呢篇文係一篇好文。想知更多,請撳呢個掣。

岑子杰

出自維基百科,自由嘅百科全書
Jump to navigation Jump to search

岑子杰
香港民陣再發動4-28反引渡條例大遊行 03 (cropped).jpg
香港沙田區議會瀝源選區議員
現任
就任日期
2020年1月1號
前任黃宇翰
社會民主連線外務副主席
現任
就任日期
2020年3月1號
前任黃浩銘
民間人權陣線召集人
現任
就任日期
2018年10月
前任陳倩瑩
個人資料
出世 (1987-06-29) 1987年6月29號(33歲)
英屬香港

岑子杰英文Jimmy Sham1987年6月29號—)係現任香港民間人權陣線召集人、第六屆沙田區瀝源選區議員,亦係香港彩虹執行幹事、社會民主連線外務副主席[1][2]

2019年,岑子杰領導民陣推動反送中逆權運動,因而開始出名,同時參選第6屆香港區議會選舉嘅沙田瀝源選區[3]。同年10月,佢喺旺角畀一班南亞裔人襲擊頭同手,即使受傷[4],但最後亦都能夠擊敗公民力量黃宇翰,成功當選[3][5]

早年[編輯]

岑子杰係廣東恩平人,響單親家庭大,淨係得阿媽[6]。早年入讀嶺南鍾榮光博士紀念中學(2007年中七畢業)[7]同埋香港專上學院(2018年畢業於社會工作高級文憑)[8]

岑子杰自細就畀人話係「人妖」[6]。佢讀高中嗰時,佢一位同性戀老師因為性取向而畀週刊偷拍,搞到嗰位老師情緒變差,瘦咗好多[6]。岑子杰見到之後深受影響,因此佢鼓起勇氣,響同學面前宣佈自己「出櫃」,仲同同學解譯同性戀人士實際嘅生活並唔係好似大家咁諗,另外佢仲寫信畀嗰位同性戀老師鼓勵佢[6]

響中七畢業之後,佢做咗議員助理,但係慢慢發覺呢份工唔係好啱自己,後嚟佢轉為加入民陣成員團體、香港彩虹轄下行動組織「彩虹行動」。2008年開始為民陣做嘢,包括人權同埋警權事務[8]

2014年,佢同一位空少紐約結婚[9]

政治生涯[編輯]

早期街頭活動[編輯]

岑子杰參加街頭政治活動嘅歷史,最早係2008年嘅「七一大遊行」,當時佢唔係幾出名[8]。響2009年,佢曾經上過香港民間電台,響西洋菜街一帶做FM廣播,宣揚街頭抗爭,因而被差佬告違反《電訊條例》,畀差佬拉咗[1]

從佢呢一次畀差人拉之後,就畀差人長期盯住,成日畀差佬同埋法庭傳訊[1]。不過佢唔驚,響一次街頭演講嘅時候,佢用名言嚟激勵參加示威嘅人:「響一面高大、堅固嘅牆同埋一隻撞向牆嘅雞蛋之間,我會永遠企響雞蛋一邊。」[1]

參加逃犯條例示威[編輯]

後嚟,佢開始有人氣,由好出名嘅佔中雨傘革命至到反修例遊行,都可以見到岑子杰嘅身影[10][11]

第一次逃犯條例示威入面嘅岑子杰

響2019年3月31號,岑子杰分別有份搞第一次反《逃犯條例》、第二次反《逃犯條例》大遊行同埋幫手組織2019年6月9日號「守護香港反送中」大遊行[8]。同年6月1號,佢夾埋其他民主派人士呼籲香港市民罷市、罷課同包圍立法會,去迫行政長官林鄭月娥撤回《逃犯條例》[12]。同月10號,岑子杰第三次搞反《逃犯條例》大遊行,另外重搞埋譴責鎮壓撤回惡法大遊行,批評差人以暴力對待示威者[13]。響7月1號,佢有份搞嘅2019年七一遊行正式開始,主題係「撤回惡法,林鄭落台」,另外副題係「重啟政改,釋放政治犯,撤銷暴動定性,徹查612」,呼籲香港人上街遊行抗爭[13]

響2019年12月8號國際人權日遊行期間,岑子杰畀一啲差佬人身攻擊,個班差佬話岑子杰係「死gay佬」[14]

響2019年8月29號,佢響佐敦畀兩名蒙面人以長刀、鐵通同埋球棒襲擊,同佢同行嘅朋友都受咗傷[12][15]

參選區議會[編輯]

岑子杰當選區議員喺點票站見傳媒

響2019年10月10號,岑子杰宣佈參選2019年區議會選舉瀝源選區,代替因為畀人判坐監而唔可以參選嘅黨友黃浩銘[3]。不過響同月16號,佢響旺角畀一班南亞裔人襲擊,頭同手都大量流血,畀送到廣華醫院治療。而黨友、民陣副召集人陳浩桓證實咗岑子杰係去民陣大會途中畀人打,佢同時強烈譴責呢班南亞裔人嘅行為[4]。但係有中共喉舌聲稱呢單野係岑子杰自導自編自演[16]

最後,岑子杰以3283票大比數當選瀝源選區區議員,擊敗公民力量黃宇翰,另外岑子杰重係瀝源選區第一個成功當選嘅民主派候選人[5]

參選立法會[編輯]

響2020年7月22號,岑子杰宣佈參選2020年香港立法會選舉,代表民陣出選九龍西選區,呢次係佢第一次參選立法會[17]。而呢次提名係根據響2020年香港立法會選舉民主派初選入面佢攞到嘅票數而定[18]。最後,岑子杰響呢次初選總共攞到25670票,以得票率第一名嘅身份獲得民主派提名出選九龍西選區,同岑子杰一齊獲得民主派提名出選嘅仲有張崑陽何啟明同埋毛孟靜[19]

不過因為疫情關係,行政長官林鄭月娥宣佈將原定響9月6號押後到2021年9月5號先至搞立法會選舉[20]

響2020年8月14號,岑子杰接受立場新聞訪問期間透露,話自己由6月開始就已經畀人跟蹤,而嗰班跟蹤人士成日將架車泊響岑子杰屋企樓下,就連岑子杰同人去燒嘢食都畀嗰班人跟蹤[21]。另外,岑子杰嘅黨友陳皓桓都同時畀人跟蹤[21]

評價[編輯]

蔣麗芸[編輯]

響2019年7月,立法會議員蔣麗芸Facebook上面發佈咗一條片,當中有言論係攻擊跟岑子杰嘅同性戀身分,仲話佢特登隱瞞,但係岑子杰一早已經「出櫃[22],後嚟佢響社交網站回應,話蔣麗芸嘅言論「無力」,仲表示會同其他同性戀人士一齊繼續同行[23]

泰晤士報[編輯]

泰晤士報》選出2020年全球20位值得關注人物,岑子杰榜上有名,係唯一一個香港人上榜[24]。而《泰晤士報》讚岑子杰係「獨特人物」(uniquely distinctive figure),仲話佢係一個激動人心嘅演講者[24]

[編輯]

  1. 1.0 1.1 1.2 1.3 "〔人物特寫〕為公義而反叛的同志 — 岑子杰". 輔仁文誌. 2013-01-13. 原先內容歸檔喺2019-06-22. 喺2020-08-12搵到.
  2. 莊恭南, 侯彩琳, 黃偉倫 (2019-11-16). "【同志集會】十年來首次無遊行 出櫃中六生無懼歧視盼平權". 香港01 (中文). 喺2020-08-12搵到.
  3. 3.0 3.1 3.2 "【區選光復香港】社民連派3人參選!岑子杰披甲戰沙田 長毛與李慧琼對撼". Apple Daily 蘋果日報 (中文). 喺2020-08-12搵到.
  4. 4.0 4.1 "民陣召集人岑子杰遭多人鐵槌襲擊 留醫廣華 (23:30) - 20191016 - 港聞". 明報新聞網 - 即時新聞 instant news (中文). 喺2020-08-12搵到.
  5. 5.0 5.1 陳倩婷, 鄭翠碧 (2019-11-25). "【區選2019.瀝源】岑子杰擊敗建制對手奪議席:是香港人的勝利". 香港01 (中文). 喺2020-08-12搵到.
  6. 6.0 6.1 6.2 6.3 "【反送中的香港人2】岑子杰:同志沒有悲觀的權利". 鏡週刊 Mirror Media (中文). 2019-06-25. 喺2020-08-11搵到.
  7. "嶺南鍾榮光博士紀念中學校訊" (PDF). 2008.
  8. 8.0 8.1 8.2 8.3 "兩度捱義氣做民陣召集人 岑子杰:搞遊行,要放下人數包袱". 眾新聞. 2019-07-03. 原先內容歸檔喺2019-07-03. 喺2020-08-11搵到.
  9. "【有人喜歡男】社運男空少拋開枷鎖紐約註冊成「夫夫」". Apple Daily 蘋果日報 (中文). 喺2020-09-02搵到.
  10. "【立會選戰】岑子杰專訪:議席不是獎勵 而是眼前苦杯 | 立場人語 | 立場新聞". 立場新聞 Stand News (英文). 喺2020-09-02搵到.
  11. 胡家欣 (2018-11-17). "【同志遊行】1.2萬人創新高 黃耀明:大眾勿避談同性婚姻". 香港01 (中文). 喺2020-09-02搵到.
  12. 12.0 12.1 "岑子杰佐敦遇持球棒鐵通男子 同行友人上前阻止遇襲". RTHK. 2019-08-29. 原先內容歸檔喺2019-08-29. 喺2020-08-12搵到.
  13. 13.0 13.1 "香港七一遊行 民陣:人數不會比前兩次少". Rti 中央廣播電臺. 2019-06-30. 原先內容歸檔喺2019-07-09. 喺2020-08-12搵到.
  14. "【瘋警失控實錄】擎槍嚇阿婆 罵岑子杰「死gay佬」 鬧路人曱甴 粗口辱議員". Apple Daily 蘋果日報 (中文). 喺2020-08-12搵到.
  15. "民陣召集人岑子杰佐敦餐廳內疑遇襲 朋友擋棍受傷". 頭條日報. 2019-08-29. 原著喺2019-08-29歸檔. 喺2020-08-12搵到.
  16. "岑子傑集會前「遇襲」又做戲?". 大公報. 2019-10-17. 喺2020-09-07搵到.
  17. "與張崑陽、毛孟靜、何啟明報名九西 岑子杰:擬簽確認書 無阻民主派團結 | 立場報道 | 立場新聞". 立場新聞 Stand News (英文). 喺2020-08-12搵到.
  18. "民主派初選公布核實名單 新東 12 爭 7 出線 新西 8 爭 6 街工不參與 | 立場報道 | 立場新聞". 立場新聞 Stand News (英文). 喺2020-08-16搵到.
  19. "2. 九龍西 Kowloon West". 2020年民主派立法會初選. 2020-06-27. 原先內容歸檔喺2020-06-27. 喺2020-08-16搵到.
  20. "【政府記者會一文睇晒】林鄭月娥:引用緊急法押後立法會換屆選舉至明年9月5日". Now 新聞 (中文). 喺2020-08-12搵到.
  21. 21.0 21.1 "【國安法】岑子杰、陳皓桓稱被跟蹤多月 陳皓桓:可能是國家機器 | 立場報道 | 立場新聞". 立場新聞 Stand News (英文). 喺2020-08-28搵到.
  22. "抹黑岑子杰「隱瞞」同性戀身分,蔣麗芸給性/別小眾的啟示 | G點電視". 香港獨立媒體網. 喺2020-08-11搵到.
  23. "【誰令人作嘔?】蔣麗芸發佈針對同志身份影片 民陣岑子杰:無力的攻擊 | 立場報道 | 立場新聞". 立場新聞 Stand News (英文). 喺2020-08-11搵到.
  24. 24.0 24.1 "入選《泰晤士報》 全球 20 名值得關注人物 民陣召集人岑子杰:好多港人比我優秀 | 立場報道 | 立場新聞". 立場新聞 Stand News (英文). 喺2020-08-12搵到.

出面網頁[編輯]