劉慧卿

出自維基百科,自由嘅百科全書
跳去導覽 跳去搵嘢
劉慧卿
Emily Lau Wai-hing 2018.jpg
姓名原文劉慧卿
出生日1952年1月21號 喺Wikidata改呢個 (70歲)
出生地香港 喺Wikidata改呢個
國籍中華人民共和國 喺Wikidata改呢個
母校倫敦政治經濟學院、USC Annenberg School for Communication and Journalism 喺Wikidata改呢個
職業政治人新聞從業員 喺Wikidata改呢個
政黨民主黨 喺Wikidata改呢個

劉慧卿JPEmily LAU Wai-hing1952年1月21號—)係香港立法會新界東選區前議員,政黨前綫創立人同前任召集人,政黨民主黨主席。佢喺香港嘅政治光譜中被認為係香港泛民主派嘅成員。

屋企[編輯]

劉慧卿香港出世,祖籍廣東南海。阿爸原本係大地主1948年國共內戰廣州南逃香港,住喺灣仔一幢唐樓。初時家境富裕,但劉父嘅第六仔返大陸生活後俾中國共產黨扣押。為救屋企人劉家幾乎傾家蕩產,從此一貧如洗[1][2]

劉慧卿阿媽係劉父第二個老婆,劉父同兩個老婆共生咗十八個仔女,劉慧卿排第十八。佢四歲嗰年,佢阿爸死咗,屋企無咗經濟支柱。劉家十幾人同幾伙人合住唐樓籠屋。劉阿媽喺有錢人家打住家工,仔女就喺異母兄弟或親戚屋企寄住。直到佢讀高中,有能力交屋租,先至無再寄人籬下。細個嘅窮生活,同埋佢阿媽,都好影響嘅性格[1]

劉慧卿讀嘅瑪利諾書院英文中學,最初佢英文水平俾同學笑,經過一番努力,英語變得流利,成績亦有進步。中學時期,佢為小學生補習幫補家計。同時佢經常參與校內活動,好似風紀學生會代表等等,對佢嘅個性亦有一定薰陶[1]

劉慧卿嘅八哥資助佢到美國南加州大學。佢原本打算修讀工商管理學系課程,但冇耐就覺得課程唔啱自己。就在嗰時發生咗水門事件,《華盛頓郵報》記者伍德華德同伯恩斯坦敢於揭露當權者嘅腐敗,受到呢件事影響佢喺第二學年就轉讀電視新聞學系課程,1976年取得學士學位,返香港投身傳媒[1]

婚姻[編輯]

劉慧卿結過兩次婚。1982年,佢同英國《星期日泰晤士報》資深記者波爾相識,閃電結婚,但到咗八十年代中就離婚。1988年,佢同大律師潘松輝代表《香港觀察社》去英國就《香港基本法》草擬問題同英國國會議員會面後,喺1989年3月宣布兩人婚訊。2005年,劉搬出同潘共住嘅荃灣汀九住所,改喺跑馬地獨居,有指兩人已分居。劉初時否認,但2006年5月,佢承認搞緊離婚手續,重向立法會申請改變婚姻狀況[3]

記者生涯[編輯]

1976年,佢打算應徵無綫電視新聞部,但因為人工太低而放棄。之後佢自薦《南華早報》,獲得錄用,專責報道衛生福利教育新聞。任職兩年期間,佢揭發公立醫院療養院醫護人員疏忽照顧長者同病床床位唔夠嘅問題,當時嘅香港總督麥理浩爵士睇到之後非常震驚,下令改善公立醫院服務,唔再用帆布床,自此帆布床喺香港逐漸被淘汰[1]

兩年後,佢轉職無線電視新聞部,上司係黃應士。佢同時兼顧翡翠台(無綫電視中文台)同明珠台(無綫電視英文台)。任職三年間擢升至助理採訪主任同高級編導。佢製作時事節目《焦點》,談及香港主權移交問題,當時中國英國主權問題進行談判,但佢對香港人冇權參與談判而感到憤怒[1]

1981年,佢再度出國留學,喺倫敦大學倫敦政治經濟學院修讀國際關係學碩士學位,但係佢一準備入學,倫敦大學卻以佢冇國際關係學學位為由,要求劉慧卿先完成文憑課程。佢幾經交涉,結果倫敦大學改變要求,叫佢參加測驗,最後佢測驗合格,順利入學,更加喺倫敦大學校長當面爭取華裔學生嘅公平待遇,自此佢視不平則鳴為個人方針。讀書之外,佢同時為無綫電視新聞部倫敦特約記者,同兼任英國廣播公司電視部助理編導,專責報導香港前途新聞,重採訪過侯任香港總督尤德爵士[1]

佢喺1984年辭去英國廣播公司嘅職務返香港。無綫電視想搵佢回巢,但佢認為人工太低,於是改投《遠東經濟評論》。佢曾經喺中英聯合聲明嘅記者招待會上,向當時英國首相戴卓爾夫人質詢:「妳把五百萬香港人交給一個獨裁的共產政權,道義上是否說得通?」戴卓爾夫人回答:「香港人欣然接受這份協議,妳是唯一例外。」重話新華社香港分社副社長李儲文曾藉口同佢補習普通話,兩度約見,實則係討論時事同了解佢嘅見解[1]

1989年3月,劉慧卿同其他六名關注民主人權人士應中國異見人士方勵之要求,帶同香港二萬三千多個市民簽名到中國,要求當局釋放政治犯。七人一踏入天津機場,其中莊思明被原機遣返,而聯署則被沒收。佢搭火車北京途中,大批便衣公安中文中华人民共和国人民警察沿途監視監聽。到達北京,六人草擬致人大常委會嘅信,送抵人民大會堂,公安人員築成人牆包圍,重俾武警來福槍威嚇[1]

公安指稱六人之一嘅陸漢思牧師係外籍人士,唔係香港人,唔畀佢進入人民大會堂。劉慧卿爭辯但無功。最後一名唔肯透露個名,聲稱全國人大常委會信訪部嘅人員收了信件。離開北京之前,六人召開記者會,中外記者採訪,而佢同公安爭吵嘅圖片,上咗《南華早報》頭版。4月,佢以記者身份再度前往北京,目睹天安門廣場聚集悼念胡耀邦嘅學生,呢次係佢最後一次自由進出中國大陸[1],自此佢被禁止踏足中國大陸。兩個月後,六四事件爆發。

1987年1990年,劉慧卿擔任香港中文大學新聞與傳播系以及香港大學授權嘅新聞系校外進修班講師。1989年1991年間,佢擔任香港記者協會主席,重多次就香港嘅重大事件擔當發言人[1]

棄筆從政[編輯]

高票當選[編輯]

劉慧卿原本係冇從政念頭,直到1987年,佢去英國訪問當時做外交部次官嘅添·連頓英文Tim Renton, Baron Renton of Mount Harry,劉慧卿問佢點解英國政府唔畀香港舉行普選,連頓反問佢如果有普選係咪會參選,佢毫不猶疑話會;加上前律政司唐明治嘅鼓勵,同埋希望推動香港嘅民主,佢決定棄筆從政[1]

佢親戚反對佢從政,但佢決意從政,並且辭咗《遠東經濟評論》記者同埋香港記者協會主席嘅職務,公開籌募近三十萬元選舉經費,喺新界東出選。喺六名候選人中,佢同黃宏發兩人勝出,佢重成為「票后」(得票最多嘅女性),係香港第一個通過直選入立法局嘅女性議員,亦係當屆唯一一個民選女議員,開始全職議員嘅生涯[1]

問政表現[編輯]

當選後,佢爭取了解唔同範疇嘅議題,非佢所屬嘅事務委員會,佢都會列席。同時推動立法局(立法會)唔同黨派合作,謀求共識[4]。佢對政府官員言語辛辣,不留情面;喺一次會議之中,佢掟鉛筆表達對官員回應嘅不滿[5]

無論政府官員[5]、泛民主派,定係同佢政見唔同嘅議員,都認同佢唔偏私嘅作風,如果議員違反議事規則,佢會適當處理[6]。佢喺議會上面極之注重遣字用詞,絕對唔畀任何貶低女性嘅詞彙出現,例如「婆媽」(馬虎)、「二奶」(情婦)[7]、「婆數」(麻煩事),包括以講笑嘅形式,佢亦唔會接受[8]。佢亦唔鍾意睇到人哋講嘢時中英夾雜,認為呢啲係香港人嘅通病,唔尊重語言,於是要求議員全部用中文,否則就全部用英文,之後議員同官員喺會議中,有劉慧卿出席时唔再用中英夾雜方式講嘢[1]

2006年10月6號,劉慧卿同陳鑑林競逐立法會政府帳目委員會主席,出席投票嘅議員除咗泛民主派議員21人,重有親建制派議員29人,兩人同取25票,最後以抽簽決勝負,劉慧卿贏咗[9]

九五直選[編輯]

1994年,當時香港總督彭定康發表任內第一份施政報告,提及政改方案,改革立法局選舉制度,除咗要「兩局分家」,取消所有委任議席,又新增九個功能組別議席(新九組),令到所有在職人士都有資格投票(變相使這九個議席成為直選議席)[1]

但劉慧卿認為呢個係唔民主嘅間接選舉,於是自行用私人草案,提出「九五直選」方案替代彭定康嘅政改方案。佢嘅私人草案將香港劃分為六十個選區,全部單議席單票制,以普選方式選出六十個立法局議席。呢個草案推出嘅時候,引起立法局通宵達旦激烈辯論。据劉嘅自傳講,當時港英政府、中國政府及台灣政府三大勢力分別向唔同黨派嘅立法局議員施壓[1]

劉慧卿喺六四18週年時攝,為前綫同埋泛民主派籌款,圖中所見佢身穿普選回號的T恤

泛民主派議員方面,香港民主同盟民主黨前身之一)支持劉慧卿嘅私人草案,但係匯點(民主黨前身之一)就話佢嘅私人草案違反《基本法》,全體投棄權票。彭定康亦親自打電話叫劉慧卿支持政改方案[10]。1994年6月30號清晨4時50分辯論結束,「九五直選」方案以一票之差被否決,採用彭定康嘅政改方案。之後香港立法會仍然採用半直選半間選功能組別議席制[1][11]

成立前綫[編輯]

1996年8月26號,劉慧卿同其他路線相近嘅盟友劉千石李卓人梁耀忠黃錢其濂何秀蘭一齊成立新政黨前綫」,何秀蘭做首任召集人。創立前綫者幾乎全部係泛民主派議員,唯有黃錢其濂係原政府高官出身,曾經做衛生福利司[1]

前綫以「爭取普選、捍衛人權、全民制憲、維護法治」為綱領,係泛民主派非政府、非牟利嘅政治團體,早前會址設喺中環,其後搬到油麻地[12]。劉慧卿繼何秀蘭之後成為召集人,直至而家。但佢將精力全放喺立法會上,加上佢不擅處理組織工作,搞到前綫好多人事糾紛,七十幾名創會會員只有少數留低;前綫未能壯大,亦未能栽培第二梯隊,劉慧卿承認佢要負責[1][13]

新華社事件[編輯]

1996年,立法局通過《個人資料(私隱)條例》,劉慧卿根據法律中「個人資料使用者必須在四十天內回覆是否持有查詢者個人資料」嘅規定,向原新華社香港分社香港中聯辦)社長周南提出查詢,但係新華社一年之後先至回覆,話無佢嘅個人資料[14]

劉慧卿向個人資料私隱專員投訴,專員將投訴轉介到律政司,但係當時做律政司司長梁愛詩以公眾利益為理由[15],拒絕控告新華社香港分社違反條例。

後來律師陳爵建議劉慧卿以個人身份向法院控告新華社香港分社,裁判官批准佢以私人傳票方式,刑事控告新華社香港分社,但係嗰時《法律適應化修改(釋義條文)條例草案》啱啱通過,新華社香港分社等等中央政府駐香港機構於是有豁免權[16]。於是劉慧卿改向法院起訴當時係新華社香港分社社長嘅姜恩柱[14]。但姜恩柱以「事情發生時非他在任」為理由,提出司法覆核撤銷對佢嘅起訴,最後姜恩柱勝訴,劉慧卿要支付姜恩柱嘅律師費一百六十多萬元。一年半之後,佢仍然未能還清款項,故姜恩柱就向法院申請拖欠訴訟費嘅劉慧卿破產。由於劉慧卿通過公開籌款、申請公民政治權利基金同埋個人儲蓄,喺法院開庭前四天,即2001年3月23號還清咗一共174萬港元欠款,使佢免於成為香港第一個遭破產申請的立法會議員[17][18]。但有人批評佢唔係無償還能力,因為佢人工唔低,而且喺瑞士設有公司,買賣基金投資等等,籌款只係「政治把戲」[19],劉慧卿話,佢係希望透過籌款方式向公眾解釋事件嘅來龍去脈[1]

「瞓街卿」[編輯]

1996年12月10號,劉慧卿同鄭家富、何秀蘭、李卓人參與反對香港行政長官四百人推選委員會小圈子方式選舉靜坐抗議,幾百個差人戒備。抗議人士喺警方指定嘅示威區遊行,好多人發現冇鐵馬包圍嘅缺口,於是走近會議展覽中心[1]

警方立即驅趕佢哋,結果雙方對峙,好多人瞓喺中心,警方就逐一將佢哋抬上警車押返灣仔警署。劉慧卿喺扣留期間用電話同英國廣播公司記者對話,以全球直播方式作現場報導。即使瞓喺路中心嘅抗議人士唔只佢一個,而且以後示威亦冇呢個舉動,但係佢成為眾矢之的,親北京人士[20]或左派報章譏稱劉慧卿為「瞓街卿」,至今未休[21][1][22]

劉慧卿曾經喺立法局前廳遇上當時做保安司黎慶寧,黎慶寧好驚咁問警方部處嘅示威區有個不設防嘅缺口,劉慧卿回應係真嘅[1]

太平紳士[編輯]

太平紳士係劉慧卿少數公職之一,太平紳士權力同埋職責係可以巡視監獄庇護工場、男女童院同埋醫院,本來以佢立法局議員嘅身份亦有相同權力,但喺1997年之後,原先嘅立法局議員全體落車,劉慧卿亦同時卸任,佢就唔接受唔係民選嘅臨時立法會,成年冇咗議員身份,直到1998年香港立法會第一次選舉,佢先再次當選[1]

當時港督彭定康見到呢個情況,詢問劉慧卿係唔係接受被委任做太平紳士,劉慧卿考慮到1997年之後新任香港特別行政區行政長官董建華未必畀佢同樣嘅機會,於是喺1997年6月13號接受任命,繼續處理事情。劉慧卿特別關心囚犯嘅事,成日去探訪同接受投訴,本來按照規矩,係由一個官守太平紳士同埋一名非官守太平紳士(劉慧卿係屬於非官守[23])一齊去,但佢懷疑有人事先通風報訊,另作安排,令人睇唔到真相,所以佢寧願一個人突擊巡視[1]。但咁樣就引起懲教署不滿,懲教事務職員協會召開記者會,表達對劉慧卿嘅不滿,認為佢嘅做法唔啱規矩,有無視懲教事務職員嘅專業操守之嫌;但亦都有意見話,劉慧卿已經同當時嘅署長伍靜國通電話,並且得到署長批准。根據監獄嘅規定,劉慧卿係合乎規定嘅。[24] [25]

臺灣言論[編輯]

2003年8月,劉慧卿同埋另一位立法會議員,民主黨嘅涂謹申台灣參加咗一個叫做「一國兩制下的香港」嘅研討會。呢個研討會係由群策會舉辦,陸委會協辦,由中華民國總統陳水扁開幕,幾有台獨色彩[1][26]。劉慧卿嘅研討會中話:

「香港有香港嘅狀況,台灣好多人話香港嘅『一國兩制』玩完啦,無希望啦,我唔係咁樣講。……唔理兩岸統一,定係台灣獨立,只要台灣人嘅選擇,我都尊重。……臺灣嘅未來應該由臺灣人民自己決定[1]。」

北京方面同唔少親北京人士對於佢出席論壇同埋認可臺灣自決嘅權利非常不滿,並就呢件事發表好多批評言論或者評論性文章,指佢身爲一名議員唔應該出席呢類活動。呢啲言論同評論性文章引起咗爭議同大眾嘅迴響。佢後來又嘅一次訪問中拒絕明確表示臺灣係中國嘅一部分,引起咗更多嘅批評。因為呢一點,佢俾好多人視為漢奸[1][27]

由於劉慧卿嘅政見經常同親建制派唔同,令到佢經常被香港激進親共人士嘅攻擊。佢曾經被電話恐嚇;辦公室曾經遭傾倒食物同糞便。一名女人同一名老人因此被警方逮捕同埋被罰款。2004年6月21號,有人喺劉嘅辦公室外縱火,放喺辦公室外呼籲參加2004年7.1集會嘅宣傳單張被燒咗,牆上留低咗“所有漢汗(奸)都要死”嘅字句。此外,佢嘅辦公室重不斷受到假愛滋病毒、假炭疽病菌等唔同方式嘅搔扰。另外,根據劉慧卿喺2006年12月16號出席電台節目《發酵的男人》時講,佢懷疑雖然安裝咗保安系統,但係自己嘅住宅同辦事處仍然經常被不知名人物潛入,而且未有得到警方嘅重視[28][29][30][31][32]

政治取向[編輯]

劉慧卿係人權議題、民主化進程同埋其他一啲政策嘅直率批評家。佢嘅行為喺一啲場合曾經引起爭論。佢曾經多次喺回歸前同回歸後對“一國兩制”表示質疑,認為北京方面唔會同意畀特區政府各種自由,而且會不斷透過各種方法,去直接或者間接干擾香港嘅內部事務。另外,佢亦喺回歸前就中共中央對香港嘅一啲做法,指责中共係“野蠻”[1][33]

劉慧卿亦屬於泛民主派比較激進嘅一員,佢認為基本法同香港現有法律嘅矛盾,應該靠對香港法律有理論上嘅認識,而且更要具有實際經驗嘅人嚟解釋,因此,佢支持對現行香港基本法進行修訂,去消除兩者之間嘅矛盾同灰色地帶。親建制派认为佢嘅呢個要求係“對中央唔信任”同埋“意圖挑戰中央同人大常委決定嘅權威”[1][34]

另一方面,由於佢喺中國改革開放早期就已經去大陸採訪,但劉慧卿除咗隨曾蔭權訪問大陸之外,喺六四事件之後未曾正式踏入中國大陸,故此多認知了解六四事件之前嘅中國官員官僚心態,喺批評中共政府時亦比較激烈[35]。佢多次要求中共政府平反六四[36]、落實中國大陸嘅民主化等等[37]。此外,佢主張重視公民權利,認為應立法保障人權、平等權利同知情權[38]。喺經濟事務上,佢主張公平貿易,反對輸入外地勞工,同埋推動引入最低工資[39][1]。2010年5月,劉慧卿同其他民主黨成員同中聯辦談判傾政改方案,俾其他民主派人士鬧係「出賣香港」。

佢經常評論中港人權狀況、香港民主進程等等。佢亦懷疑「一國兩制」嘅落實,所以言論常惹起爭議[1][40][41]瑞典奧普塞拉大學喺2003年頒發蒙列斯文尼仁人權獎(The Monismanien Prize),以表揚佢對香港人權同民主嘅貢獻[42][43]

碎料[編輯]

  • 劉慧卿作為資深民主派嘅人物,不時會幫民主派其他人助選。但係自2016年新界東補選開始,劉慧卿就時不時向候選人獻吻。之後,劉慧卿錫錫候選人,就時不時成為選舉話題[44][45]
  • 劉慧卿曾經有一次公開投訴國泰航空係航班上面提供嘅牛肉粥冇牛肉,結果引來一啲唔認同佢政治立場嘅網民對佢人身攻擊,但呢啲攻擊又引嚟一啲人批評攻擊者盲目支持國泰航空。喺2021年11月,學術期刊Journal of Organizational Computing and Electronic Commerce就刊登咗一篇文章,討論消費者嘅網上捍衛品牌行為(consumers’ online brand defending),就提及咗呢次網民之間嘅罵戰[46]

參攷[編輯]

  1. 1.00 1.01 1.02 1.03 1.04 1.05 1.06 1.07 1.08 1.09 1.10 1.11 1.12 1.13 1.14 1.15 1.16 1.17 1.18 1.19 1.20 1.21 1.22 1.23 1.24 1.25 1.26 1.27 1.28 1.29 1.30 1.31 《卿描淡寫》 劉慧卿著 協益生活叢書 ISBN 978-962-17-9135-1
  2. 《卿描淡寫》評論劉慧卿 劉麗卿
  3. 劉慧卿承認辦離婚
  4. 《卿描淡寫》評論劉慧卿 田北俊
  5. 5.0 5.1 《卿描淡寫》評論劉慧卿 不願透露姓名的政府高官著
  6. 《卿描淡寫》評論劉慧卿 曾鈺成
  7. 《卿描淡寫》評論劉慧卿 何俊仁
  8. 《卿描淡寫》評論劉慧卿 石禮謙
  9. . 原著喺2012年7月29號歸檔. 喺2007年11月8號搵到.
  10. . 原著喺2004年7月6號歸檔. 喺2007年11月8號搵到.
  11. 立法局會議1994年6月29號記錄 (PDF). 原先內容歸檔 (PDF)喺2012年12月24號. 喺2007年11月8號搵到.
  12. . 原著喺2007年6月29號歸檔. 喺2007年11月8號搵到.
  13. 《卿描淡寫》評論劉慧卿 鄭則文
  14. 14.0 14.1 「秘而不宣」的美中議會互訪--何山. 原著喺2005年11月13號歸檔. 喺2007年11月8號搵到.
  15. 稿. 原著喺2007年12月11號歸檔. 喺2007年11月8號搵到.
  16. . 原著喺2007年9月27號歸檔. 喺2007年11月8號搵到.
  17. 香港律政司關於不起訴新華社香港分社的聲明
  18. 香港立法會CB(2)631/98-99號文件
  19. . 原先內容歸檔喺2008年6月19號. 喺2007年11月8號搵到.
  20. 氓豬狗樣樣都衰過人低幾級
  21. 「瞓街」另一個隱藏嘅意思係「橫屍街頭」,因為一般人除咗露宿者之外,不會喺街露宿,係一個帶有濃烈貶意嘅名詞。
  22. 陳方安生出來做什麼? 梁文道. 原著喺2007年7月16號歸檔. 喺2007年11月8號搵到.
  23. 根據《太平紳士條例》(第510章)第3(1)(b)條獲委任的人士(通常稱為非官守太平紳士). 香港特別行政區政府太平紳士 (繁體中文).
  24. 監獄規則第77(9)條:署長可准許社會上有名譽的人,在其批准的時間內參觀其所控制的院所。
  25. . 原著喺2007年12月12號歸檔. 喺2007年11月8號搵到.
  26. . 原先內容歸檔喺2020年4月17號. 喺2007年11月8號搵到.
  27. . 原著喺2004年3月19號歸檔. 喺2007年11月8號搵到.
  28. 香港電台第一台 (2006-12-16). . 原著喺2007-02-13歸檔. 喺2007-07-07搵到.
  29. 劉慧卿懷疑有人入室搜尋"黑材料". BBC中文網. 2004-08-31. 原先內容歸檔喺2020-12-09. 喺2007-07-07搵到.
  30. 鮑亭. . 開放雜誌. 原著喺2007-09-27歸檔. 喺2007-07-07搵到.
  31. 海涛 (2004-02-26). . 美國之音中文網. 原先內容歸檔喺2007-09-30. 喺2007-07-07搵到.
  32. 劉慧卿遭40人圍攻 梁家傑遭擲蛋. 原先內容歸檔喺2020年4月17號. 喺2007年11月8號搵到.
  33. 劉慧卿指中共內部權鬥 殃及香港. 原先內容歸檔喺2007年9月5號. 喺2007年11月8號搵到.
  34. . 原先內容歸檔喺2016年3月7號. 喺2007年11月8號搵到.
  35. 立法局議事程序表1995年10月18號星期三下午二時三十分. 原先內容歸檔喺2020年4月21號. 喺2007年11月8號搵到.
  36. . 原著喺2007年9月29號歸檔. 喺2007年11月8號搵到.
  37. . 原先內容歸檔喺2020年4月17號. 喺2007年11月8號搵到.
  38. 立法會CB(2)1934/06-07號文件 (PDF). 原先內容歸檔 (PDF)喺2020年4月21號. 喺2007年11月8號搵到.
  39. 立法會CB(3)839/01-02號文件 (PDF). 原先內容歸檔 (PDF)喺2020年4月21號. 喺2007年11月8號搵到.
  40. . 原著喺2008年6月19號歸檔. 喺2007年11月8號搵到.
  41. 劉慧卿接受希望之聲電台採訪談「賣國風波」與23條. 原先內容歸檔喺2016年7月1號. 喺2007年11月8號搵到.
  42.  . 原先內容歸檔喺2007年9月30號. 喺2007年11月8號搵到.
  43. 茉莉﹕一場惡浪給劉慧卿平添風骨. 原先內容歸檔喺2020年4月18號. 喺2007年11月8號搵到.
  44. . (香港中文). 原先內容歸檔喺2021-02-11. 喺2020-10-12搵到.
  45. 【立法會選舉●新東、九東】林卓廷獲卿姐隔罩獻吻支持 胡志偉拒簽確認書預定Plan B. Apple Daily 蘋果日報 (香港中文). 原先內容歸檔喺2021-02-11. 喺2020-10-12搵到.
  46. Au, Cheuk Hang; Ho, Kevin K. W.; Law, Kris M. Y. (2021-11-02). "The bright and dark of consumers' online brand defending behaviors: exploring their enablers, realization, and impacts". Journal of Organizational Computing and Electronic Commerce. 0 (0): 1–21. doi:10.1080/10919392.2021.1949192. ISSN 1091-9392.

出面網頁[編輯]

上一任
何秀蘭
前綫召集人
1996年2008年
末代

Template:香港特別行政區第二屆立法會議員 Template:香港特別行政區第一屆立法會議員