唔成氣候。

抗爭特色[編輯]

呢場運動由民間自發,無大台指揮,參與者主要都係透過LIHKG(連登)討論區同通訊軟件Telegram交流。參與者可以分做兩類:多數都係參與和平合法示威活動嘅「和理非」(和平、理性、非暴力),亦有啲人係參與前線激進抗爭嘅「勇武派」,雙方一般都同意下面嘅原則:

  • 唔流血,唔受傷,唔被捕」:告誡「勇武」要避免流血衝突,唔好受傷同唔好畀差人拉。
  • 唔分化,唔篤灰,唔割席」:告誡「和理非」就算唔認同「勇武」嘅激進手段,都要包容佢哋嘅行為,唔好內鬨。
  • 兄弟爬山,各自努力」:「和理非」同「勇武」可以用返各自嘅手段,去達致同一個目標。
  • Be Water」:出自武打巨星李小龍嘅名言,告誡「勇武」抗爭嗰陣要好似水噉樣識得靈活走位,唔好死守同一笪地方。

抗議活動[編輯]

主要遊行[編輯]

註: 活動被警方發「反對通知書」; 活動無向警方申請「不反對通知書

民間人權陣線主辦
其他遊行(包括被警方發「反對通知書」嘅自發遊行)

主要集會同和平活動[編輯]

註: 活動被警方發「反對通知書」; 活動無向警方申請「不反對通知書

主要包圍同衝擊行動[編輯]

罷工同唔合作運動[編輯]

其他形式嘅抗議活動[編輯]

常用抗議口號[編輯]

每次示威活動,群眾都會嗌下面嘅口號,帶頭人先嗌上半句,其他人接埋下半句。

基本口號[編輯]

口號 粵拼 背景同意義
五大訴求,缺一不可 ng5 daai6 sou3 kau4
kyut3 jat1 bat1 ho2
呢個口號講出咗呢場抗爭運動嘅主要目標,就係要求香港政府妥善回應「五大訴求」。
Five demands,
not one less.
唔適用
光復香港,時代革命 gwong1 fuk6 hoeng1 gong2
si4 doi6 gaak3 ming6
呢個口號最初由香港本土派人士梁天琦喺參選2016年立法會補選嗰陣提出,希望各個世代嘅香港人可以參與革新,令香港變得更好。呢場抗爭運動入面,呢個口號再被廣泛採用。但係建制觀點認為呢個口號係變相鼓吹港獨
沒有暴徒,祇有暴政 mut6 jau5 bou6 tou4
zi2 jau5 bou6 zing3
呢個口號最初由運動期間佔領立法會嘅示威者提出,表達出示威者嘅激進行為完全都係因為香港政府嘅「暴政」激發出嚟。
香港人加油
(10月4號前流行)
hoeng1 gong2 jan4
gaa1 jau2
呢個口號係幫香港人打氣,意思比較溫和。
香港人,反抗
(10月4號到11月8號流行)
hoeng1 gong2 jan4
faan2 kong3
10月4號政府宣佈引用緊急法去推行禁蒙面法,示威者認為香港人應該要一齊企出嚟反抗,所以取代咗原先「香港人,加油」嘅口號。
香港人,報仇
(11月8號開始流行)
hoeng1 gong2 jan4
bou3 sau4
11月8號,懷疑因避開警方催淚彈而墮樓嘅學生周梓樂宣告不治,示威者認為警方要為周嘅死負責,需要為周報仇,所以取代咗原先「香港人,反抗」嘅口號。
Fight For Freedom.
Stand With Hong Kong.
唔適用 呢個英文口號意思係「同香港一齊爭取自由」,主要對象係國際社會。

針對警察嘅口號[編輯]

口號 粵拼 背景同意義
香港警察,知法犯法[註 5] hoeng1 gong2 ging2 caat3
zi1 faat3 faan6 faat3
呢個口號係譴責香港警察濫用咗過份嘅暴力去對待示威者。七二一元朗襲擊後,呢個口號亦譴責埋香港警察涉嫌包庇黑社會勢力。
黑社會 hak1 se5 wui2 呢個口號針對香港警察喺7月21號晚同圍村手持棍棒鐵通嘅白衫「齊上齊落」,無拘捕執棍棒白衫,亦無處理白衫毆打示威者嘅案件。坊間認為呢件事係警黑勾結,將香港警察叫做黑社會。
黑警,死全家 hak1 ging2
sei2 cyun4 gaa1
呢個口號係鬧警察係「黑警」,當中第二句出現過唔同版本:
  • 運動初期比較常用嘅版本係「可恥」(ho2 ci2);
  • 8月11號示威活動嗰晚有位女義務救護員畀警方嘅布袋彈打傷右眼,就變成「還眼」(waan4 ngaan5);
  • 到9月爆眼嗰件事逐漸丟淡之後,再逐漸演變成而家嘅「死全家」。
七二一,唔見人;
八三一,打死人
[註 6]
十月一,槍殺人
cat1 ji6 jat1
m4 gin3 jan4
baat3 saam1 jat1
daa2 sei2 jan4
sap6 jyut6 jat1
coeng1 saat3 jan4
呢個口號喺9月頭出現,初頭得兩句:第一句針對7月21號元朗襲擊嗰陣,警察遲遲唔出現;第二句針對8月31號就有警察喺太子站毆打市民。
10月頭加入咗第三句,針對10月1號有警察開槍爭啲打死一位示威者。
好仔唔當差,當差正仆街 hou2 zai2 m4 dong1 caa1
dong1 caa1 zing3 puk1 gaai1
呢個口號改編自傳統俗語「好仔唔當差」。
解散警隊,刻不容緩 gaai2 saan3 ging2 deoi6
hak1 bat1 jung4 wun6
有啲示威者認為警方濫暴嘅問題要解散成個警隊先至解決到。
強姦犯,殺人犯 koeng4 gaan1 faan2
saat3 jan4 faan2
呢個口號指控警察涉及強姦同殺人嘅罪行,包括11月頭傳出有警察涉嫌喺荃灣警署強姦16歲女被捕人士,同埋之前多次警民衝突入面都有警察做出意圖謀殺示威者嘅行為。
愛比暴力強,與警暴割席 oi3 bei2 bou6 lik6 koeng4
jyu5 ging2 bou6 got3 zek6
呢個口號改編自香港政府2019年11月推出嘅宣傳片口號「愛比暴力強,與暴力割席」。

針對禁蒙面法嘅口號[編輯]

口號 粵拼 背景同意義
我有權,戴口罩 ngo5 jau5 kyun4
daai3 hau2 zaau3
呢啲口號都係抗議政府喺10月4號宣佈引用緊急法去推行禁蒙面法
蒙面無罪,立法無理 mung4 min6 mou4 zeoi6
lap6 faat3 mou4 lei5

國際反應[編輯]

8月底,第45屆七大工業國組織會議喺法國舉行。峰會發表聯合聲明,強調G7再次肯定給予香港一國兩制下自治嘅1984年《中英聯合聲明》嘅存在同重要性,敦促中國信守承諾維持香港自治。G7份聯合聲明仲呼籲避免暴力。

英國首相約翰遜表示,七國集團首腦對香港局勢深表關注,都支持一個穩定而繁榮嘅香港,並繼續致力於一國兩制框架。

8月27號,中國外交部發言人耿爽喺例行記者會話,《中英聯合聲明》終極目的係確定中國收回香港,任何國家組織無權假借《中英聯合聲明》干涉香港事務,七國集團首腦會議領導人發表聲明,對香港事務「說三道四、指手畫腳」,中方表示強烈不滿、堅決反對。[3]

9月25號,美國參眾兩院嘅外交委員會分別通過咗《香港人權與民主法案》。經過參眾兩院審議同表決,總統當勞侵喺11月27號簽署法案,正式生效。

相關創作[編輯]

睇埋[編輯]

[編輯]

  1. 「逆權運動」由壹傳媒旗下媒體(主要係《蘋果日報》)喺7月8號開始用,理據係呢場運動已經超出咗反逃犯條例修訂,到10月4號禁蒙面法推出後改用「抗暴之戰」,但呢兩個稱呼暫時都未算流行。
  2. 「黑色暴亂」主要係親中派媒體文匯報大公報東方日報對反修例運動常用嘅稱呼。
  3. 早期第四個訴求無提到要有「獨立調查委員會」,後嚟先至出現。
  4. 早期第五個訴求係「要求行政長官林鄭月娥落台」,後嚟運動參與者普遍認為改革政制先至治本,所以改由「真普選」取代。
  5. 後期開始有「香港警察,吞槍自殺」、「香港警察,強姦謀殺」等等嘅變體
  6. 8月31號太子站有無死過人有爭議,另一版本就將「打死人」轉做「打市民」(daa2 si5 man4),不過後尾喺未證實有死過人嘅情況下,多數人都仍然照嗌「打死人」嘅版本。

參考[編輯]

出面網頁[編輯]