葉劉淑儀

尊貴嘅 葉劉淑儀 議員, GBM, GBS, JP
葉劉淑儀議員, GBM, GBS, JP
香港特別行政區行政會議非官守成員
現任
就任日期 2017年7月1號
行政長官	林鄭月娥
任期 2012年10月17號－2016年12月15號
行政長官	梁振英
新民黨主席
現任
就任日期 2010年12月15號
副主席	史泰祖、田北辰→田北辰→田北辰、潘國山→田北辰、潘國山、容海恩→容海恩、潘國山
前任	首任
香港立法會議員
現任
就任日期 2008年10月1號
選區	香港島選區
匯賢智庫理事會主席
現任
就任日期 2006年
香港特別行政區行政會議官守成員
任期 2002年7月1號－2003年7月24號
行政長官	董建華
保安局局長
任期 1998年8月31號－2003年7月25號
行政長官	董建華
前任	黎慶寧
繼任	李少光
入境事務處處長
任期 1997年7月1號－1998年7月
行政長官	董建華
前任	首任
繼任	李少光
人民入境事務處處長
任期 1996年8月－1997年6月30號
總督	彭定康
前任	梁銘彥
繼任	末任
工業署署長
任期 1995年9月－1996年8月
總督	彭定康
前任	俞宗怡
繼任	何宣威
個人資料
性別	女
別名	Regina
出世	(1950-08-24) 1950年8月24號 英屬香港
籍貫	廣東佛山南海區羅村
國籍	中國（香港）
政黨	匯賢智庫 新民黨
配偶	葉文浩（1981年結婚；1997年逝世）
仔女	葉榮欣
父母	老頭劉福成 老母華彩鳳（華綺梨）
居住地	香港香港島中半山
學歷	東亞研究文學碩士 工商管理碩士 英國文學碩士 英國文學文學士
母校	史丹福大學 格拉斯哥大學 香港大學 般含道聖士提反女子中學

示威者用佢「掃把頭」個樣整嘅公仔

葉劉淑儀，GBM，GBS，JP（英文：Regina Ip Lau Suk-yee，1950年8月24號—），簡稱葉劉，係前香港政府官員，第四、五、六屆香港立法會議員。

生平

葉劉淑儀鄉下響廣東南海羅村。老竇劉福成係星加坡華僑，阿媽華彩鳳係佢老竇嘅妾侍。

葉劉淑儀嚮聖士提反女子中學、香港大學文學院、格拉斯哥大學、史丹福大學畢業。響主權移交前響港英政府做人民入境事務處處長，係香港史上第一個做紀律部隊阿頭嘅女性。響特區政府成立後，葉劉淑儀響1998年7月畀嗰時嘅特首董建華委任做保安局局長。

響保安局局長任內，葉劉淑儀嘅政績引起爭議。響處理居港權同《公安條例》修訂等等棘手議題上，有人話佢強硬果斷，係特區唔少得嘅「鐵娘子」。葉劉淑儀曾經係特區政府民望最高嘅局長，但自從佢響2002年9月開始推銷《基本法23條》本地立法以後，由於畀人話佢態度輕佻傲慢，又不時發表大爭議性嘅言論，令佢民望一路跌，至2003年7月1號50萬人上街遊行後，佢民望更跌落谷底，做咗最唔受歡迎嘅政府官員。同時亦有人借用佢其嘅髮型，話佢「掃把頭」。最後《23條》立法擱置，佢自己亦響同年7月16號辭職，成為首批辭職嘅問責局長之一。

落台後，葉劉淑儀去美國進修，2006年學成返香港，而且重新投入政壇，搞匯賢智庫，自任主席，令外界揣測佢有意競逐2008年香港立法會選舉，以至於2012年香港特別行政區行政長官選舉。至2007年9月27號，佢向外界公佈參加立法會港島選區補選，同包括佢前上司陳方安生等7個人爭補選議席，不過佢輸咗畀陳方安生。

2008年，葉劉淑儀透過地區直選成為香港立法會議員，隨後兩屆，佢亦能成功冧莊。

2011年，葉劉淑儀同田北辰、史泰祖等人創立新民黨，並成為創黨主席，2014年，新民黨同公民力量結盟，而佢就成為公民力量會長。

2016年12月15號，葉劉淑儀正式宣布參選第5屆香港行政長官選舉，但最後無攞到足夠提名。

屋企

劉淑儀喺1981年12月10號嫁畀正興建築創辦人葉正平個仔葉文浩，最初係由屋企嘅工人介紹嘅，兩個人只係拍咗拖五個月，但係呢頭婚事受到葉文浩幾個妹嘅反對，葉正平更加向法庭申請禁制令，唔准佢哋兩個用自己個名派帖，最後葉家喺擺酒當日全部缺席。

葉文浩個妹葉文心就解釋話，1981年5月阿媽啱啱過身，未落葬就搞喜事唔係太好，但係葉劉堅持要喺嗰時結婚。

1983年，老爺葉正平過身，但佢嘅遺產淨係傳畀葉家嘅三姊妹，葉文浩同大佬葉文山不滿，就向法庭申請遺囑無效，不過法院最後都係判葉家三姊妹贏咗，葉文浩更加因為噉同佢啲妹決裂。到1989年，佢個女葉榮欣出世。

1996年，葉文浩發現有肝癌，年零之後就死咗，之後佢就要寡母婆湊大個女。

政治立場同爭議

葉劉淑儀係香港親中派人士，自2012年起做埋行政會議成員。不過，佢喺LGBT權益上嘅問題就比起其他親中派開明，支持佢哋擁有更平等嘅權利。

引述希特拉靠民主選舉上台謠言

喺推動香港就基本法23條立法期間，當時做保安局局長嘅葉劉淑儀就曾經話民主幫助希特拉上台，並導致後嚟嘅大屠殺，仲話民主唔係解決所有問題嘅萬靈丹。呢句話當時引起社會嘩然。

不過，好多人都會反駁，指責當時希特拉當時所用嘅暴力手段，以及當時所謂嘅民主選舉並無俾到真正人民選擇。

否認新疆種族滅絕

新疆維吾爾族人受到中共嘅大清洗，受到迫害、強迫勞動、宗教歧視等議題，喺2014年起開始受到關注。而美國兩任國務卿蓬佩奧同布林肯，都將中國針對新疆維吾爾族嘅行為定義為「種族滅絕」。但葉劉淑儀就曾經喺Twitter引中國女星迪麗熱巴作例子，質疑呢個說法。另外，喺2021年2月，葉劉淑儀訪問網上群組Save HK嘅創辦人，就再質疑指控無證據。

葉劉淑儀喺Twitter嘅言論，當時就受到唔少外媒嘅批評同質疑。《經濟學人》編輯Don Weinland批評，形容佢呢個Post可能係世界上最卑鄙嘅推文。路透社國際新聞編輯Gerry Doyle就反問，黑人音樂巨星Jimi Hendrix係60年代最紅嘅音樂人，係咪咁樣就可以證明當年美國無種族歧視。

另外，國際社會因為中共對新疆作出種族清洗嘅行為，對中國進行制裁，有啲時裝品牌亦宣布唔再用新疆棉，引起咗唔細嘅風波。葉劉淑儀亦隨即表態支持新疆棉花，又批評佢自己有用開嘅Burberry品牌對新疆作出失實同無理指控，話要停用Burberry產品。

收受時代生活集團利益爭議

2016年11月，時事評論員黃世澤喺自己嘅網誌，以及立場新聞，都分別揭發時代生活集團多名管理層對葉劉淑儀、田北俊同容海恩三名新民黨立法會議員，喺2016年香港立法會選舉嘅競選工程入面，捐助近50萬，其中一名管理層葉家明更加係新民黨成員。黃世澤質疑，葉劉淑儀收咗時代生活集團咁多錢，又參與行政會議同立法會發展事務委員會，有利益衝突之嫌。

睇埋

• 廿三條
• 新民黨
• 田北辰（前黨友）
• 葉榮欣（葉劉淑儀嘅千金）
• 容海恩
• 黃楚峰
• 陳家珮

出面網頁

• Regina Ip's Office （繁體中文） （英文）
• 行政會議 - 行政會議成員 - 葉劉淑儀
• "香港特別行政區立法會 - 議員履歷 ::葉劉淑儀議員, 大紫荊勳賢, GBS, JP" (中文). 香港特別行政區立法會.
• 葉劉淑儀選舉網站
• 葉劉淑儀 理事會主席，匯賢智庫
• 香港網絡大典：葉劉淑儀