香港民間電台

香港民間電台（Citizens' Radio）係曾健成發起，以非牟利形式運作嘅 FM 廣播電台，不過一直拎唔到牌，所以用公民抗命方式廣播，試過俾人拉同沒收器材，但告到上法庭，法庭就判咗香港廣播條例係違反香港基本法同香港人權法案條例，所以告唔入，但律政司唔服，向法庭申請禁制令，而家單嘢重未解決。

簡介

香港民間電台喺2005年10月3號開始試播，不過由於申請唔到廣播牌，一直非法廣播，又同時用網上電台播。

簡史

背景

2004年，鄭經翰同黃毓民因為一連串嘅恐嚇事件而封咪，最後重俾商台炒埋，引發好多人對香港言論自由收窄嘅憂慮。但係由於大氣電波俾政府同財團玩晒，而申請電台牌照嘅過程困難重重，審批過程黑箱作業又無客觀準則。香港一直以來都係得三間廣播電台經營，之外就無人成功申請過電台牌。

因為咁而觸發起民間活躍社會運動人士，同時又係香港島東區樂康選區區議員嘅曾健成，因為唔妥呢個現象，喺2005年9月向香港影視及娛樂事務管理處遞交建議書申請聲音廣播牌照，不過一未都無被處理。

於是曾健成決定公民抗命，非法廣播。

第一次廣播

由於無籌辦電台節目嘅經驗，民間電台最初只係同其他網台合辦節目，第一次廣播節目喺2005年10月3號播出，當時民間電台同香港人民廣播電台合作喺 FM 102.8 頻道廣播《風波裏的龍門陣》節目，呢一集節目除咗原有《風波裏的龍門陣》主持王岸然、梁錦祥、陶君行之外，重請咗名咀黃毓民同林旭華參與節目，民間電台召集人曾健成亦係嘉賓之一，另外重有梁國雄同蕭若元。

呢一集播出之後，民間電台就收到電訊管理局通知，因接到新城電台向電訊管理局投訴，話民間電台干擾新城嘅頻道，不過事件最後不了了之。

獨立經營

民間電台最初同香港人民廣播電台嘅《風波裏的龍門陣》合作， 由香港人民廣播電台提供節目，而民間電台就負責用 FM 廣播，後來經過幾次上街籌募經費，電台開始獨立經營同自制節目，開始咗提供每日常規節目。

最初民間電台都無網上廣播同網上重溫，淨係得 FM 102.8 頻道廣播，雖維持每星期一至五 7:00 p.m. - 8:00p.m 廣播一個鐘，由於技術同資源限制，最初唔係好多地方收到，後來加入網上廣播同節目重溫，FM 廣播技術慢慢成熟，收到民間電台嘅地方大咗，收聽人數同知名度開始升。

節目風格

由於資源所限，民間電台部份主持未有專業傳媒訓練或經驗，亦有節目會請富經驗嘅傳媒工作者幫手，好似星期四節目有蕭若元主持《蕭灑一回》，最初喺星期三重有黃毓民主持《拒絕沉默》。後期開辦主持訓練班改善情況。

政治時事節目方面，多數傾向泛民，部份政黨及議員主持嘅節目較嚴肅，社運組織主持嘅節目就有激憤嘅，亦有風趣幽默嘅，此外，亦有輕鬆優閒、文化、文學、宗教及音樂節目，題材/風格多元。

嘉賓

民間電台雖然小本經營，但請來多位名人做嘉賓，例如香港行政會議成員張炳良、工黨副主席張超雄、職工盟秘書長/工黨主席李卓人、前立法會議員蔡素玉、立法會議員黃毓民、人民力量陳偉業、前民主黨主席何俊仁、劉慧卿、民主黨副主席李永達、港區全國人大代表朱幼麟、佔領中環發起人戴耀庭教授、電台節目主持陶傑、吳志森、洪朝豐、支聯會主席司徒華、資深傳媒人毛孟靜、彭志銘等等。

主持訓練班

民間電台於2012年舉辦第一屆主持人訓練班，課程由大學傳媒系教授兼前記者擔任主講，嘉賓導師包括資深傳媒工作者/監製兼主持人謝志峰、電台節目主持人林旭華、小米、傳媒及文化工作者彭志銘等，畢業生亦陸續投入電台主持工作

主流媒體

民間電台除咗幾次俾電訊管理局沒收廣播設備，有關民間電台嘅行動，亦無主流媒體報導，包括喺電訊管理局外面做廣播，甚至喺特首府外廣播，即使入面涉及立法會議員、社會知名人士等參與，但都無被本地傳媒或者報章報導。

事歷

• 2004年：鄭經翰同黃毓民先後俾商台解僱，曾健成計劃成立民間電台
• 2005年9月：曾健成成立海昇科技有限公司，向香港影視及娛樂事務管理處遞交建議書申請聲音廣播牌照
• 2005年10月3號：同香港人民廣播電台合作，試播《風波裏的龍門陣》節目，同時係民間電台第一次 FM 廣播
• 2006年1月：民間電台全面展開逢星期一至五晚七點到八點做 FM 同網上廣播
• 2006年3月6號：立法會議員蔡素玉，梁文道做節目嘉賓
• 2006年5月26號：支聯會主席司徒華做嘉賓
• 2006年6月4號：民間電台現場直播維園六四燭光悼念集會
• 2006年6月7號：陶傑做節目嘉賓
• 2006年6月21號：香港行政會議成員張炳良做節目嘉賓
• 2006年6月26號：港區全國人大代表朱幼麟做節目嘉賓
• 2006年8月29號：電訊管理局人員喺夜晚7點，帶埋搜查令，到廣播室查封電台，沒收咗一批廣播設備，FM廣播暫停，不過仍維持網上廣播，二房東帶走問話，但無人被起訴
• 2006年10月3號：香港立法會議員梁國雄到電訊管理局遞交律師信，要求有關當局喺14日內答覆申請牌照問題。
• 2006年10月4號：恢復FM廣播，又喺嗰晚 7點到9點喺旺角街頭做咗兩個鐘頭特備節目，由資深傳媒人毛孟靜主持，有份主持嘅重有黃毓民、李永達、林旭華、梁國雄、曾建成等，雖然當時用緊 FM 公開廣播，電訊管理局亦有在場，但無人被拘捕。另外，由王仁葵創作嘅民間電台台歌喺呢日首播
• 2006年10月13號：民間電台第二次俾電訊管理局人員上門查封，沒收咗一批廣播器材，曾建成被帶走問話，但無人被起訴，FM 廣播被逼暫停，不過仍維持網上廣播
• 2006年10月18號：民間電台喺電訊管理局樓下嘅胡忠大廈地下對開行人路做街頭廣播節目，同時畀電訊管理局第三次沒收廣播器材，立法會議員梁國雄被帶返警署協助調查，但無人被起訴
• 2006年10月18號：民間電台負責人收到法庭傳票，俾電訊管理局落案起訴
• 2006年10月27號：直播保釣二號去釣魚島宣示主權期間俾日本保安廳攔阻情況　
• 2006年11月2號：民間電台喺特首府東閘前做街頭廣播，警方同電訊管理局都派咗好多人監視，但無人被拘捕或者起訴
• 2006年12月12號：行政長官會同行政會議宣佈拒絕海昇科技有限公司提出「民間電台」聲音廣播牌照申請。。
• 2007年11月12號：東區裁判署審理民間電台案件。
• 2008年1月8號：民間電台成員涉嫌無牌管有同用無線電發射器材案件，宣判。
• 2008年1月10號：夜晚8點民間電台用FM102.8直播，政府成功申請禁制令，禁制令有效期到1月18號，商務及經濟發展局局長馬時亨警告民間電台非法廣播係犯法。
• 2008年1月13號：民間電台喺泛民同民陣發起遊行嗰日下晝，喺軒尼詩道近燈籠街口（遊行路線上）擺宣傳攤位，又喺兩點半開始恢復FM102.8MHz廣播。
• 2008年1月20號：高等法院拒絕延長禁制令。曾健成宣佈暫停大氣廣播三個月。
• 2008年4月20號：民間電台喺旺角廣播，曾健成話會每隔兩個禮拜廣播一次。而有關當局就偵測到民間電台廣播信號，警告話會採取法律行動。
• 2008年5月4號：適逢五四運動九十四周年，民間電台喺銅鑼灣港鐵站A出口時代廣場露天公共空間以FM102.8頻道進行廣播，以捍衛公共空間之餘亦探討香港嘅言論自由，出席者包括民主黨前主席、立法會議員李永達，而當局就喺附近大廈民間電台廣播信號進行偵測。
• 2008年5月29號：夜晚七點，銅鑼灣紀利佐治街舉辦「平反八九民運__六四十九週年」FM直播論壇。
• 2008年6月4號：全程FM102.8MHz直播香港支援中國民主愛國運動聯合會舉辦「六四十九週年燭光集會」。
• 2008年6月23號：恢復星期一至五晚七至八點嘅 FM102.8 MHz 廣播。
• 2008年7月1號：下晝兩點半，FM102.8 MHz 特備節目「七‧一上街」。
• 2008年9月26號：民間電台同埋出席嘉賓喺九至十二月其間，陸續收到傳票，分別指各人喺2008年4至6月間參與民間電台舉行嘅非法廣播。
• 2008年12月12號：高等法院宣判，民間電台案件律政司上訴得值，裁判法院無權裁定法例違憲，案件將發還東區裁判署重審。
• 2008年12月19號：夜晚七點三十五分，電訊管理局再度查封民間電台，撿走廣播器材，並要求在場民間電台成員及一名香港電台採訪記者協助調查。
• 2009年1月18號：下晝兩點至七點，民間電台舉辦「撐爆民間電台 Live Music Party」。
• 2009年2月22號：下晝三點，民間電台、泛民二十三位議員聯合主辦「捍衛言論自由，開放大氣電波」大遊行。
• 2009年11月：區域法院法官游德康裁定 6 名被告罪名成立，但游德康喺最後判刑時指，相信各被告係希望透過公民抗命，爭取大氣電波開放，認為佢哋嘅意圖高尚，判每張傳票罰款3000元，但曾健成、梁國雄、羅堪就等都表明唔會交罰款。
• 2009年12月：電訊管理局提交《2009 年電訊（修訂）條例草案》委員會，香港調頻無線電頻譜嘅使用情況文件指：「當局將 87 至 108 兆赫嘅頻譜編配作 FM 電台廣播服務用途，係參照國際電信聯盟嘅建議而作出。為免出現無線電互相干擾嘅情況，FM 頻率之間會有 0.2 兆赫嘅間距。就技術上嚟講，87 至 108 兆赫內約有 100 個可用嘅 FM 頻率單位。根據國際慣例，以及因應香港非常接近廣東省及澳門，我哋必須同廣東省城市同埋澳門按公平原則共用有關嘅 FM 頻率。目前，香港使用 49 個 FM 頻率單位，廣東省城市同澳門就用另外大約 50 個 FM 頻率單位。」
• 2010年1月20號：《2009 年電訊（修訂）條例草案》立法會二讀
• 2010年6月4號：民間電台現場直播維園六四燭光悼念集會。
• 2011年6月4號：民間電台現場直播維園六四燭光悼念集會。
• 2011年11月26號：節目＜打橫嚟講＞旺角街頭首播
• 2012年：民間電台舉辦第一屆主持人訓練班，課程由大學傳媒系教授及前記者等擔任主講。嘉賓導師包括資深傳媒工作者、監製兼主持人謝志峰、電台節目主持人林旭華、小米、傳媒及文化工作者彭志銘，畢業生亦陸續投入電台主持工作。
• 2012年：民間電台嘗試喺元朗借用大廈天台發射廣播訊號，當時元朗、天水圍一帶都可以接收民台節目。
• 2012年3月3號：參與及報導「踢走爛攤子，還我真普選！」抗議小圈子選舉大遊行。
• 2012年6月4號：民間電台現場直播維園六四燭光悼念集會。
• 2012年7月1號：參與及報導七‧一大遊行。
• 2012年10月：DBC數碼電台喺2011年3月獲發數碼聲音廣播牌照。其後喺2012年10月停播。DBC創辦人鄭經翰（大班）向傳媒話，特首梁振英親信、行會成員羅范椒芬干預新聞自由，被「更龐大嘅政治勢力」打壓。據了解，中聯辦正係向 DBC股東施壓嘅幕後黑手，而且唔准股東出售股份畀鄭，令DBC被迫清盤，畀政府收返佢個廣播牌照。
• 2012年10月：喺政府總部外公民廣場直播9日，撐DBC爭取復播。
• 2012年11月13號：民間電台2008年喺旺角行人專區無牌廣播，多名時任立法會議員應邀「開咪」被檢控，並被裁定罪成。5名被告就《電訊條例》條文爭議上訴至終審法院，法院認為嘉賓發言屬「發送」信息，唔係所涉控罪條文嘅「傳遞」行為，裁定5人上訴得直，撤銷定罪，但未有討論條例有冇違憲。
• 2013年1月1號：民間電台出席元旦遊行
• 2013年6月4號：民間電台現場直播維園六四燭光悼念集會。
• 2013年10月：香港電視網絡（HKTV）無理被行政局拒絕發牌事件，萬人抗議政府電視廣播發牌唔透明。民間電台全程力撐義播。
• 2013年10月：曾健成、羅堪就、柯華冰、潘達強同埋海昇科技有限公司（民間電台）被控喺2007至2011年間多次違反《電訊條例》，喺旺角同埋銅鑼灣等地作無牌廣播，合共41項罪名，各被告全部否認控罪。東區裁判法院裁判官何慧縈裁定，潘達強所有串謀無牌設置電訊設施罪名不成立，8項藉未領牌嘅電訊設施發送訊息罪名成立，三人分別被判罰款4000、1600同埋800元蚊。而海昇科技有限公司就被判1項無牌維持電訊設備罪名成立，罰款800蚊。 判決指，單憑各被告喺廣播論壇現場出現，難以推斷各被告間有串謀，同時亦冇專家證人可以證明，喺播論壇現場有冇設置頻譜發射系統。曾健成於庭上話自己冇犯法，只係違反一條過時嘅條例。佢話，不論任何裁決，自己都唔會交罰款、進行任何社會服務令或守行為。裁判官提醒被告，如果未能喺一個月內繳交罰款，有機會以監禁形式代替。曾健成話，如果能夠捍衛港人言論自由，「我願意坐監」。另外，曾健成又以捍衞言論自由為由，要求法院象徵式收取10蚊訟費，獲法庭接納。
• 2013年12月：民間電台連續多個星期喺政府總部外公民廣場舉行政改論壇及直播，嘉賓包括劉夢熊、黃之鋒、范國威、劉嘉鴻、韓連山、戴耀廷、李卓人、黎則奮（Q仔）、梁國雄（長毛），曾健成（阿牛）。
• 2014年3月2號：支持新聞界「They can't kill us all」反暴力遊行。2014年2月26號，《明報》前總編輯劉進圖俾暴徒襲擊身中多刀重傷。兇徒喺光天化日下，於公眾地方向一位報館高層行兇，視法紀如無物。新聞界憂慮，噉不單係「滅聲」，更係「滅口」行徑，以暴力阻止新聞工作者報道真相。
• 2014年3月：曾健成由台灣返香港時，因冇繳付舊年被判嘅3000蚊罰款再被拘捕及上庭。裁判官判決曾健成要喺2014年5月19號前繳付罰款，否則有可能要面臨入獄。至2015年5月，曾健成仍拒絕繳付嗰筆罰款。
• 2014年4月12至23號：民間電台舉行「大氣電波佔領天星」行動，喺尖沙咀天星碼頭進行直播。因為政改勢危，一連串打壓言論自由事件，諸如李慧玲忽然被「商業電台」解僱、《明報》撤換總編輯、暴力襲擊傳媒人、特首梁振英向《信報》及練乙錚發律師信等，一波又一波對新聞自由嘅打壓接踵而來，新聞自由正面臨前所未有嘅考驗，必須要繼續公民抗命，捍衛香港嘅言論自由。
• 2014年6月4號：民間電台現場直播維園六四燭光悼念集會。
• 2014年9月26號至12月15號：民間電台全程參與撐雨傘運動。
• 2015年2月：民間電台2013年10月至11月喺政府總部進行直播，梁國雄、曾健成、張錦雄、曾浚瑛、潘達強及海昇科技有限公司被控喺2013年10月至11月，五度喺政府總部外非法廣播。佢哋否認控罪。經審訊後，被裁定 15 項非法廣播罪成，9項無牌設置電訊設備就無罪。各被判罰款800至4,000蚊。此案被告向法院提出上訴，或會喺2015年稍後再審。
• 2015年3月2號：因4月15號「大氣電波佔領天星」行動，海昇科技有限公司，以及曾健成（阿牛）被票控三項非法廣播罪名，進行審訊。曾健成再次表明民間電台自2006年起被政府打壓，認為政府用法律解決政治問題，係箝制港人言論及新聞自由。案件將於2015年6月1號再審。
• 2015年4月至5月：民間電台再次舉辦主持人訓練班，嘉賓導師包括資深傳媒工作者、監製及主持人等，當中包括謝志峰、小米、彭志銘、李慧玲等。
• 2015年6月13號：民間電台喺旺角菜街行人專用區舉行反袋住先論壇，嘉賓主持有李卓人、麥國風，劉夢熊、牛、馮智活、快必、鳩鳴團代表。
• 2015年6月27號：民間電台十週年晚宴。
• 2015年9月4號：民間電台台長曾健成阿牛同成員潘達強，就非法廣播案拒交罰款，早前收到警方拘捕令，呢日朝早到警察總部自首，下晝被押解上庭，裁判官話未清楚法例可唔可以即時收押入獄，訂喺9月8號再到東區法院出庭審訊。

民間電台口號

• 突破封鎖，主動出擊！
• 寧鳴而死，不默而生！

主持人陣容

名	主持人簡介	主持節目
阿牛	原名曾健成，民間電台台長、前立法局議員、東區區議員、社會民主連線中評委	打橫嚟講，不定期參與大部份節目
長毛	原名梁國雄，民間電台街頭節目主持、立法會議員、社會民主連線第四屆主席	打橫嚟講之長毛出征
奀仔	原名潘達強、外號的士佬、又名民間台黎明，民間電台常任節目主持，計程車司機	一人少一句、You Can、夢想國度、打橫嚟講
光頭仔	民間電台常任節目主持	不定期參與大部份節目
楊匡	民間電台常任節目主持	毛毛細雨、週末遏一遏、You Can
金鷹	民間電台常任節目主持	毛毛細雨、週末遏一遏
陳巧文	民間電台客席節目主持	毛毛細雨
麥國風	民間電台節目主持，社會民主連線內務副主席、灣仔區區議員、前立法會議員	一人少一句
羅就	民間電台節目主持	夢想國度
陸傑	民間電台客席節目主持	夢想國度
鄧立仁	民間電台客席節目主持	夢想國度
Ken仔	香港彩虹、彩虹中國、彩虹行動創辦人，社會民主連線行委，支聯會常委，民間電台常任節目主持	叻女基仔同學堂
Jimmy	民間電台常任節目主持，香港彩虹行政助理	叻女基仔同學堂
天風	民間電台常任節目主持	叻女基仔同學堂
阿信	民間電台客席節目主持	叻女基仔同學堂
阿禮	民間電台常任節目主持	獨立‧生活
喃嘸佬	民間電台常任節目主持，前記者，前大律師	跳老舞
Jovi	民間電台常任節目主持，拓派女主音、鼓手，又名說書人（劇中角色），統籌，聯絡人，記者	打橫嚟講、歌曲解密
Manuel	民間電台常任節目主持，拓派男主音、結他手，統籌	人民再出發
達達	民間電台常任節目主持，拓派低音結他手	打橫嚟講、人人Hero
耀昌	民間電台常任節目主持	打橫嚟講、茉莉花散步
黃健（Ken）	國務院副總理李克強喺2011年到訪麗港城，居民黃健因為着住平反六四Tee被強行帶走	Tee男的天空
黃浩銘	用過粟米斑腩飯向曾俊華示威，社民連行委、香港理工大學社會政策及行政學士、香港中文大學社會政策碩士	打橫嚟講之長毛出征
楊繼昌	節目主持	打橫嚟講之長毛出征
胡志偉	節目主持，立法會議員，民主黨中常委	打橫嚟講
胡偉忠	節目主持，街坊工友服務處（街工）主席	打橫嚟講
郭永健	節目主持，工黨副秘書長	打橫嚟講
招顯聰Billy	原名:招顯聰，節目主持，「香港人優先/主場」發言人，支持港獨，曾因搶槍誤會及持港英旗闖駐港解放軍營被捕	香港人優先
歐陽東	節目主持，民協組織幹事，社運行為藝術家	民協打擂台
韓連山	節目主持，香港教育專業人員協會理事，保衛香港自由聯盟，進步教師同盟	打橫嚟講
血汗攻闖	節目主持，3男1女嘅4人Rap Rock樂隊，歌曲題材以評論社會、政治為主。因鬧警歌成為藍絲狙擊目標	血汗Band房
馮智活	節目主持，聖公會牧師，三料議員，前立法局、區域市政局及區議會議員	曠野靈聲

節目表

時間	星期一	星期二	星期三	星期四	星期五
19:00-20:00	香港人優先		大陸朱論壇		風到巔
20:00-21:00	打橫嚟講	打橫嚟講	打橫嚟講	打橫嚟講	打橫嚟講
21:00-22:00	8,9,10遊生活	精華遊花園	人民再出發	左頭左勢	社區人大
22:00-23:00		血汗Band房		曠野靈聲	跳老舞
23:00-24:00

出面網頁

• 民間電台網址
  • 民間電台網上直播
• 民間電台節目重溫
• 馬時亨回應香港沒有公眾頻道的強烈需要
• 張炳良後悔參與民間電台（大公報報導）
• 開放大氣電波動議遭否決
• 民間電台@YouTube